VOV4.Bahnar - Tơ̆ hơ năp tơ drong krê hơ mơt đơ̆ng jĭ Covid -19 tơ̆ dêh char Dak Lak mưh hơ nơ̆ng đei bơ ngai tơ pŏh jĭ lơ̆m năr, Anih vei lăng jang pơ gang dêh char Dak Lak tơ lĕch trong pơ jing anih akŏm, hơ met ăn bơ ngai jĭ Covid-19. Hơ dai hăm hơ tŏk Khul jang pơ gang, hnam pơ gang tang găn jĭ, ‘nŏh tơ drong pha lơ̆m trong jang mă âu ‘nŏh dêh char vă vei lăng păng hơ met ăn bơ ngai jĭ F0 tơ̆ hnam, tơ plih ming hơ năp jang đơ̆ng dôm hnam pơ gang jing anih akŏm, hơ met ăn bơ ngai jĭ Covid-19.

Dak Lak ‘nao tơ mât yoa Hnam pơ gang hơ met jĭ hơ buh kơ sô̆ 2 đei mĭnh năr

Kiơ̆ kơ ‘nŏh, vă pơm kiơ̆ trong hơmet jĭ tơ̆ hnam ăn bơ ngai jĭ Covid -19 ưh đei yuh, hiĕn păng pơm lăp hăm dôm tơ drong hơ găt đơ̆ng Anih tơm vei lăng jang pơ gang, mưh hơ met jĭ tơ̆ hnam, đei bơ ngai jang pơ gang, khul kơ dră tơ ring vei lăng, hơ len năng tôm tơ drong. Lơ̆m ‘năr (2/11) dêh char Dak Lak đei 102 ‘nu bơ ngai jĭ Covid -19, lơ̆m nŏh đei 44 ‘nu bơ ngai tơ pŏh lơ̆m tơ pôl, hơ tŏk đĭ đăng kơ sô̆ bơ ngai jĭ Covid -19 lơ̆m dêh char truh 4.396 ‘nu.

Dơ̆ng: Tơ blơ̆