VOV4.Bahnar - Kơtơ̆ng ang đơ̆ng Dơnŏ anĭh vei lăng kon pơlei apŭng Sa Thây, dêh char Kon Tum kơsơ̆ brei năr 5/5 tơbăt, Hnam pơgang apŭng hlôi iung jang ăn oei hơdrô̆ hăm 1 ‘nu bơngai F1 jĭ Covid-19 oei tơ̆ Vĩnh Phúc păng tŏk bŏk iung jang kơtang tơchă dôm bơngai đei tơ ƀơ̆p hăm sư, tang găn pơrang jĭ. Bơngai F1 đei Hnam pơgang apŭng Sa Thây ăn oei hơdrô̆ vă tang găn jĭ au ‘noh bơngai jang ăn hơnĭh hơri Karaoke FoCus, kơsô̆ 01D, trong Kim Ngọc, tơring Tích Sơn, apŭng Vĩnh Yên, dêh char Vĩnh Phúc đơ̆ng sơnăm 2019 trŭh dang ei.

Hơnĭh ăn oei hơdrô̆ gĭt kăl tơ̆ Hnam pơgang apŭng Sa Thầy

‘Măng mă blŭng Hnam pơgang apŭng Sa Thây hlôi băt hơdăh đei 6 ‘nu bơngai F2 kơ bơngai F1 hơnăn sư L.T.T.T păng hlôi chơ ba 5 ‘nu bơngai au vĭh erih sa tơ̆ hơnĭh oei hơdrô̆ akŏm kơ apŭng. Kơdră chĕp pơgơ̆r tơring păng hơnĭh jang pơgang apŭng Sa Thầy tŏk bŏk hơnơ̆ng năm tơchă rim bơngai F3 vă chĭh hơnăn ăn oei hơdrô̆ lơ̆m ŭnh hnam, adoi jang kiơ̆ kơ jăp rim tơdrong tơchơ̆t tang găn jĭ.

Tơblơ̆ nơ̆r: Amazưt