VOV4.Bahnar - Pơgê brei (31/3), kơtơ̆ng ang đơ̆ng Hnam pơgang tơm dêh char Kon Tum tơbăt, bơngai jĭ sơnăm kră hlŏh lơ̆m 4 ‘nu bơngai jĭ đei jau soai pơnhŭl tơ̆ apŭng Kon Plông hlôi lôch. Bơngai lôch ‘nŏh yă Y Xuân, 65 sơnăm, pơlei Kon Du, tơring Măng Cành, apŭng Kon Plông.

Lơ̆m jơ ‘năr chơ ba tơ̆ hnam pơgang yă Y Xuân jĭ ăl, đei ƀô̆h jĭ soai pơnhŭl. 4 năr đơ̆ng rŏng bơngai jĭ au sa roi jĭ ăl hlŏh dơ̆ng păng hlôi đei ƀet tơmơ̆t pham 3 ‘măng. Dang ei 3 ‘nu bơngai jĭ uơ oei tŏk bŏk đei ming hơmet tơ̆ Hơnĭh hơmet jĭ ăl. Rim bơngai jĭ tŏk bŏk ăn dui jơhngơ̆m hăm kmăi mă lei jơhngơ̆m jăn hlôi vă sơđơ̆ng ƀiơ̆ bơih pơtêng hăm jơ ‘năr chơ ba năm tơ̆ hnam pơgang. Tơdrong tơnap tap hrei au lơ̆m tơdrong ming hơmet jĭ ăn bơngai jĭ ‘nŏh ư̆h kơ đei pơgang ming hơmet, khăm hơlen pham tim mă băt hơdăh kơ yuơ tơdrong kiơ pơm ăn, rŏ năng oei chă ming hơmet đunh khei ‘năr ‘mơ̆i.

Tơblơ̆ nơ̆r: Amazưt