VOV4.Bahnar - Dêh char Kon Tum ‘nao đei 6 ‘nu bơ ngai tơ pŏh pơ rang jĭ SARS-CoV-2 tơ̆ anih oei hơ drô̆ hơ dai kơ dêh char ‘nŏh (Hnam trưng Cao đẳng Tơ pôl dêh char Kon Tum). Adrol kơ ‘nŏh 6 ‘nu bơ ngai âu đơ̆ng plt Hồ Chí Minh păng dêh char Bình Dương vih tơ̆ Kon Tum đơ̆ng ‘năr 27/7 hăm gre hon đa.

Đơ̆ng rŏng kơ truh ƀât Anih set hơ len jĭ kơ sô̆ 1 Sao Mai, xăh Hòa Bình, plt Kon Tum, 6 ‘nu bơ ngai âu đei khul jang kơ pal kơ dêh char chơ ba tơ̆ anih oei hơ drô̆. Pơ gê ‘năr 1/8, đơ̆ng rŏng kơ set hơ len jĭ ‘măng mă 1 tơ pŏh pơ rang jĭ SARS-CoV-2 kiơ̆ trong RT-PCR, 6 ‘nu bơ ngai âu đei ăn năm hơ met hơ drô̆ tơ̆ Anih 2, Hnam pơ gang Y dược cổ truyền- Hơ met ming jo jăn dêh char Kon Tum. 

Truh dang ei, đĭ đăng F0 tơ̆ dêh char Kon Tum đei chă ƀôh tơ̆ Anih gak hơ len jĭ tơ̆ trong vă mât lơ̆m dêh char ngăl păng đei chơ năm tơ̆ anih oei adrô̆ tôch tơ tom. Kon Tum tam mă đei bơ ngai jĭ COVID-19 yơ tơ pŏh lơ̆m tơ pôl.

Dơ̆ng: Tơ blơ̆