VOV4.Bahnar - Pơ gê brei (20/7), Anih pơ gơ̆r tang găn jĭ COVID-19 dêh char Kon Tum pơ gơ̆r hop akŏm kăl trực tuyến hăm 10 apŭng, pơ lei tơm lơ̆m dêh char găh 2 ‘nu bơ ngai đei tơ poh jĭ SARS-CoV-2 mă blŭng đei chă ƀôh lơ̆m dêh char đơ̆ng blŭng jĭ păng hơ tŏk loi dơ̆ng tơ drong jang tang găn jĭ lơ̆m tơ drong ‘nao kơ tơ ring. Pơ đĭ 2 ‘nu F0 adoi đei ăn oei hơ drô̆ hloi ƀơ̆t mơ̆t lơ̆m dêh char păng tŏk bŏk hơ met tơ̆ Hnam pơ gang apŭng Kon Plông păng Hnam pơ gang Y dược Cổ truyền- Phục hồi chức năng dêh char Kon Tum. 

Hnam pơ gang Y dược Cổ truyền- Phục hồi chức năng dêh char Kon Tum hơ nih hơ met dôm bơ ngai jâu jĭ SARS-CoV-2

Tơ̆ ‘măng hop akŏm kăl trực tuyến hăm 10 apŭng, pơ lei tơm lơ̆m dêh char, Anih pơ gơ̆r tang găn jĭ COVID-19 dêh char Kon Tum hlôi athei tơ lĕch jang hơ tŏk loi dơ̆ng tơ drong jang tang găn jĭ lơ̆m tơ drong ‘nao kơ tơ ring. Dêh char tơ tă truh khŭl kơ dră chĕp kơ̆l 10 apŭng, pơ lei tơm kơ dêh char lơ̆m tơ drong jang vei lăng bơ ngai brŏk đơ̆ng rim tơ ring jĭ păng ư̆h kơ lê̆ tơ poh đơ̆ng bơ ngai âu tơ̆ bơ ngai to lơ̆m Hơ nih ăn oei hơ drô̆ hơ met dôm bơ ngai F0.

Thuem: Tơ blơ̆