VOV4.Bahnar - Truh kơ sơ̆ ‘năr 6/5, dêh char Kon Tum hlôi jang đang tơ drong ƀet vắc xin ‘măng mă 1 tang găn jĭ COVID-19, hơ dai hăm ‘noh hơ nơ̆ng tơ lĕch jang, bơ̆ jang kiơ̆ rim trong jang kăl tang găn jĭ. Akŏp đĭ đăng dêh char Kon Tum đei vă jê̆ 11.000 ‘nu hlôi đei ƀet vắc xin jrŭm 1 tang găn jĭ COVID-19, đei hloh 83% kơ sô̆ bơ ngai đei tơ gŭm hơ drol ƀet tang găn ‘măng mă 1. ‘Nâu jĭ dôm bơ ngai bơ̆ jang lơ̆m rim anih jang pơ gang păng bơ ngai vang jang tang găn jĭ COVID-19.

Ƀet vắc xin ‘măng mă 1 tang găn COVID-19 tơ̆ Hnam pơ gang Đa khoa dêh char Kon Tum

Găh tơ drong jang tang găn jĭ COVID-19 tơ̆ dêh char Kon Tum, truh kơ sơ̆ ‘năr 6/5, anih jang pơ gang tơ ring hlôi đei 2 ‘nu F1 tơ̆ apŭng Sa Thầy păng Ngọc Hồi. Tơ drong tơ chă păng dăr hơ len dôm bơ ngai F2, F3 đei khŭl jang kơ pal pơ gơ̆r tĕnh koăng. Tơ̆ hơ năp đei ƀôh hrĕnh, ư̆h kơ ê đơ̆ng jĭ COVID-19, Anih tơm pơ gơ̆r khŭl linh dêh char Kon Tum hlôi đei hla ar gơ̆ih kơ Anih vei lăng kon pơ lei dêh char păng Anih pơ gơ̆r jang tang găn jĭ COVID-19 dêh char Kon Tum tơ lĕch trong jang pơ jing dôm hơ nih răp găn, dăr joang vă tang găn bơ ngai mơ̆t glăi tơ̆ tơ ring 2 (tơ ring tơ til trong ver sơ lam).

Thuem: Tơ blơ̆