VOV4.Bahnar - Tơ̆ dêh char Kon Tum truh khei ‘năr âu hlôi đei vă jê̆ 30 ‘nu jĭ COVID-19. Mă lei đĭ đăng dôm bơ ngai jĭ âu tă kơ đei ăn oei hơ drô̆ hloi ƀơ̆t brŏk tơ̆ dêh char păng Kon Tum dang ei jing tơ ring lăp mĭnh drô̆ đĕch tơ̆ tơ ring Tây Nguyên tam mă đei bơ ngai jĭ lơ̆m tơ pôl. Tơ pă yan âu tơ drong jang tang găn jĭ COVID-19 tơ̆ Kon Tum ăn ƀôh, kŭm hăm hơ nih răp găn đei yua bơ ngai tơ poh tơ̆ ‘măng năm mơ̆t lơ̆m dêh char ‘noh tơ drong jang tang găn jĭ tơ̆ rim pơ lei pơ la kŭm tŏk bŏk tơ gop gĭt kăl lơ̆m tơ drong tang găn tơ poh jĭ lơ̆m tơ pôl.

Hơ tuch khei 8 âu ki, xăh Hơ Moong, apŭng Sa Thầy đei 16 ‘nu bơ ngai jang brŏk đơ̆ng tơ ring đei jĭ dêh char Bình Dương. Đơ̆ng rŏng kơ pơm kiơ̆ đang 14 năr ăn oei hơ drô̆  akŏm lơ̆m dêh char kiơ̆ tơ drong hơ găt, mă đơ̆ng tôch kơ ƀlŏk rơ nguơ̆ kơ kon oh, mă lei lơ unh hnam kon pơ lei tă kơ đei atŭm apĭnh hăm khŭl kơ dră ăn bơ ngai lơ̆m unh hnam sư gơh hơ nơ̆ng ăn oei hơ drô̆ akŏm dơ̆ng 14 năr tơ̆ xăh, vă “ mưh chă đei tơ drong” ‘noh hoei kơ ƀơm ưh kơ ‘lơ̆ng truh tơ pôl kon pơ lei.

            Ƀok A Đứu, Bí thư Chi bộ plei Kà Bầy tơ băt, vă kon pơ lei đei đon kơ chăng tang găn jĭ ‘lơ̆ng thoi noh, rim năr 4 ‘nu đảng viên kơ Chi bộ tơ plih băl gak tơ̆ Hơ nih răp găn vei lăng jĭ COVID-19 yua đơ̆ng xăh pơm tơ̆ trong năm klĕch pơ lei. Tơ̆ âu mưh kon pơ lei năm tơ̆ mir dăh mă brŏk đơ̆ng chŭn dôm đảng viên tơ gĕch băt hơ dăh tơ drong jang sa păng jơ hngơ̆m jăn rim kon pơ lei. Kŭm hăm ‘noh tơ gep hơ dai tơ roi tơ băt tang găn jĭ COVID-19 vă kon pơ lei hlôh găh tơ drong krê hơ mơt hăm jơ hngơ̆m jăn kơ dih păng tơ pôl. ‘Ngoăih kơ ‘noh tơ gĕch pơ gê kơ măng, dôm đảng viên năm truh tơ̆ rim unh hnam lơ̆m pơ lei pơ tho, tơ roi tơ băt, krao hơ vơn kon pơ lei dôm trong tang găn jĭ:

            “Đảng viên lơ̆m Chi bộ pơ lei tă kơ pơm kiơ̆ ‘lơ̆ng tơ drong pơ gơ̆r đơ̆ng kơ dră kơ pal. Tơ drong jang tang găn jĭ nhen thoi âu đe sư găk hơ nih răp găn, krao hơ vơn kon pơ lei gom muh măt mưh lĕch tơ̆ ‘ngoăih. Đảng viên lơ̆m Chi bộ ling lang pơm jŭk yŭk trong hơ lâu lơ̆m rim tơ drong jang păng krao hơ vơn kon pơ lei vang jang.”

Vei lăng bơ ngai mơ̆t lơ̆m tơ ring tơ̆ hơ nih răp găn vei lăng jĭ COVID-19 tơ̆ plei Kà Bầy, xăh Hơ Moong

            Vă tang găn jĭ COVID-19, xăh Hơ Moong, apŭng Sa Thầy pơm 2 Hơ nih răp găn vei lăng bơ ngai mơ̆t lơ̆m tơ ring păh apŭng Đăk Tô păng Đăk Hà. Khŭl jang kơ tă jang tơ drong jang tơ̆ Hơ nih răp găn kŭm hăm kang ƀô̆ kơ pal kơ xăh oei đei tơ drong vang jang đơ̆ng dôm bơ ngai jang lơ̆m Grŭp bơ̆ jang tơ pôl tang găn jĭ COVID-19 2 pơ lei hơ nih pơm Hơ nih răp găn. Kơ sô̆ chih jô̆ hơ len lăng tơ̆ 2 Hơ nih răp găn vei lăng jĭ kơ xăh ăn ƀôh, đơ̆ng tŏk bŏk giĕng khei 5 truh blŭng khei 9 đei 4.600 ‘nu bơ ngai mơ̆t lơ̆m tơ ring găh lơ đơ̆ng xăh Đăk Mar, apŭng Đăk Hà păng xăh Pô Kô, apŭng Đăk Tô. Kơ tơ̆ng ang rim bơ ngai đei chih tôm hloh ‘noh jĭ hơ nih oei sa, kơ sô̆ điên thoăi pơ ma dơ nuh păng pơ tŏ yuh hơ kâu jơ năr năm klĕch hơ nih răp găn. Ƀok Lê Khắc Tuấn, Bí thư Đảng xăh Hơ Moong tơ băt, vă hơ tŏk ‘lơ̆ng đei yua tơ drong jang tang găn jĭ COVID-19, kŭm hăm pơ vei kơ hret tơ drong jang 2 Hơ nih răp găn vei lăng prăt năr prăt măng, khŭl kơ dră xăh băt hơ dăh athei hơ tŏk ‘lơ̆ng đei đon kơ chăng tang găn jĭ đơ̆ng kon pơ lei:

             “Xăh Hơ Moong kon pơ lei kon kông đei hloh 90% kơ na jing tơ drong jang tơ roi tơ băt tôch kơ să. 1 jơ truh 2 jơ lơ̆m Rađiô pơ re nơ̆r tơ roi tơ băt hơ nơ̆ng. Oei tơ̆ rim pơ lei đei aloa chĕp ti xăh asong, Khŭl kon pơ lei kơ pơ lei ‘noh chĕp aloa hơ nơ̆ng tơ roi tơ băt. Truh dang ei ‘noh đon băt kơ chăng lơ̆m kon pơ lei tôch kơ ‘lơ̆ng.”

Kon pơ lei năm jang mir hơ drol kơ brŏk tơ̆ pơ lei đei vei lăng yuh hơ kâu tơ̆ Hơ nih răp găn vei lăng jĭ COVID-19

            Yak hơ dai hăm khŭl jang pơ gang, khŭl linh, kŏng an tơ̆ hơ nih tang găn jĭ, truh dang ei tơ̆ rim pơ lei, kueng kơ phô̆ kơ dêh char Kon Tum hlôi pơ jing hloh 2.800 Grŭp bơ̆ jang tơ pôl tang găn jĭ COVID-19. Mĭnh grŭp bơ̆ jang đei đơ̆ng 2 truh 3 ‘nu ‘noh kang ƀô̆ pơ lei/kueng kơ phô̆, rim khŭl grŭp tơ pôl, bơ ngai jang tơ gŭm păng đei iŏk jang vei lăng đơ̆ng 30 truh 50 unh hnam. Yă Y Dim, Phŏ Bí thư anih jang Đảng, Kơ dră Jơ nŭm pơ gơ̆r kon pơ lei xăh Đăk Pxi, apŭng Đăk Hà tơ băt, tơ drong hơ tŏk đei hơ năp jang đơ̆ng rim grŭp bơ̆ jang tơ pôl lơ̆m tơ drong jang tang găn jĭ COVID-19 tơ̆ rim pơ lei pơ la ‘noh tôch kơ gĭt kăl:

            “Rim grŭp tang găn jĭ âu rim năr đei hơ năp jang năm dăr hơ len đĭ đăng rim pơ lei lơ̆m xăh. Rim grŭp jang hơ dai hăm Kŏng an jang gak vei lăng tơ drong năm ưh kơ gom muh măt. Dăr hơ len kơ jăp dôm kon pơ lei tơ̆ ‘ngoăih dêh char brŏk tơ̆ hnam. Vei lăng kơ jăp kiơ̆ tơ drong hơ găt găh ăn oei hơ drô̆. Tơ̆ pơ lei kŭm hơ len lăng ưh kơ đei akŏm lơ bơ ngai. ‘Ngoăih kơ ‘noh pơ tho kon pơ lei pơm rơ goh cham char. Oei tơ̆ hnam athei đei đak ôp ti. Kon pơ lei ưh kơ đei jên vă răt đak ôp ti ‘noh nhôn kŭm pơ tho ăn kon pơ lei răt sơ ƀŏng hơ nơ̆ng ôp ti hăm sơ ƀŏng đang kơ ‘noh trong gom muh măt pơ tho mă hơ dăh.”

Mĭnh unh hnam kon pơ lei tơ̆ Plei Rơ hai II, phường Lê Lợi, pơ lei tơm Kon Tum pơm kiơ̆ ăn oei hơ drô̆ tơ̆ hnam tang găn jĭh COVID-19

            Truh khei ‘năr âu tơ̆ dêh char Kon Tum, đĭ đăng dôm bơ ngai jĭ COVID-19 tă kơ đei ăn oei hơ drô̆ hloi mưh brŏk tơ̆ dêh char păng Kon Tum dang ei ‘noh jĭ tơ ring lăp mĭnh drô̆ đĕch tơ̆ tơ ring Tây Nguyên tam mă đei bơ ngai jĭ lơ̆m tơ pôl. Vă vei kơ jăp iŏk yua vei lăng jĭ hơ buh, kŭm hăm hơ nơ̆ng hơ tŏk loi dơ̆ng khŭl jang ăn dôm hơ nih răp găn vei lăng jĭ tơ̆ ‘măng năm mơ̆t lơ̆m dêh char vă tang găn tơ drong tơ poh jĭ mơ̆t lơ̆m tơ ring, Kon Tum kŭm tŏk bŏk hơ nơ̆ng pơ vei păng pơ jing dơ̆ng lơ pơ lei sơ đơ̆ng vă tơ drong arih sa jăh hơ lơ̆k hmă ‘nao dơ̆ng.

Khoa Điềm : Chih

Thuem: Tơ blơ̆