VOV4.Bahnar - Năr 29/11, Dơnŏ anĭh jang pơgang dêh char Kon Tum iung jang ƀet ‘măng mă 1 vaccine tang găn jĭ Covid-19 ăn vă jê̆ 66.000 ‘nu hơ iŏh đơ̆ng 12 trŭh 17 sơnăm. Lơ̆m ‘măng ƀet bơ̆ng mă 1 vaccine tang găn jĭ Covid-19 ăn đe hơ iŏh ‘măng mă au, Hơnĭh jang pơgang dêh char Kon Tum iung jang hơdoi hăm Dơnŏ anĭh vei lăng Hnam trương pơtho pơhrăm dêh char ƀet vaccine ăn hŏk tro rim hnam trương jăl ƀar pêng, hnam trương tĕh đak rong ‘me, Hnam trương pơtho tơdrong jang păng hnam trương Giáo dục thường xuyên. 

Hŏk tro Hnam trương Jăl ƀar-Hnam trương jăl pêng Liên Việt Kon Tum đei ƀet vaccine tang găn jĭ Covid-19

Jô̆ trŭh pơgê năr 29/11 hlôi đei vă jê̆ 8.500 ‘nu hok tro kơ 21 lơ̆m 38 hnam trương đei ƀet vaccine Pfizer jrŭm mă 1. Kiơ̆ đơ̆ng Dơnŏ anĭh vei lăng Hnam trương pơtho pơhrăm dêh char Kon Tum, đe hơ iŏh đơ̆ng 15-17 sơnăm đei ăn ƀet hơdrol păng đơ̆ng rŏng ‘nŏh tơ̆ đe hơ iŏh kiơ̆ trong klăh asong vaccine đơ̆ng Dơnŏ anĭh vei lăng jang pơgang. Vă sơđơ̆ng ăn đe hơ iŏh đei ƀet vaccine sơđơ̆ng hlŏh, tôm tong, Khŭl kơdră chĕp pơgơ̆r rim hnam trương hlôi tơroi tơbăt păng hơvơn mĕ ƀă hŏk tri kĭ pơkăp drơ̆ng nơ̆r ăn kon hơ ‘lơ̆p năm ƀet vaccine. 

Tơblơ̆ nơ̆r: Amazưt