VOV4.Bahnar – Anih tơm Y tê̆ 'nao pơm Lêh mit tĭnh pơm kiơ̆ 'Năr apŭng plenh teh tang găn păng tơjră pơrang jĭ. Tơ̆ jơ lêh, Anih tơm Y tê̆ tơroi: Truh dang ei, jâ̆p teh đak hlôi ƀet đei jê̆ 150 trĭu kơliu vaccine lơ̆m kơsô̆ hloh 166 trĭu kơliu hlôi đei axong. Kơsô̆ ƀet đei tôm 1 kơliu vaccine noh 79% păng kơsô̆ ƀet tôm vaccine kăp gĭt noh 66% kơsô̆ măt bơngai. Kơsô̆ mă âu hlôi hloh kơ tơdrong tơchơ̆t mă Anih jang Y tê̆ apŭng plenh teh tơlĕch truh đĭ xơnăm âu, 40% kơsô̆ măt kon pơlei kơ rim teh đak đei ƀet vaccine bơ̆ng jĭ Covid-19. Anih tơm Y tê̆ pơkăl rim tơring vei lăng kơjăp dôm bơngai mă ƀônh ƀơm jĭ lơ̆m tơring; tơlĕch ƀet vaccine bơ̆ng jĭ COVID-19 kơtă tơ̆ hnam, vei xơđơ̆ng ưh đei lê̆ bơngai yơ lơ̆m khul âu; Tơlĕch chă khăm hơlen păng hơmet jĭ ăn bơngai ƀơm F0 lơ̆m khul ƀônh ƀơm jĭ đơ̆ng 'nao băt đei jĭ.

Lan chih păng pơre nơ̆r