01. Hơmet anih dơ̆ng păng jơhngơ̆m pran, khŏm mă 'nhăk teh đak yak ah chăl sơnăm hơtŏk tơ-iung

Dôm tơdrong jang đei jơnei đơ̆ng rŏng 40 sơnăm tơplih 'nao hăm tơdrong pơgơ̆r đơ̆ng Đảng tơgŭm Việt Nam akŏm đei jơhngơ̆m pran păng anih dơ̆ng ăn tơdrong hơtŏk tơ-iung pran kơtang lơ̆m dôm sơnăm đơ̆ng rŏng kơ noh. Ƀok Tổng Bí thư Tô Lâm sơkơ̆t hơdah âu jĭ khei năr “akŏm đei” tôm tơdrong hiôk, jơhngơ̆m pran vă teh đak bơ̆n yak mơ̆t ah chăl hơrih 'nao, jơhnơr hơrih hơtŏk tơ-iung kơ teh đak pơtoi kơ khei năr đei iŏk rơngei hiôk hian, tơ-iung pơjing chu nghia xah hô̆i păng chăl hơrih 'nao.

Hop akŏm 'măng mă 10, Ƀan châ̆p hanh Trung ương Đảng jăl 13 sơkơ̆t hơdah jơhnơr hơrih hơtŏk tơ-iung kơ kon pơlei Việt Nam gô pơtơm đơ̆ng Hop akŏm mă 14 kơ Đảng. Vă đei jơnei tơchơ̆t âu, đơ̆ng dang ei, tôm Đảng, tôm kon pơlei akŏm jang 3 tơdrong jang dơnơm noh tơplih trong jang, pơkăp bot 'lơ̆ng jơnŭm pơgơ̆r jang păng hơtŏk tơdrong hơgei hăm bơngai jang, vă vei lăng kơjăp rah, păng hơtŏk tơ-iung rah, atŭm hăm noh, tơ-iung tơdrong pran kơ kon pơlei, tơdrong hơdrin kơ-'nôh, tơguăt kơjăp jơhngơ̆m pran kon pơlei hăm chăl hơrih, hơ-'nhăk teh đak hơtŏk tơ-iung tôm tơdrong, pran kơtang, păng tơtuh pơnăr păr kơjung hloh.

02. Tổng bí thư Nguyễn Phú Trọng lôch hơchăng

Năr 19/7/2024, Tổng Bí thư Nguyễn Phú Trọng lôch đơ̆ng rŏng khei ‘năr jĭ ăl hăm ƀĕnh jơhngâm đon ‘mêm kơ eng đơ̆ng đĭ đăng Đảng, đĭ đăng kon pơlei păng bôl boăl lơ̆m apŭng plenh teh. Nơ̆r pơre lơ̆m lêh pơdong Tổng Bí thư Nguyễn Phú Trọng tơƀôh hơdăh: “Jơhngâm đon tơchĕng đơ̆ng ƀok Nguyễn Phú Trọng hơnơ̆ng hue lăng truh tơ̆ kon pơlei, hue lăng truh tơ̆ kon bơngai, đĭ jơhngâm đon pơvih ăn Kon pơlei, pơjing kon bơngai ‘nao kiơ̆ xã hội chủ nghĩa păng hơnơ̆ng hơmet kơjăp tơdrong drơ̆ng pôm nơ̆r, blŭng a ‘nŏh jĭ tơguăt pôm nơ̆r lơ̆m Đảng, tơguăt đĭ đăng hơdrĕch hơdrung păng tơguăt hăm apŭng plenh teh ‘lơ̆ng hơiă”.

Lơ̆m tơdrong arih păng bơ̆ jang đơ̆ng Tổng Bí thư Nguyễn Phú Trọng tơƀôh hơdăh đon adrin ưh đei pơdơ̆h đơ̆ng bơngai cộng sản tơpăt ‘lơ̆ng, đĭ jơhnơr arih xa tơpăt ‘lơ̆ng, ưh đei pơ ang pơrŏ, mĭnh jơhngâm đon tôch găh tơdrong hŏk pơhrăm păng jang kiơ̆ jơhngâm đon ‘lơ̆ng đơ̆ng Ƀok Hô. Dôm kơjă kăp gĭt mă Tổng Bí thư Nguyễn Phú Trọng ‘măn ăn đei mĭnh anih jang chinh trĭ pran kơjăp, đon lui tôch hơđơ̆ng hăm jơhngâm pran đơ̆ng tơguăt hơdrĕch hơdrung gô ling lang jing tơmam kăp gĭt ăn Đảng, Teh đak păng Kon pơlei bơ̆n.

03 Tơdrong jang kăch mang bot 'lơ̆ng jơnŭm pơgơ̆r – tơdrong tơm lơ̆m vei pơgơ̆r kơ teh đak

Lơ̆m 7 sơnăm pơm kiơ̆ Tơchơ̆t 18-NQ/TW năr 25/10/2017 đơ̆ng Ƀan châ̆p hanh Trung ương jăl 12 gah tơplih 'nao, pơkăp jơnŭm jang chĭnh trĭ bot 'lơ̆ng, truh dang ei, bơ̆n hlôi đei iŏk minh ƀar tơdrong kăp gĭt. Mă lei, jơnŭm jang dơnơm adoi oei hơlơ̆k hơle, lơ tăl, lơ anih tơm; pơm jang tam mă tơnăp nhen tơdrong tơchơ̆t tơlĕch. Năr 25/11, tơ̆ hop akŏm Ƀan châ̆p hanh Trung ương jăl 13, Ƀok Tổng Bí thư Tô Lâm pơgơ̆r dôm jăl jang, anih jang đảng, rim anih jang hơdrol hloh noh đe kang ƀô̆ kơpal, bơngai chĕp kơ̆l pơgơ̆r athei yuk hơlau, kơchăng lơ̆m tơdrong pơm kiơ̆ sơnong jang đei pơjao kiơ̆ pơkăp "kơdâu rah pơtăng rah"; "Trung ương ưh đei gô dêh char, dêh char ưh đei gô apŭng, apŭng ưh đei gô tơring"; pơkăp keh đang tơdrong pơkăp pơm kiơ̆ Tơchơ̆t 18-NQ/TW păng tơroi hăm Ƀan châ̆p hanh Trung ương gah trong pơkăp, keh đang anih jang chĭnh trĭ lơ̆m Jăl 1 sơnăm 2025.

Tơdrong hơmet pơ-'lơ̆ng bot dôm anih jang jĭ minh tơdrong kăch mang athei đei tơdrong khĭn, plang tôm tơdrong đơ̆ng đe kang ƀô̆, bơngai jang, pơm kiơ̆ dôm tơdrong athei pơm mă hơtŏ hơnơ̆ng, gơh hơgei vă hơmet hơnhăk teh đak yak ah jơhnơr hơrih hơtŏk tơ-iung 'nao.

04 Mŭk drăm Việt Nam tŏk pran kơjăp, GDP tŏk dang 7%

Mŭk drăm teh đak Việt Nam oei hơnơ̆ng jang tŏk ‘lơ̆ng lơ̆m sơnăm 2024. GDP tŏk pơhlom dang 7%, kơjă tơmam tŏk đei găn hơla kơ 4%, lăp hăm tơdrong hơgăt đei tơlĕch. Akŏm đĭ đăng jên tĕch mơdro hăm teh đak đe tŏk vă jê̆ truh 800 ti USD, jên tĕch lơ hlŏh kơ jên răt vă jê̆ 23 ti USD, lơ hlŏh đơ̆ng sơ̆ truh dang ei. Sơng iŏk jên FDI đei hlŏh 31 ti USD, găh grŭp 15 teh đak oei vă tŏk pơdrŏng sơng iŏk jên FDI lơ hlŏh lơ̆m apŭng plenh teh.

Ƀât mă mŭk drăm apŭng plenh teh oei đei lơ tơdrong jur tŏk, tơdrong jang tŏk âu ưh lăp jing tơdrong ‘lơ̆ng ăn tơdrong jang tŏk lơ̆m sơnăm 2025 đĕch mă oei ăn ƀôh tơdrong jang tŏk hrĕnh đơ̆ng mŭk drăm teh đak Việt Nam dơ̆ng.

05 Keh đang dôm kơchư̆k pơgơ̆r kơ Đảng păng Teh đak, pơtoi “ưh đei tơring kâ̆m” lơ̆m sek tơlang kang ƀô̆ pơm yoch

Sơnăm 2024, tơdrong jang pơkăp bơngai jang kơpal ăn kơ Đảng păng Teh đak đei pơgơ̆r hăm tơdrong drơ̆ng nơ̆r kơjung hloh, yak truh tơchơ̆t hơtŏk pơ-'lơ̆ng đe kơdră jang vei lăng teh đak, vei sơđơ̆ng tơdrong hơtŏk tơ-iung. Hop akŏm Ƀan châ̆p hanh Trung ương Đảng Cộng sản Việt Nam jăl 13 hlôi pơkăp, hăm kơsô̆ kơphĭu lơ hloh, pôk ƀok Tô Lâm, jang lơ̆m Anih tơm Chĭn trĭ, Kơdră teh đak iŏk jang kơchư̆k Tổng Bí thư. Kuôk hô̆i jăl 15 hlôi pôk Kơdră Kuôk hô̆i Trần Thanh Mẫn păng Kơdră teh đak Lương Cường, atŭm hăm noh adoi keh đang dôm kơchư̆k pơgơ̆r tơ̆ Kuôk hô̆i, Jơnŭm pơgơ̆r teh đak păng rim anih jang tư phap.

Tơdrong jang hơmet pơ-'lơ̆ng Đảng păng jang tơjră xa pơjĭp, kơnê̆ pơtoi jing sơnong jang tơm lơ̆m sơnăm 2024. Lơ kang ƀô̆ kơpal kơ Đảng, Teh đak hlôi ƀơm kih luơ̆t, sek tơlang yuơ pơm yoch, ăn ƀôh tơchơ̆t “ưh đei tơring kâ̆m, ưh đei lon kơ bu”, thơƀôh tơdrong pơkăp khŏm mă pơjing minh jơnŭm jang chĭn trĭ hlăng rơgoh, pran kơtang.

06 ‘Mi kial kơsô̆ 3 pơm tơlĕch hiong răm tôch lơ găh bơngai păng tơmam drăm tơ̆ tơring găh Tu

‘Mi kial kơsô̆ 3 (‘mi kial Yagi) ‘nŏh jĭ ‘mi kial hơbŭt hơbang dêh hlŏh lơ̆m dang 30 sơnăm âu ki tơ̆ tơring đak dơsĭ Biển Đông, tơhlu mât tơ̆ tơring găh Tu teh đak bơ̆n ‘năr 7/9/2024 hăm kơsư̆k kial tak jăng hloh 17, pơm tơlĕch hiong răm tôch dêh. Kial hơbut păng ‘mi kial pơm tơlĕch ‘mi tih, đak tơjroh, teh hơlih tơ̆ lơ tơring, pơm ăn 323 ‘nu bơngai lôch, 22 ‘nu bơngai hiong hơkâu păng 1.978 ‘nu bơngai rơka, hiong răm găh tơmam drăm pơhlom năng hlŏh 81.700 ti hlak jên.

Khul kơdră teh đak kơchăng pơtho tơƀôh, tơlĕch trong tơjră đơ̆ng hrôih, đơ̆ng hơtăih, mă tơtom, khŏm tang găn ‘lơ̆ng ‘mi kial; tơlĕch dôm tơdrong tơchơ̆t gĭt kăl vă hơmet pơ ‘lơ̆ng hiong răm, vei lăng ‘lơ̆ng anih jang, trong nơnăm păng pơm ‘lơ̆ng ăn tơdrong arih xa kơ kon pơlei đơ̆ng rŏng kơ ‘mi kial. Lơ̆m khei ‘năr đei tơdrong sar bar, jơhngâm đon “hla ‘lơ̆ng bơ̆ng ăn hla hiăh” đơ̆ng hơdrĕch Việt Nam đei tơiung dơ̆ng tôch pran. Dôm tơdrong jang dŏng tơgŭm đei tơ̆ jơ̆p tơring lơ̆m teh đak, tơtom tơgŭm ăn kon pơlei tơ̆ tơring ‘mi kial hơbŭt yak hlŏh pơmat tat, vei lăng ‘lơ̆ng tơdrong arih xa.

07 Hơtŏk ming man trong nơnăm păng jang unh hơyuh đơ̆ng dôm tơdrong jang dơnơm

Sơnăm 2024, dôm tơchơ̆t jang dơnơm gah trong nơnăm păng jang unh hơyuh hlôi păng tŏk bŏk pơm trong ăn hơtŏk mŭk drăm, vei sơđơ̆ng unh hơyuh kơjăp, sơkơ̆t hơdah trong tơlĕch jang hơtŏk tơ-iung kơjăp kơ teh đak. Truh dang ei,  hloh 2.000 km trong tih hlôi đei tơmơ̆t yua păng hơdrin keh đang 3.000 km trong tih kơdâu renh lơ̆m sơnăm 2025. Tơdrong jang dui tơlei unh hơyuh  500kV jăl 3 Quảng Trạch - Phố Nối hlôi iŏk yua. Ah 'măng hop akŏm mă 8, Kuôk hô̆i jăl 15 hơlen tơchơ̆t gah asong ming man trong gre treng kơdâu renh Tu – Pơbah, keh đang tơchơ̆t tơm ah sơnăm 2035.

Kuôk hô̆i adoi tơchơ̆t iŏk jang dơ̆ng anih pơm tơlĕch unh hơyuh hat nhơ̆n Ninh Thuận, vă vei sơđơ̆ng unh hơyuh păng sơkơ̆t truh tơdrong pơkăp tơpăr hơyuh 'mê̆ hăm kơsô̆ 0 ah sơnăm 2050. Hăm tơdrong ming man cham gre păr Long Thành, Kuôk hô̆i drơ̆ng nơ̆r jăl 1 asong man 2 trong păr tŏk jur gah Tu păng minh hnam jong tơmoi atŭm hăm dôm tơdrong kăl nai hăm pơkăp sơng đei 25 triu tơmoi lơ̆m minh sơnăm, 1,2 triu tâ̆n tơmam drăm lơ̆m minh sơnăm.

08 Tơplih ‘nao đon tơchĕng găh chih pơjing luơ̆t păng dôm tơdrong tơchơ̆t gĭt kăl

Kuôk hô̆i jăl XV ‘măn đei lơ tơdrong ‘lơ̆ng lơ̆m sơnăm 2024 hăm lơ tơdrong gĭt kăl tơplih ‘nao mưh chih pơjing luơ̆t păng sek tơlang dôm tơdrong tih kơ teh đak. Hăm 2 ‘măng hop akŏm kiơ̆ khei ‘năr păng 2 ‘măng hop akŏm ưh ê lơ̆m sơnăm 2024, Quốc hội jăl XV hơlen năng păng tơchơ̆t lơ tơdrong gĭt kăl ƀơm truh tơdrong chih pơjing luơ̆t, dăr hơlen păng tơchơ̆t ăn dôm tơdrong tih, gĭt kăl kơ teh đak. 18 luơ̆t păng 21 tơdrong tơchơ̆t hlôi đei drơ̆ng nơ̆r, đei hloi dôm tơdrong tơchơ̆t tih nhen asong ăn Luơ̆t Teh, Luơ̆t Hnam oei păng Luơ̆t tĕch mơdro teh, hnam oei đei yoa hrôih ƀiơ̆ hlŏh 5 khei, đơ̆ng 1/8/2024.

Dôm khôi luơ̆t đei hơmet ming tôch gĭt kăl nhen Luơ̆t tơmât jên jang, Luơ̆t Tơmât jên jang kơ teh đak păng Luơ̆t tơproh jang đei drơ̆ng nơ̆r vă hơmet pơ 'lơ̆ng dôm tơdrong tơhlăk găh trong pơgơ̆r jang, tưk tơiung tơdrong klăih song hơnăp jang păng pơklăih jơhngâm ăn tơdrong jang xa. Hăm jơhngâm đon tơplih 'nao, hŭt lê̆ hloi đon tơchĕng “ưh kĕ vei lăng 'nŏh kâm”, Quốc hội chih pơjing luơ̆t pơih trong ăn dôm tơdrong jang 'nao, pơlung đon pơcheh rơgei păng hơtŏk jơhngâm pran, pơih trong ăn tơdrong jang tŏk pran kơjăp kơ teh đak lơ̆m chăl 'nao.

09 Jơ̆p teh đak atŭm jơhngơ̆m sut lê̆ hnam hyah, hnam pơgia

Năr 5/10/2024, Jơnŭm pơgơ̆r teh đak păng Khul Kơdră Anih jang Trung ương Măt trâ̆n tôh kuôk Việt Nam hlôi pơgơ̆r Tơdrong jang tơgŭm sut lê̆ hnam hyah, hnam pơgia lơ̆m jơ̆p teh đak hăm hơnăn “Bơbŭng hnam tơnŏ ăn kon pơlei inh”. Thủ tướng teh đak bơ̆n Phạm Minh Chính krao hơvơn "Bu đei yă kiơ tơgop mă noh, bu đei jơhngơ̆m tơgop jơhngơ̆m, bu đei mŭk tơgop mŭk, bu đei lơ tơgop lơ, bu đei tŏ sĕt tơgop tŏ sĕt" hăm pơkăp keh đang tơdrong jang sut lê̆ 153.000 hnam pơgia, hnam hyah hyok lơ̆m jơ̆p teh đak hơdrol kơ năr 31/12/2025.

Thủ tướng teh đak pơgơ̆r rim anih jang tơm, Anih jang vei lăng kon pơlei dêh char, pơlei tơm lơ̆m Trung ương akŏm pơgơ̆r jang tơnăp păng tơguăt sơnong jang kơ bơngai chĕp pơgơ̆r lơ̆m tơdrong hơmet pơ-'lơ̆ng, jang đei jơnei dôm tơdrong jang tơgŭm hnam oei ăn bơngai tơgŭm jơhngơ̆m ăn kăch mang, unh hnam hin dơnuh, tơjê̆ hin dơnuh, chih akŏm tơdrong jang hơdah vă pơgơ̆r jang đei jơnei, tơgop pơm jang đei jơnei tơchơ̆t sut lê̆ hnam pơgia, hnam hyah hyok lơ̆m jơ̆p teh đak.

10 Tơdrong tĕch mơdro teh, hnam păng măih jur tŏk tôch dêh

Sơnăm 2024 jĭ 1 sơnăm đei lơ tơdrong jur tŏk tơ̆ anih tĕch mơdro teh, hnam păng măih kơ teh đak Việt Nam. Yă hnam tŏk tôch dêh, lơ hlŏh tôch lơ jên khei bơngai jang, pơm tơlĕch tơdrong ưh hơtŏ găh kơjă tơmam păng tơdrong kĕ răt đơ̆ng kon pơlei. Anih tĕch mơdro măih kŭm ƀôh yă tŏk hlŏh tơdrong, yoa ƀơm ưh ‘lơ̆ng đơ̆ng yă măih lơ̆m apŭng plenh teh.

Dôm tơdrong jur tŏk kơpal athei đei 1 trong jang vei lăng mă ‘lơ̆ng ƀiơ̆, hue lăng truh dôm tơdrong răt mong akŏm vă gô yă tŏk, pơlung tơmât jên jang đunh đai păng pơm ‘lơ̆ng ăn tơdrong jang tŏk, lăp hăm tơdrong đei yoa ăn kon pơlei păng anih jang mŭk drăm.