01. Hop akŏm vei lăng sơđơ̆ng pơyua ăn hơtŏk tơiung mŭk drăm - tơpôl dôm dêh char Tây Nguyên 2024 tơ̆ Lâm Đồng

‘Năr 25/8/2024, tơ̆ pơlei tơm Đà Lạt, dêh char Lâm Đồng, Thủ tướng Phạm Minh Chính pơgơ̆r hop akŏm vei lăng sơđơ̆ng pơyua ăn hơtŏk tơiung mŭk drăm - tơpôl dôm dêh char Tây Nguyên. Hop akŏm pơma dơnuh găh tơdrong vei kơjăp sơđơ̆ng vă pơtrŭt hơtŏk tơiung mŭk drăm - tơpôl lơ̆m tơring.

Pơtôch tơ̆ hop akŏm, Thủ tướng Phạm Minh Chính pơma hơdăh, Tây Nguyên jĭ tơring gĭt kăl găh mŭk drăm, chĭnh trĭ, sơđơ̆ng, khŭl lĭnh păng cham char bri brăh kơ teh đak. Đảng, Teh đak, dôm Tổng Bí thư kiơ̆ rim jơhnơr ling lang bơ̆t truh, ‘măn tơdrong ‘mêm tôch kơ gĭt kăl hăm tơdrong hơtŏk tơiung păng sơđơ̆ng kơ Tây Nguyên. Thủ tướng teh đak pơma hơdăh, kăl hloh ‘noh jĭ kon pơlei athei đei tơdrong hơrih sa phĭ tơnŏ; tơm dơnơm đơ̆ng vei lăng sơđơ̆ng ‘noh jĭ tơdrong hơrih sa mŭk drăm, jơhngơ̆m đon kơ kon pơlei ưh kơ đei pơdơh đei tơplih ‘lơ̆ng.

Thủ tướng Phạm Minh Chính athei akŏm bơ̆jang kiơ̆ 6 hơnăp jang tơm, vei kơjăp tơdrong sơđơ̆ng Tây Nguyên vă pơyua ăn hơtŏk tơiung mŭk drăm - tơpôl; hơmet pơ ‘lơ̆ng tơdrong teh oei, teh choh jang sa; hơdrin sut hnam pơgia, hnam hiăh hiot ưh kơ lê̆ bu đei hŭt lê̆ tơ̆ rŏng; hơmet pơ ‘lơ̆ng tơdrong năm mơ̆t oei kư̆ kă; tơgŭm tơchă ăn tơdrong jang; tơplih tơdrong jang ăn kon pơlei kon kông.

02. Tơbăt hơdăh pơprŏ Tơring Tây Nguyên jăl 2021-2030, lăng truh sơnăm 2050

Năr 23/6/2024, tơ̆ pơlei tơm Đà Lạt, dêh char Lâm Đồng, Kơ iĕng Thủ tướng Teh đak Trần Lưu Quang pơm tơm Hop akŏm Jơnum chĕp pơgơr tơring Tây Nguyên ‘măng mă pêng păng tơbăt hơdăh trong pơprŏ jang Tơring Tây Nguyên jăl 2021-2030, lăng truh sơnăm 2050.

Tơ̆ Hop akŏm, Kơdră chĕp pơgơ̆r 5 dêh char Tây Nguyên hlôi tơroi tơbăt tơdrong jang kiơ̆ Tơdrong tơchơ̆t kơsô̆ 23-NQ/TW găh atŏk tơ iung mŭk drăm-tơpôl păng sơđơ̆ng teh đak, sơđơ̆ng tơring Tây Nguyên truh sơnăm 2030, lăng truh sơnăm 2045. Dôm nơ̆r tơgop akhan, đơ̆ng rŏng hloh 1 sơnăm jang kiơ̆ Tơdrong tơchơ̆t, tơdrong hlôh vao kơ rim hơnih bơ̆ jang, mă kăl rim dêh char lơ̆m tơring roi năr roi tŏk kơtang; lơ tơdrong tơhlăk tơhlĭn hăm atŏk tơ iung roi năr roi hơmet pơ ‘lơ̆ng, tơdrong đei, rơvơn kơ tơring păng rim dêh char lơ̆m tơring tŏk bŏk tơlĕch jang kiơ̆ ‘lơ̆ng; iŏk đei jơnei hơ iă, tôch tôm tong lơ̆m rim tơdrong jang.

Pơma pơtôch Hop akŏm, Kơ iĕng Thủ tướng Trần Lưu Quang, athei tơring Tây Nguyên hơnơ̆ng vei kơjăp tơdrong oei sa joh ayŏ joăt joe hơdrĕch hơdrung, vei kơjăp tơgoăt tơgăl pôm nơ̆r ƀơ̆r đon; hơnơ̆ng tơplih ‘nao jơhngơ̆m đon lơ̆m atŏk tơ iung. Atŭm hăm ‘noh, lăng kơjăp atŏk tơ iung trong nơnăm tơƀưh dih băl; atŏk tơ iung tơmang pơhiơ̆ kiơ̆ khul; tơbăt dih băl lơ̆m hơvơn tơmơ̆t jên jang, pơjing hơyak pran, tơdrong lui yom kơ kon pơlei, hơnih mơdro sa.

03. Mŭk drăm, tơpôl kơ dôm dêh char lơ̆m tơring Tây Nguyên iŏk đei dôm jơnei ‘lơ̆ng hơiă sơnăm 2024

Sơnăm 2024, dôm dêh char lơ̆m tơring Tây Nguyên iŏk đei dôm jơnei ‘lơ̆ng hơiă; lơ tơdrong hơgăt jing hơnih hơdăh lơ̆m hla kak hơmet ming mŭk drăm tơring; dôm tơdrong jang joh ayŏ, tơpôl, khŭl lĭnh, sơđơ̆ng tơpôl đei vei kơjăp. Dơ̆ng hơdrol ‘noh Kon Tum, jang tŏk GRDP jô̆ pơhlom đei 8,2% pơting hăm khei ‘nâu sơnăm sơ̆; dơ̆ng tơ̆ tŏk bŏk lơ̆m kơƀang chih pơrĕng muưk drăm tŏk kơ lơ̆m teh đak. Akŏp tơmam lơ̆m tơring đei hloh 38.000 ti hlak jên, jên tĕch tơmam tơ̆ teh đak đe hloh  406 triệu USD, tŏk hloh 13 % pơting hăm sơnăm sơ̆. Đang kơ ‘noh jĭ dêh char Đắk Nông, hăm 7/11 grŭp hơgăt jang đang păng hloh trong tơlĕch jang. Mă loi ‘noh, iŏk yua jô̆ păh lăp kơ̆l bơngai kơ dêh char đei hloh 81 triệu hlak jên. ‘Nâu jĭ tŏk lơ, tơgŭm Đắk Nông tŏk dơ̆ng mă 43 lơ̆m kơsô̆ 63 dêh char, pơlei tơm lơ̆m teh đak.

Sơnăm 2024, tơdrong hơiă tơ̆ dêh char Gia Lai ‘noh jĭ kơsô̆ ŭnh hnam dơnuh hin jur hloh 6% yak hloh pơting hăm trong jang tơlĕch ăn. Thu mong jên jang lơ̆m tơring dang 5.890 ti hlak jên, yak hloh kơsô̆ đơ̆ng Trung ương păng Jơnŭm pơgơ̆r dêh char pơjao, tŏk vă jê̆ 5,1% pơting hăm sơnăm sơ̆. Lơ̆m kơ plăh ‘noh, dêh char Đắk Lắk đei 12/16 tơdrong hơgăt iŏk đei păng yak truh trong tơlĕch jang. Lơ̆m noh, thu mong jên jang jô̆ pơhlom đei 8.500 ti hlak jên, GRDP jô̆ păh lăp kơ̆l bơngai pơhlom iŏk đei 72,8 triệu hlak jên, akŏp jên tĕch tơmam tơ̆ teh đak đe jô̆ pơhlom đei 1 ti  650 triệu USD. ‘Ngoăih kơ ‘noh, Đắk Lắk hlôi tơlĕch jang kiơ̆ tơtom, hrơ̆ch 1 ‘măng, đei yua tơdrong jang sut hnam pơgia, pơjao 1.500 tŏ hnam tơgŭm ăn ŭnh hnam dơnuh hin, mơmat tat găh hnam oei, ŭnh hnam teh đak tơgŭm, kon pơlei kon kông.

04. Hơnih tơm Kŏng ang tơlĕch jang ming man pôk ăn 1.200 pơbŭng hnam tơgŭm ăn bơngai dơnuh tơ̆ Dak Lăk.

Sơnăm 2024,  Hơnih tơm Kŏng ang hlôi pơgơ̆r Pơm lêh ming man, pơjao rup pơm hnam păng kon jên tơgŭm djru tơ iung pơjing 1.200 pơbŭng hnam ăn bơngai dơnuh, bơngai kon kông, ŭnh hnam đei iŏk yua ăn teh đak, ŭnh hnam tơnap tap găh hnam oei lơ̆m dêh char Dak Lăk. Hăm hơnăp jang kơtang atŭm hăm vang iung jang đơ̆ng kŏng ang dêh char Dak Lăk păng kơdră tơring, 1.200 pơbŭng hnam hlôi ming man keh đang lơm hơtuch khei 7/2024, keh đang hloh khei ‘năr pơjao 3 khei.

Đại tướng Lương Tam Quang-Kơdră chĕp pơgơ̆r Hơnih tơm Kŏng ang tơbăt, 1.200 pơbŭng hnam pôk ăn ŭnh hnam tơnap tap tơ̆ Dak Lăk đei ming man keh đang hơdrol khei ‘năr pơjao tơƀôh hơdăh jơhngơ̆m đon iung jang tơnăp đơ̆ng khul kŏng ang, rim hơnih jang lơ̆m tơring; tơdrong vang iung jang đơ̆ng lơ hơnih mơdro sa lơ̆m jang kiơ̆ vei lăng năng tông tơdrong hơrih sa tơpôl. Kiơ̆ đơ̆ng Đại tướng Lương Tam Quang-Kơdră chĕp pơgơ̆r Hơnih tơm Kŏng ang gô hơnơ̆ng pơm yŭk yŭk trong hơlou lơ̆m jang kiơ̆ tơdrong jang “Pơđĭ lơ̆m teh đak vang iung jang xut hut hnam pơgia, hnam hyăh hyok, hnăt hnot lơ̆m teh đak” vă ưh kơ lê̆ bơngai bu hơchăng hŭt tơ̆ rŏng; tơgop jang keh đang trong tơlĕch jang xut xa 153.000 pơbŭng hnam pơgia, hnam hyăh hyok lơm teh đak, mă kăl tơ̆ tơring hơtăih yăih, mơmat tat, lơ̆m ou đei tơring Tây Nguyên.

05. Dak Lăk pơgơ̆r Pơm lêh tơbăt 120 sơnăm Năr pơjing dêh char

Năr 22/11/2024, tơ̆ Cham să Mồng 10 tháng 3, Pơlei tơm Buôn Ma Thuột hlôi pơgơ̆r Pơm lêh tơbăt 120 sơnăm Năr pơjing dêh char Dak Lăk.

Yak hloh 120 sơnăm pơjing păng atŏk tơ iung, truh dang ei Dak Lăk hlôi jing dêh char đei ƀôh hloh kơ tơring Tŏk bŏk-Tây Nguyên; Tơdrong jang mŭk drăm vei kơjăp tŏk tơ iung kơtang; kơjă tơmam drăm lơ̆m dêh char dơ̆ng hơlou lơ̆m tơring Tây Nguyên.

Vang năm păng iung pơma tơ̆ jơ pơm lêh, Kơ iĕng Thủ tướng Teh đak Nguyễn Hòa Bình hmach chơt hơ iă, hôn bơnê kơtang dôm tơdrong hơdrin, tơdrong iŏk đei jơnei mă Đang ƀô̆, Khul kơdră chĕp pơgơ̆r, Ƀô̆ đô̆i kŏng ang păng kon pơlei dêh char Dak Lăk hlôi iŏk đei. Vă atŏk tơ iung kơjăp ‘lơ̆ng, tơgăl hăm hơnih dơ̆ng tơm păng hơnih pơtrŭt kơtang kơ tơring Tây Nguyên, dêh char Dak Lăk kăl hơnơ̆ng jang kiơ̆ kơjăp nơ̆r pơrô̆ jang đơ̆ng Trung ương, tơlĕch trong jang trŏ lăp ‘moi kiơ̆ dôm tơdrong lơ̆m Tơdrong tơchơ̆t Hop akom tih kơ Đảng rim hơnih, Nơ̆r pơma pơtôch kơsô̆ 67 păng Tơdrong tơchơ̆t kơsô̆ 23 kơ Hơnih tơm Chinh trĭ, Tơdrong tơchơ̆t kơsô̆ 72 đơ̆ng Kuô̆k hô̆i păng Tơdrong tơchơ̆t 1747 kơ Thủ tướng teh đak kĭ pơkăp trong pơprŏ jang dêh char Dak Lăk, hơdrin jang keh kong trong tơlĕch jang truh sơnăm 2050 Dak Lăk “jing dêh char đei cham char, tơdrong oei sa ‘lơng rŏ, tơgoăt tơchăr hơgei, jing hơnih truh ‘lơ̆ng liĕm, kăl hăm hơrih sa”.

06. Lêh tơbăt 20 sơnăm Năr pơjing dơ̆ng dêh char Đắk Nông păng sơng iŏk Mê đai Rơngei hiôk hian mă Mônh

‘Năr 23/3/2024, dêh char Đắk Nông tơbăt 20 sơnăm năr pơjing dơ̆ng păng sơng iŏk Mê đai Rơngei hiôk hian mă Mônh.

Đơ̆ng rŏng 20 sơnăm pơjing păng hơtŏk tơiung, Đắk Nông iŏk đei lơ jơnei gĭt kăl păng tôm tơdrong, klăih đơ̆ng tơdrong 1 dêh char dơnuh hin. Mŭk drăm tŏk ling lang đei kơsô̆ lơ, akŏp tơmam hloh 12 ‘măng; akŏp jên tơmơ̆t jang hơtŏk tơiung lơ̆m tơpôl hloh 20 ‘măng năr blŭng pơjing dơ̆ng. Akŏm tơplih ‘lơ̆ng hơnih tơmơ̆t jên jang tĕch mơdro, tơdrong jang tơmơ̆t jên jang hơtŏk tơiung anih jang kăl, rơih iŏk ƀlep dôm tơdrong jang tŏk, Đắk Nông hlôi păng tŏk bŏk jing hơnih truh sơng đei lơ bơngai tơmơ̆t jên jang lơ̆m păng ‘ngoăih teh đak. Um ai anih kơdrơ̆m, tơring tơrang tơplih ‘lơ̆ng pran kơtang, ƀĕnh tơdrong hơrih ‘nao păng hơpơi ‘meh yak tŏk, pơ kă jing tơdrong ‘lơ̆ng jang tŏk ‘nao kơ tơring Tây Nguyên păng pơđĭ lơ̆m teh đak. Truh sơnăm 2030, Đắk Nông hơdrin jing dêh char hơtŏk tơiung ‘lơ̆ng kơ tơring Tây Nguyên; jing hơnih jang kơmăy kơmŏk bô xít -alumin-nhôm kơ teh đak, hơnih jang ŭnh hơyuh rơgoh kơ tơring; hơtŏk tơiung choh jang sa iŏk yua kơmăy kơmŏk ‘nao, jang hơdai kiơ̆ kơjă tơklep hăm anih tĕch mơdro.

07. Festival pơkao Đà Lạt ‘măng mă 10, hăm hơnăn “Pơkao Đà Lạt - Ƀrông ƀrang ‘lơ̆ng liĕm”

Đơ̆ng năr 5 truh năr 31/12/2024 pơgơ̆r Festival pơkao Đà Lạt ‘măng mă 10, hăm hơnăn “Pơkao Đà Lạt - Ƀrông ƀrang ‘lơ̆ng liĕm”.

Đà Lạt ‘noh pơlei tơm Festival Pơkao kơ Việt Nam, jĭ tơdrong pơgơ̆r kăl kơ pơlei tơm groi kông ‘lơ̆ng iĕm, pơlei tơm tơchăr lơ̆m tơdrong Tơdra hơri kơ UNESCO păng jĭ pơlei tơm găh “Khul 5 pơlei tơm Festival ‘lơ̆ng rŏ hloh kơ Châu Á”. Festival pơkao Đà Lạt hơnơ̆ng pôk pơ ư dôm tơdrong ‘lơ̆ng liĕm kơ pơkao păng tơdrong jang pơtăm pơkao; pơjing rơvơn vă tơdrong jang pơkao Đà Lạt tơgoăt, lang să, atŏk tơ iung tơdrong jang tơmang pơhiơ̆, kmăi kmŏk joh ayŏ păng vang mơ̆t hơdoi apŭng plĕnh teh.

Iung pơma tơ̆ Pơm lêh pơgơ̆r blŭng a, Kơ iĕng Thủ tướng teh đak Nguyễn Hòa Bình hôn bơnê kơtang dôm tơdrong hơdrin păng iŏk đei jơnei mă Đang ƀô̆, khul kơdră păng kon pơlei dêh char Lâm Đồng, pơlei tơm Đà Lạt hlôi iŏk đei lơ̆m dôm sơnăm ou ki. Adoi pơkă lơ̆m khei năr kơnh, dêh char kăl hơnơ̆ng lăng ba kơjăp truh bơ̆ jang vei lăng ‘lơ̆ng cham char, lăng kơjăp truh jang kmăi kmŏk lơ̆m choh jang sa, rơih pơjing, răt tơmơ̆t dôm hơdrĕch pơkao ‘lơ̆ng, gĭt kăl, trŏ lăp hăm tơdrong ‘meh vă răt iŏk vă pơm hơtŏk tơdrong pơjei păng atŏk tơ iung tơdrong jang pơkao kơjăp ‘lơ̆ng; pơtrŭt rim tơdrong jang hơdoi, tơgoăt jang hơdoi ƀar păh hơnih mơdro sa hăm bơngai jang pơtăm pơkao, vei lăng păng atŏk tơ iung hơnăn vă mơ̆t hơdoi tĕch mơdro tơ̆ teh đak đe.

08. Lêh Sầu riêng Krông Pắch ‘măng mă II  hăm hơnăn “Sầu riêng Krông Pắch: Hơtŏk tơiung păng mơ̆t jang hơdai” jơnei ang hơdăh

Lêh Sầu riêng Krông Pắch ‘măng mă II hăm hơnăn “Sầu riêng Krông Pắch: Hơtŏk tơiung păng mơ̆t jang hơdai” pơgơ̆r đơ̆ng ‘năr 31/8 truh 2/9/2024, hăm 12 tơdrong jang tơpă hlôi hơnhăk ăn lơ tơdrong hơiă hăm tơpôl.

Lêh hlôi sơng dang 200.000 ‘nu kon pơlei, tơmoi lơ̆m, ‘ngoăih dêh char păng apŭng plĕnh teh truh vang akŏm lêh păng hlôi hơnhăk ăn tơdrong ‘lơ̆ng hơiă. Lêh kŭm sơng đei hloh 350 kơdeng tơmam đơ̆ng dôm anih mơdro sa, hơp tak xăh, anih pơm tơlĕch - tĕch mơdro dôm tơmam sầu riêng, tơmam OCOP păng choh jang sa ‘lơ̆ng, tơmam tơgŭm choh jang sa... tơ̆ lơ̆m păng ‘ngoăih dêh char, tơgop roi tơƀôh lơ tơmam, dôm kơloăi plei ‘long ‘lơ̆ng kơ tơring.

Tơ̆ hop akŏm Pơjing păng hơtŏk tơiung sầu riêng kơjăp hlôi pơgơ̆r jơnei chă bơngai răt măk hloh 3 tŏ plei “Sầu riêng tôch kơ ‘lơ̆ng”, hăm kơsô̆ jên hloh 2,8 ti hlak jên. Pơđĭ kơsô̆ jên âu đei yua vă jang tơdrong jang vei sơđơ̆ng tơpôl, pơhrăm, tơgŭm kon pơlei pơtăm Krông Pắc găh ki thuơ̆t pơtăm, vei lăng sầu riêng vă hơtŏk ‘lơ̆ng, kơjă kăp gĭt kơ plei sâu riêng trŏ lăp hăm ‘meh vă tĕch tơ̆ teh đak đe.

09. Lơ lêh đei tơdrong hơiă joh ayŏ dôm hơdrĕch kon kông Tây Nguyên

Giĕng lêh Joh ayŏ - Tơplŏng kơdâu - Tơmang lăng ‘măng mă V păng pơgơ̆r tôn chĭng chêng, hơsoang dôm hơdrĕch kon kông dêh char Kon Tum ‘măng mă II hăm hơnăn “Vă kơbăt joh ayŏ - Chă lăng cham char bri brăh” pơgơ̆r đơ̆ng ‘năr 11 truh 14/12/2024.

Giĕng lêh joh ayŏ - tơmang lăng ‘măng mă V păng pơlong tôn chĭng chêng, hơsoang dôm hơdrĕch kon kông dêh char Kon Tum ‘măng mă II sơnăm 2024 đei hloh 1.000 ‘nu nghệ nhân, bơngai hơri hơsoang kơ 10 apŭng, pơlei tơm kơ dêh char Kon Tum, hŏk tro đơ̆ng teh đak Lào, Campuchia hŏk păng nghệ sĩ dêh char An Giang vang akŏm. Tơ̆ âu hlôi pơgơ̆r lơ tơdrong jang pơm hơnih tơƀơ̆p, pơgơ̆r joh ayŏ đơ̆ng dôm nghệ nhân, nghệ sỹ; pôk pơ ư, roi tơƀôh găh joh ayŏ - kon bơngai Kon Tum....

Giĕng lêh Pơkao dur yuăn - kông ŭnh Đang Ya sơnăm 2024 đei Anih vei lăng kon pơlei dêh char Gia Lai pơgơ̆r đơ̆ng ‘năr 6 truh ‘năr 12/11/2024, hăm lơ tơdrong jang joh ayŏ, kơdŏ soang, tơplŏng kơdâu ‘lơ̆ng hơiă nhen: Tơdrong joh ayŏ hơsoang "Hơri hơsoang Pơkao dur yuăn - Kông Đang Ya sơnăm 2024"; tôn chĭng chêng, hơsoang kră sơ̆; pơgơ̆r tanh sĭt bơ̆n rĕo, kơđum kơđŏng, tanh brai vai khăn, pơm bơ̆n tĭng nĭng, chĭng klơk, chrăih mul meo; pơdă tơƀôh tơmam joh ayŏ ‘lơ̆ng hơdrô̆ kơ dôm hơdrĕch kon kông; pơm dơ̆ng et jur sa kơ bơngai Ba Na; pơlong tŏk tơ̆ kông ŭnh Đang Ya hăm kơdâu păng tŏk kông; tơ păr khinh khí cầu; pơlong Half Marathon 2024 “Tơiung tơring pơlei Chư Păh - tơdrong jang tơgoăt Kông păng pơkao”...

‘Năr 26/12, tơ̆ pơlei tơm Gia Nghĩa, Anih vei lăng kon pơlei dêh char Đắk Nông pơgơ̆r lêh sơng iŏk hơnăn Groi teh gĭt kăl jơ̆p plei teh UNESCO Đắk Nông ‘măng mă 2. Đei hơnăn ‘noh "Tơring kơ dôm tơdra hơri hơsoang”, Groi teh kăp gĭt jơ̆p plei teh UNESCO Đắk Nông hlôi tơƀôh hơdăh anih dơ̆ng lơ̆m hla kak kăp gĭt jơ̆p plei teh, tơgop pôk pơ ư dôm tơdrong kăp gĭt đơ̆ng teh, joh ayŏ păng cham char bri brăh ‘lơ̆ng hơiă kơ tơring teh Tây Nguyên. 

10. Rơ-ông rơ-ang bơ̆ jang pơtrŭt mơdro sa tơ̆ rim dêh char lơ̆m tơring Tây Nguyên

Sơnăm 2024, tơ̆ rim dêh char lơ̆m tơring Tây Nguyên pơgơ̆r lơ tơdrong pơtrŭt mơdro sa.

Đơ̆ng năr 6-12/9/2024, Hơnih Pơtrŭt mơdro sa găh Hơnih tơm vei lăng Mơdro sa iung jang hơdoi hăm Hơnih vei lăng Mơdro sa dêh char Kon Tum pơgơ̆r ,Jơnŭm kơchơ Mơdro sa tơring Tây Nguyên tơ̆ pơlei tơm Kon Tum, hơvơn đei 250 hơdrơ̆r tơmam drăm kơ 110 hơnih mơdro sa lơ̆m teh đak păng teh đak đe vang tơƀôh tơbăt tơmam drăm choh jang sa ‘lơ̆ng, tơmam drăm OCOP, tơmam drăm kăl kơ tơring tơrang. 

Năr 23/8/2024 tơ̆ Lâm Đồng hlôi pơgơ̆r hop akŏm tơgoăt mơdro sa păng tơmơ̆t jên jang ƀar păh Hơnih mơdro sa Lâm Đồng hăm hơnih mơdro sa pơlei tơm Hồ Chí Minh. Rim bơngai tang măt hlôi tơroi tơbăt kơtơ̆ng ang, tơchă hơnih tech răt păng tơchă khul jang hơdoi tơgoăt mơdro sa-tơmơ̆t jên jang. Hlôi đei 12 hơnih mơdro sa, hơp tak xah kơ dêh char Lâm Đồng kĭ pơkăp hăm rim hơnih mơdro sa kơ pơlei tơm Hồ Chí Minh.

Đơ̆ng năr 23 truh năr 24/9/2024 tơ̆ pơlei tơm Buôn Ma Thuột, Năr lêh pơjing tơdrong jang tơplih tơchăr dêh char Dak Lăk sơnăm 2024, hăm lơ tơdrong pơgơ̆r nhen: pơdă tơƀpôh tơdrong vă jang, tơmam drăm pơm tơlĕch, tơmam drăm OCOP, tơmam drăm choh jang sa ‘lơ̆ng, tơmam drăm tơgŭm ăn tơmang pơghiơ̆ tơring; Hop akŏm pơtrŭt hơnih mơdro sa Dak Lăk pơjing tơdrong jang, tơplih ‘nao tơchăr păng atŏk tơ iung kơjăp ‘lơ̆ng.