Jô̆ truh tong hơnê̆ khei 2/2025, hlôi đei 15 kang ƀô̆ lơ̆m Anih jang Tĭnh uy Kon Tum vei lăng apinh pơdơh hưu hơdrol kơ sơnăm pơkăp. Lơ̆m kơsô̆ noh đei ƀok Nguyễn Trung Hải, jang lơ̆m Anih jang Tĭnh uy, Kơdră Anih jang Tuyên giáo Tĭnh uy Kon Tum. 14 kang ƀô̆ nai apinh pơdơh hưu hơdrol kơ sơnăm pơkăp noh bơngai jang lơ̆m Tĭnh uy, Kơdră păng Phŏ kơdră kơ minh ƀar hơnih jang.

Yă Ngô Thị Hoàng Anh, Phŏ Kơdră Anih pơgơ̆r jang Tĭnh uy Kon Tum ăn tơbăt, đe kang ƀô̆ apinh pơdơh hưu hơdrol kơ sơnăm pơkăp pơm kiơ̆ Tơchơ̆t kơsô̆ 18 đơ̆ng Ƀan châ̆p hanh Trung ương Đảng, pơm trong hiôk ăn tơdrong pơm kiơ̆ tơchơ̆t tơlĕch đơ̆ng Trung ương tơplih 'nao, pơkăp bot 'lơ̆ng jơnŭm pơgơ̆r jang chĭnh trĭ, atŭm hăm noh pơm trong hiôk ăn kang ƀô̆ mơlôh gơh hơgei pơtoi pơm jang tơnăp hloh.