Tŏk bŏk pơyan phang Tây Nguyên, tơring Rơ Kơi, apŭng Sa Thây, dêh char Kon Tum oei jơk ƀlĭk kơ hloh 4.200 ha ‘long pơtăm păng ‘long sa plei. Tơ̆ tơring sơlam teh đak ou đei hnam kmăi pơm tơlĕch kơjăr ksu, mir pơgar să rong kon tơrong kmăi kmŏk hơgei, hơnih pơtăm ‘long pơtăm gơ̆h hơgei … Ƀok A Êl, kră pơlei kơ pơlei Gia Xiêng, tơbăt, sơlam teh đak Rơ Kơi dang ei pă khan tơring hơtăih yăih, tơring tơnap tap bơih:“Pơtêng hăm sơ̆ ‘noh lơ tơdrong tơplih, đơ̆ng kon bơngai, oei sa, pơma sa truh tơdrong atŏk tơ iung mŭk drăm. Khei năr tơjê̆ ou atŏk tơ iung kơtang hloh. Dang ei kon pơlei hui chă pơtăm ƀum ƀlang, lang să pơtăm chephe, ksu. Kon pơlei pơm kiơ̆ kơjăp trong bơ̆ jang đơ̆ng Đảng, khôi luơ̆t Teh đak”.

Dêh char Kon Tum đei 13 tơring sơlam teh đak tơjê̆ hăm 2 teh đak boăl Lào, Campuchia. Lơ̆m dôm sơnăm tơblăh vang tang găn ayăt Mi, ‘nou jĭ tơring tơm mă Ayăt Mi tơblăh pơrăm kơtang vă tang găn ƀô̆ đô̆i tơ̆ jăl trong Trường Sơn nuih mơng. 50 sơnăm đơ̆ng rŏng rơngei, atŭm hăm trong Hồ Chí Minh, trong gkung 14C đei tơmơ̆t jên ming man hlôi pơjing rơvơn ăn tơƀưh dih băl lơ̆m jăl trong sơlam teh đak hloh 292km.

Đơ̆ng groi teh răm ƀôm ƀrơ̆m, ƀrơ̆m phao pơgang pơrăm kơtang lơ̆m chăl tơblăh vang, Kon Tum hlôi atŏk tơ iung kơtang. Sơnăm sơ̆, akŏp tơmam drăm lơ̆m dêh char iŏk đei vă jê̆ 50.000 ti hlak jên; jang sa iŏk đei jô̆ hơtŏ măt bơngai hloh 68 triu hlak jên; tŏk mŭk drăm 8,02%, dơ̆ng mă 24 lơ̆m teh đak păng dơ̆ng hơlou lơ̆m tơring Tây Nguyên. Ƀok Nguyễn Tấn Liêm, Kơdră chĕp pơgơ̆r Hơnih vei lăng Choh jang sa păng Cham char dêh char Kon Tum tơbăt, găh tơdrong choh jang sa đei tơgop kăl hloh hăm tŏk mŭk drăm kơ dêh char:“Lơ̆m 4 sơnăm kơ ou, mă hơdăh sơnăm 2021, tơdrong jang choh jang sa kơ nhôn tŏk 5,75%, dơ̆ng mă 5 lơ̆m 63 dêh char, pơlei tơm. Sơnăm 2022, tŏk 6,19% dơ̆ng hơlou. Sơnăm 2023 tŏk 6,76% dơ̆ng mă 5 păng sơnăm 2024 tŏk 5,97% dơ̆ng mă 2. Lơ̆m 4 sơnăm kơ ou tŏk mŭk drăm dơ̆ng lơ̆m khul 5 lơ̆m teh đak”.

Dơ̆ng kơjăp atŏk tơ iung kơtang, dêh char Kon Tum dang ei hlôi jing 2 tơring jang mŭk drăm pran kơtang hơbĕch hơbal hloh đei pơlei tơm Kon Tum păng apŭng Kon Plông. Atŏk tơ iung dôm tơdrong đei, dêh char pơjing tơring pơtăm ‘long pơgang akŏm găh să tơ̆ 3 apŭng Tu Mrông, Đak Glei, Kon Plông hăm hơgăt teh să 13.000ha, lơ̆m ou hloh 2.900ha sâm Ngọc Linh. Hơnih tơmang pơhiơ̆ cham char teh đak Măng Đen tơ̆ apŭng Kon Plông hlôi jing hơnih tơmang pơhiơ̆ hơvơn đei lơ tơmoi lơ̆m teh đak păng teh đak đe năm tơmang lơ hloh…

Tơ̆ hơnăp tơdrong pơkoĕl chăl sơnăm lơ̆m Chăl atŏk tơ iung hơdrĕch hơdrung, jang kiơ̆ nơ̆r pơrô̆ jang đơ̆ng Trung ương, dêh char Kon Tum hlôi jang kiơ̆ hơmet pơ ‘lơ̆ng hơnih jang khul bơ̆ jang kiơ̆ trong “Gơh hơgei-kơtoei-pran kơtang-hơbĕch hơbal-tơnăp-Jơnei”. Ƀok Dương Văn Trang, Kơdră jang lơ̆m khul Trung ương Đảng, Bí thư Đảng dêh char, Kơdră chĕp pơgơ̆r Jơnŭm vei lăng kon pơlei dêh char Kon Tum tơbăt, pơđĭ lơ̆m khul chinh trĭ kơ dêh char tŏk bŏk kơrŭn đĭ ai iung jang keh đang trong tơlĕch jang tŏk mŭk drăm 10% sơnăm 2025, dơ̆ng kơtang hloh lơ̆m tơring Tây Nguyên:“Khei năr kơnh oei đei tôch kơ lơ tơdrong jang kăl, khul jang chinh trĭ kăl iung jang kơtang hloh dơ̆ng, nŏng hloh dơ̆ng hăm trong iung jang tĕnh koăng, tơnăp păng hơnăp jang kơtang. Rim kơdră chĕp pơgơ̆r Đảng, tơpôl khul kơdră chĕp pơgơ̆r rim hơnih bơ̆ jang hơnơ̆ng kiơ̆ yok rok jơ̆ng hơnăp jang pơm jŭk yŭk trong hơlou, tơgoăt pôm nơ̆r ƀơ̆r đon, kơrŭn jơhngơ̆m, mĭnh jơhngơ̆m đon yak hloh tơdrong tơnap tap, tơdrong long, jang keh đang ‘lơ̆ng dôm tơdrong pơjao tơgăl hăm jơhngơ̆m đon lui yom đơ̆ng Đảng ƀô̆ păng Kon pơlei dêh char”.

Pơđăm jĭt sơnăm đơ̆ng rŏng rơngei, đơ̆ng groi teh hiong răm kơtang lơ̆m ‘măng tơblăh vang pơm ăn, Kon Tum tŏk bŏk kơrŭn jơhngơ̆m atŏk tơ iung kơtang đei jing mĭnh hơnih hơdăh ang rang ‘lơ̆ng kơ Tây Nguyên. Yak mơ̆t lơ̆m chăl ‘nao, hăm kơrŭn đĭ ai, Kon Tum tŏk bŏk roi năr roi sơkơ̆t hơdăh hơnih dơ̆ng, hơyak truh trong tơlĕch jang tŏk kơtang, kơjăp ‘lơ̆ng, tơgăl hăm hơnăn groi teh nuih mơng pran kơtang.