Roi tơbăt đơ̆ng Anih jang Nội vụ dêh char Đắk Nông, anih jang âu hlôi gơih hla ar tơroi tơbăt truh Anih vei lăng kon pơlei dêh char Đắk Nông găh 6 ‘nu phŏ kơdră vei lăng dôm anih jang pơm hla ar pơdơh hưu hơdrol sơnăm ăn pơdơh kiơ̆ tơdrong Tơchơ̆t 178/2024/NĐ-CP đơ̆ng Khŭl kơdră teh đak, ‘noh ƀok Lê Quy, Phŏ Kơdră Anih jang Nội vụ, ƀok Trần Ngọc Lâm, Phŏ Kơdră anih jang vei lăng găh Ming man, ƀok Nguyễn Ngọc Luỹ, Phŏ Kơdră vei lăng Anih Tơlĕch nơ̆r sơkơ̆t păng Tơmơ̆t jên jang, ƀok Nguyễn Văn Phò, Phŏ kơdră Anih vei lăng Jên hu, ƀok Phạm Văn Mạnh, Phŏ Kơdră Anih vei lăng găh Trong nơnăm - Gre kơdâu, ƀok Lưu Văn Đặng, Phŏ Kơdră vei lăng Anih jang Khoa hŏk păng Kơmăy kơmŏk.

Kiơ̆ kơ Anih jang Nội vụ Đắk Nông, dêh char hlôi đei trong jang bơ̆jang 10 khŭl jang đảng, anih jang tơ̆ dêh char; tơmơ̆t hơdai 10 anih jang jing 5 anih jang. Pơđĭ 6 ‘nu Phŏ kơdră vei lăng anih jang pơm hla ar pơdơh hưu sơnăm ăn pơdơh ‘măng âu tă kơ găh dôm anih jang mă dêh char Đắk Nông gô tơlĕch jang tơmơ̆t hơdai tơ̆ hơnăp kơnh.