Pơyan Puih mak sơnăm 1930, Đảng Cộng sản Việt Nam đei pơjing, tơbăt khei ‘năr tôch gĭt kăl lơ̆m chăl bơ̆ jang kăch mang Việt Nam. Tơ̆ Hop akŏm pơjing Đảng (pơgơ̆r đơ̆ng ‘năr 6-1 truh 7-2-1930), Đảng Cộng sản Việt Nam chih hơdăh trong jang tŏk đơ̆ng kăch mang Việt Nam ‘nŏh jĭ: "Jang kăch mang, tơblăh hut hơyăt, iŏk rơngei ăn hơdrĕch hơdrung păng chĕng hơmet mir na vă năm truh xã hội cộng sản", bơ̆ jang tơdrong tơm: "Iŏk rơngei ăn hơdrĕch hơdrung păng chủ nghĩa xã hội". Hăm trong jang kăch mang trŏ ƀlep, khoa hŏk păng gơ̆h hơgei, đơ̆ng đei pơjing truh dang ei, Đảng Cộng sản Việt Nam hơnơ̆ng druh kiơ̆ tơdrong iŏk rơngei ăn hơdrĕch hơdrung păng chủ nghĩa xã hội, chĕp kơ̆l kon pơlei Việt Nam pơjing đei lơ tơdrong jơnei tih tên, bơ̆ jang đei đon pơhnŏng pơjing teh đak Việt Nam pơdrŏng, pran kơtang, kon pơlei pơm tơm, hơtŏ băl, gơ̆h hơgei. 

PGS. TS Bùi Đình Phong, Hnam hŏk Chinh trĭ Quốc gia Hồ Chí Minh pơma hơdăh: "95 sơnăm hăm tơdrong chĕp kơ̆l pơgơ̆r đơ̆ng Đảng bơ̆n iŏk đei lơ tơdrong jơnei tih tên nhen hrei ‘nâu ‘noh jĭ đei 3 tơdrong tôch gĭt kăl. Mă mônh, jĭ tơdrong chĕp kơ̆l tôch trŏ đơ̆ng Đảng jĭ tơdrong gĭt kăl hlŏh vă tơdrong jang kach mang gơ̆h iok đei jơnei. Tơdrong mă 2 kŭm tôch gĭt kăl hai ‘nŏh jĭ bơ̆n chĕp vei kơjăp Hla kơ rơngei hiôk hian ăn hơdrĕch hơdrung păng chủ nghĩa xã hội. ‘Nâu jĭ 1 tơdrong pơchĕh ‘nao tôch rơgei găh lĭ luơ̆n đơ̆ng Ƀok Hô truh tơ̆ Đảng păng gơnơm kơ ‘nŏh mă bơ̆n gơ̆h iok đei jơnei. Tơdrong mă 3 jĭ jơhngâm pran đơ̆ng kon pơlei tơm a kơ tơdrong jơnei đơ̆ng kăch mang".

Dôm tơdrong jơnei đơ̆ng 95 sơnăm hlôi hơmet kơjăp, pơjing jơhngâm pran vă Đảng hơnơ̆ng chĕp kơ̆l pơgơ̆r teh đak yak tŏk pran kơjăp lơ̆m chă ‘nao – chăl jang tŏk kơ hơdrĕch hơdrung. PGS.TS Nguyễn Viết Thảo, Kơdră jang lơ̆m Khul Lý luận Trung ương pơma hơdăh: "Trong mă hơtuch lơ̆m chăl jang tŏk ‘nŏh jĭ athei pơjing 1 teh đak Việt Nam XHCN pran kơtang, pơdrŏng đei ƀôh, gơ̆h hơgei, dơ̆ng hơdai hăm dôm teh đak jơ̆p lơ̆m plei teh nhen Ƀok Hô pơma sơnăm 1945, ‘nŏh jĭ đon pơhnŏng khŏm năm truh. 2 tơdrong tơm tôch rơđăh, truh sơnăm 2030 athei tŏk jing teh đak vă tŏk pơdrŏng, đei tơdrong jang kơmăy kơmŏk ‘nao ‘lơ̆ng, iŏk yoa jô̆ păh lăp lơ ƀiơ̆, vă năm truh sơnăm 2045 jing teh đak XHCN pơdrŏng đei ƀôh, đei iŏk yoa lơ. Inh apinh pơma hơdăh dơ̆ng ‘nŏh jĭ athei jing teh đak XHCN, hơtŏ ‘lơ̆ng, kon pơlei pơm tơm, gơ̆h gơgei, hơnŭk hơnoa, hiôk chơt".

Tơ̆ hop akŏm, Kơdră chĕp kơ̆l Hnam hŏk Chinh trĭ Quốc gia Hồ Chí Minh Nguyễn Xuân Thắng akhan, vă bơ̆ jang đei jơnei tơdrong jang gĭt kăl truh sơnăm 2030, trong vă jang truh sơnăm 2045, Đảng athei hơnơ̆ng tơplih 'nao mă pran găh đon tơchĕng jang tŏk, đei lơ tơdrong tơchơ̆t gĭt kăl, tưk tơiung jơhngâm đon pơchĕh rơgei, hơmet kơjăp jơhngâm đon jang tơnăp 'lơ̆ng găh chinh trĭ păng trong jang gĭt kăl mưh tơlĕch trong chĕp kơl pơgơ̆r:

“Đảng athei hơnơ̆ng tơplih ‘nao mă pran găh đon jang tŏk, vă akhan athei jang tŏk mă pran ‘lơ ‘lŏ lơ̆m dôm tơdrong tơchơ̆t gĭt kăl, lơ̆m tơdrong pơchĕh rơgei, vă hơtŏk jơhngâm pran, đon rơgei, nuih mơng mưh chĕp kơ̆l pơgơ̆r, tơlĕch trong jang gĭt kăl đơ̆ng Đảng. Athei hlôh vao kơjăp đon tơchĕng, trong jang đơ̆ng Đảng ‘nŏh jĭ “jang tŏk hrĕnh păng kơjăp ăn teh đak”, lơ̆m noh atŏk tơiung mŭk drăm, tơpôl păng vei lăng cham char ‘nŏh tơm, pơjing Đảng hơnơ̆ng jĭ tơdrong tôch gĭt kăl, kăn ƀô̆ ‘nŏh “kăl hlŏh lơ̆m rim tơdrong gĭt kăl”; atŏk tơiung jŏh ayŏ kơ dŏ xoang păng kon bơngai jĭ tơdrong tơm a. ‘Nâu jĭ jơhngâm pran vă bơ̆ jang atŏk tơiung”.

Pơma tơ̆ hop akŏm, Kơdră chĕp kơ̆l Ban Tuyên giáo Trung ương Nguyễn Trọng Nghĩa pơma hơdăh jơhngâm đon čhôk ‘nă găh 95 sơnăm Đảng chĕp kơ̆l pơgơ̆r kăch mang Việt Nam, hăm hơnăp năm hơdrol tơiung pơjing, hơmet pơ ‘lơ̆ng dôm tơdrong jơnei, kơjă kăp gĭt đơ̆ng Đảng. Ƀok Nguyễn Trọng Nghĩa lui Hop akŏm gô tơgop ‘lơ̆ng ăn tơdrong tơchĕng hơlen, roi tơbăt, pơtho tơƀôh jơhngâm đon ‘lơ̆ng đơ̆ng Ƀok Hô, dôm kơdră chĕp kơ̆l kăch mang adrol sơ̆, chăl đảng viên mĭnh jơhngâm đon tơpăt ‘lơ̆ng, nuih mơng... ăn dang ei păng ning mônh kơnh. Hơtŏk tơdrong tơiung pơjing, hơmet pơ ‘lơ̆ng hlŏh dơ̆ng đon lui đơ̆ng kon pơlei hăm Đảng, pơjing tơdrong drơ̆ng nơ̆r găh đon tơchĕng, đon pơhnŏng păng jơhngâm bơ̆ jang đơ̆ng đĭ đăng Đảng, đĭ đăng kon pơlei, đĭ đăng khul linh, yoa 1 teh đak Việt Nam "rơngei hiôk hian, kon pơlei pơm tơm, pơdrŏng đei ƀôh, gơ̆h hơgei, hiôk chơt, hơđơ̆ng jơhngâm jang tŏk kiơ̆ trong chủ nghĩa xã hội"./.