Ƀok Ngô Hiểu Khoa, Kơdră Anih pơgơ̆r jang kơ Grŭp jang Đèo Cả ăn tơbăt, trong trôm Phượng Hoàng kơjung 1,7km, jĭ 1 anih jang lơ̆m tơdrong jang pơm trong tơ̆ jăl kơjung 11 km yoa Anih sư iŏk jang. Dang ei 1 năr grŭp jang ăn vă jê̆ 400 ‘nu nhân công păng dang 100 tŏ gre, kơmăy kơmŏk, vang bơ̆ jang sir kôch, man hơmet trong trôm Phượng Hoàng kŭm hăm 10 tŏ gơng. Tơdăh tơdrong chưk pơ ‘ngoăih teh găh dêh char Khánh Hoà jang đang ‘lơ̆ng ‘nŏh gơ̆h sir kôch klĕch trong trôm âu ƀât hơtuch sơnăm 2025.

Trong gre kơdâu hrĕnh Khánh Hòa - Buôn Ma Thuột kơjung hlŏh 117km, đei 4 tŏ trong tơtil ăn gre kơdâu, khei ‘năr tơmât jên jang ming man jăl I đơ̆ng sơnăm 2021 - 2025. Hăm đĭ đăng jên pơm trong âu vă jê̆ 22.000 ti. Dang ei anih tơmât jên jang păng anih iŏk ming man oei akŏm jơhngâm bơ̆jang, hăm đon pơhnŏng truh đĭ sơnăm 2026 gô pơm đang păng tơmât yoa trong ‘nâu.