Pơgê ‘năr 30/12, ƀok Nguyễn Thiên Văn, Phŏ Kơdră Anih vei lăng kon pơlei dêh char Đắk Lắk, hlôi kĭ hla ar kơsô̆ 12306 gơih kơ Anih vei lăng găh Choh jang sa păng Hơtŏk tơiung tơring tơrang, Anih vei lăng găh Kơmăy kơmŏk Mơdro sa, Anih vei lăng jang pơgang, Kŏng an dêh char, păng Anih vei lăng kon pơlei pơlei tơm Buôn Ma Thuột athei hơlen lăng hơdăh tơdrong tơđăh tơh tong kơchơ̆t kơ̆m tơ̆ Đắk Lắk, ƀơm truh ƀai chih đơ̆ng VOV hăm hơnăn: "Tơđăh tơh tong kơchơ̆t kơ̆m tơ̆ Đắk Lắk: Anih jang kơpal tơtŭn băl hơnăp jang”.

Kiơ̆ kơ ‘noh, Anih vei lăng kon pơlei dêh char Đắk Lắk athei Anih vei lăng găh Choh jang sa păng Hơtŏk tơiung tơring tơrang pơgơ̆r, jang hơdai hăm dôm anih jang ƀơm truh nhen Anih vei lăng găh Kơmăy kơmŏk Mơdro sa, Anih vei lăng jang pơgang, Kŏng an dêh char, Anih vei lăng kon pơlei pơlei tơm Buôn Ma Thuột păng dôm anih jang kơpal pơgơ̆r tơroi tơbăt găh tơdrong jang vei lăng rơgoh ‘lơ̆ng tơmam sa hăm 6 hơnih pơm tơlĕch tơđăh tơh yua kơchơ̆t kơ̆m (‘ngoăih kơ năn đei ăn gơh yua), tơdrong jang dăr hơlen, tơchă băt anih pơm tơlĕch, iŏk pơdreo tơmam păng pơtôch bơ̆jang kiơ̆ klĕp truh khei ‘năr dang ei. Anih vei lăng kon pơlei dêh char Đắk Lắk athei dôm anih jang kơpal tơroi tơbăt hơdăh kơsô̆ hla ar pơkăp ăn hơnih jang đei tôm tơdrong hiôk vei rơgoh ‘lơ̆ng tơmam sa vă pơm tơlĕch, tĕch mơdro tơđăh tơh lơ̆m dêh char, hơdai hăm tơlĕch trong jang vei lăng dôm anih pơm tơlĕch, tĕch mơdro tơđăh tơh tơ̆ hơnăp kơnh.