Kiơ̆ kơ ‘nŏh, dêh char Gia Lai athei hŭt lê̆ 5 anih jang đei: Anih vei lăng trong nơnăm dêh char, Anih tơlĕch nơ̆r sơkơ̆t tơmât jên jang kơ dêh char, Anih roi tơbăt kơ dêh char, Anih vei lăng bơngai jang xa, linh jĭ rơka păng tơpôl kơ dêh char, Anih jang tơbôl kơ dêh char. Hơdai hăm ‘nŏh pơjing dơ̆ng 2 anih jang ‘nao ‘nŏh: anih vei lăng hơdrĕch kon kông păng tơdrong lui khop kơ dêh char; Anih vei lăng choh jang xa păng cham char.

Nơ̆r athei âu lăng kiơ̆ Tơdrong tơchơ̆t kơsô̆ 18-NQ/TW găh tơplih ‘nao, kăt tơjur khul bơngai jang păng Nơ̆r tơchơ̆t kơsô̆ 50-KL/TW đơ̆ng Anih tơm Chinh trĭ, vă tơjur ƀiơ̆ tơdrong bơ̆ jang hơdrom băl, hơtŏk tơdrong đei yoa mưh bơ̆ jang păng ‘mơ ‘met ƀiơ̆ kon jên. Anih vei lăng kon pơlei dêh char Gia Lai pơma hơdăh, tơdrong hơmet ming gô đei bơ̆jang dar dĕh, mă ‘lơ̆ng, vei lăng ‘lơ̆ng rim tơdrong đei yoa ăn kăn ƀô̆, bơngai jang păng ưh đei pơjuăl tơdrong vei lăng, chĕp kơ̆l pơgơ̆r.