Khei ‘năr âu ki, kon pơlei dôm hơdĕch kon kông păng tơring groi kông lơ̆m teh đak adrin bơ̆ jang hrơ̆ch ‘lơ̆ng dôm tơdrong tơgŭm ăn kon pơlei kon kông păng tơring groi kông, păng dôm tơdrong tơgŭm vei lăng ‘lơ̆ng tơdrong arih xa tơpôl kơna tơdrong arih xa kơ kon pơlei roi đunh roi tŏk, tơdrong jang mŭk drăm tơplih roi ‘lơ̆ng, tơdrong jang xa đơ̆ng kon pơlei roi lơ; jên khei roi tŏk. Kơsô̆ unh hnam tơnuh jur hrĕnh; pơtho pơhrăm, jang pơgang đei tơrek truh; jŏh ayŏ kơ dŏ xoang, tơdrong juăt ‘lơ̆ng đơ̆ng sơ̆ đei chĕp vei păng tưk tơiung. Tơdrong sơđơ̆ng chinh trĭ đei vei kơjăp; tơdrong pơvei mât 1 ƀơ̆r đon đơ̆ng đĭ đăng hơdrĕch hơdrung đei hơmet kơjăp păng tŏk ‘lơ̆ng. Tơdrong jang tŏk muk drăm kơ dôm dêh char tơring kon kông păng groi kông tŏk pran, lơ̆m noh dôm dêh char tơring Tây Bắc tŏk jô̆ păh lăp 8,0% 1 sơnăm, Tây Nguyên tŏk jô̆ păh lăp 7,5% 1 sơnăm, Tây Nam Bộ tŏk jô̆ păh lăp 7,0% 1 sơnăm…

Kiơ̆ Kơdră chĕp kơ̆l Anih vei lăng hơdrĕch kon kông Hầu A Lềnh, lơ̆m sơnăm âu ki, tơdrong jang kon kông kŭm oei đei 1,2 tơdrong tam mă ‘lơ̆ng, lơ̆m noh đei tơdrong tơlĕch jang dôm tơdrong jang oei tơhlăk tăk, Tơdrong jang tơm kơ teh đak pơyoa ăn kon pơlei kon kông păng tơring groi kông tam mă iŏk đei nhen thoi ‘mĕh vă:

“Tơdrong pơgơ̆r bơ̆ jang tơ̆ dôm tơring, kŭm đei tơring tôch adrin, jang đei 1,2 tơdrong ‘lơ̆ng, jên tơlĕch jang lơ jô̆ hloi jên tơmât jang păng jên tơlĕch jang hơnơ̆ng, mă lei kŭm oei đei tơring tơdrong tơlĕch jang oei tam mă pran, tam mă lăp hăm tơdrong ‘mĕh vă. Jô̆ păh lăp lơ̆m teh đak, Tơdrong jang tơm kơ teh đak kŭm tơlĕch jên jang lơ mơ̆n, mă lei, pơting hăm dôm tơdrong ‘mĕh vă đơ̆ng Khul kơdră teh đak tơlĕch ‘nŏh tam mă lăp. Đon hlôh vao đơ̆ng kon pơlei, tơdrong vang jang đơ̆ng kon pơlei tam mă kơjung.”

Sơnăm 2025, Anih vei lăng hơdrĕch kon kông tơlĕch 12 tơdrong jang tơm, lơ̆m noh adrin tơlĕch jang đang ‘lơ̆ng tơdrong hơmet ming anih jang, khul bơngai jang găh hơdrĕch kon kông tơ̆ Trung ương păng tơring vă gơ̆h pơgơ̆r bơ̆ jang ‘lơ̆ng iŏk đơ̆ng blŭng sơnăm 2025 hloi. Tơ̆ hop akŏm, bơngai tang măt dôm tơring oei pơma truh 1,2 tơdrong pơmat tat, tơhlăk tăk mưh tơlĕch tơdrong jang kon kông tơ̆ tơring, atŭm hăm ‘nŏh tơlĕch nơ̆r athei đei trong sek tơlang.

Pơma tơ̆ Hop akŏm, Phó Thủ tướng Nguyễn Hòa Bình akhan, tơdrong jang kon kông păng tơgŭm ăn hơdrĕch kon kông hơnơ̆ng đei Đảng păng teh đak tơrek truh kiơ̆ đơ̆ng Tơdrong jang tơm kơ teh đak hlôi mât lơ̆m tơdrong arih xa kơ kon pơlei kon kông păng tơring kon kông. Mŭk drăm tŏk pran, tơdrong arih xa kơ kon pơlei kon kông păng tơring groi kông roi 'lơ̆ng, đơ̆ng noh tơƀôh hơdăh tơdrong tơgŭm đơ̆ng Đảng păng teh đak hlôi mât lơ̆m tơdrong arih xa tơ̆ yăn âu. Mă lei, lơ̆m sơnăm 2024, Anih vei lăng hơdrĕch kon kông oei đei 7/14 tơdrong jang jang tam mă kĕh, kơna Phó Thủ tướng Nguyễn Hoà Bình athei jăh jang kĕh dôm tơdrong 'nâu lơ̆m jăl khei mă 1 sơnăm 2025 hloi. Anih vei lăng hơdrĕch kon kông athei chih hơdăh dơ̆ng tơdrong jang, đon pơhnŏng, hơnăp jang hăm kon pơlei kon kông păng tơring groi kông, 'moi kiơ̆ trong jang đơ̆ng Đảng, Tơdrong tơchơ̆t đơ̆ng Quốc hội hăm dôm trong jang tih: 

“Trong jang lơ, jên tơmât jang kŭm lơ, kơna tơdăh bơ̆n ưh jang đei yă kiơ ‘lơ̆ng ăn mih ma duch nă, ăn kon pơlei ‘nŏh ưh kơ trŏ ôh. Bơ̆n athei hơlen năng dơ̆ng khul jang đơ̆ng bơ̆n dang ei, tơjur ƀiơ̆ bơngai jang, tŏ sĕt bơngai mă lei jang rơgei, đei yoa ƀiơ̆, păng kơchăng sơng iŏk dôm tơdrong jang ‘nao dơ̆ng. Đei tơdrong ‘lơ̆ng, hiôk hian mă lei kŭm đei hloi tơdrong gleh hrat pơmat tat. Gleh hrat ‘nŏh jĭ tơdrong jang tôch lơ, oei khul bơngai jang ‘nŏh gô jur tŏk đơ̆ng kơpal truh tơ̆ hơla, mă lei tơdrong ‘lơ̆ng kŭm roi tŏk mưh jên vă jang kŭm lơ vă pơm hơtŏk tơdrong arih xa ăn kon pơlei.”

Phó Thủ tướng Nguyễn Hoà Bình oei athei, sơnăm 2025 adrin jang đang tơdrong pơm hnam ăn bơngai tơnuh kiơ̆ đơ̆ng akŏm đĭ đăng tơdrong adrin tôch ai; atŭm hăm ‘nŏh sơnăm 2025 athei pơtôch Tơdrong jang tơm kơ teh đak atŏk tơiung mŭk drăm, tơpôl tơ̆ tơring kon kông păng groi kông jăl I păng hơmet mă ‘lơ̆ng ăn jăl jang mă 2 kơ Tơdrong jang ‘nâu, găn đĭ ưh ăn tơdrong jang yoa đơ̆ng jăl I kơ Tơdrong jang ‘nâu oei tam mă jang đang.