Ŭnh hnam ƀok K'Phân, đang viên oei lơ̆m thôn 3, tơring Đinh Trang Thượng, apŭng Di Linh ‘noh mĭnh lơ̆m dôm ŭnh hnamn yŭk trong hơlou jang chehphe ‘lơ̆ng. Hăm 3ha chehphe, pơyan ou ki ŭnh hnam ƀok iŏk đei 17 tân chehphe găr, hơnhăk iŏk đei kơ ti hlak jên. Ưh khan lăp pơm pơdrŏng ăn kơ dih, K’Phân oei hơdrin tơgŭm ăn kon pơlei lơ̆m pơlei chă ming hơmet pơ ‘lơ̆ng dôm chehphe đĭ kră krŭt, pơtho ăn kon pơlei chă pơtăm hơdrĕch hle vă đei plei lơ păng ‘lơ̆ng. “Chehphe kră krŭt plei ưh kơ lơ, kăl chă tơklep vă mir pơgar ‘lơ̆ng. Chephe tơgep kăl chă tơruih đak măh mai, chă prôi phŏng kơna mă jing ‘lơ̆ng. Lơ̆m ou, chă pruih đak tŏ sĕt hloh 3 ‘măng, prôi phŏng 4 ‘măng, pruih pơgang 2 ‘măng lơ̆m sơnăm ‘noh chehphe mă plei ăl. Đơ̆ng mă tơgep chehphe hơdrĕch ‘nao, mĭnh sơnăm jô̆ hơtŏ jang sa iŏk đei truh 15 tân”.

Hăm trong choh jang sa trŏ lăp, đei rim ‘long pơtăm hơnhăk đei iŏk yua kơjăp nhen chehphe, sâu riêng, krô̆i pung, pơtăm ‘long pơmur rong sơdrông pơm brai ... tơdrong jang sa iŏk đei tơ̆ Đinh Trang Thượng roi năr roi tŏk kơtang. Sơnăm 2024 jô̆ hơtŏ 1ha teh jang sa tŏ ou chă jang sa iŏk đei 125 triu hlak jên, jô̆ hơtŏ măt bơngai 47 triu hlak jên, jơnei 104% trong pơprŏ jang kiơ̆ Tơdrong tơchơ̆t đơ̆ng Đang ƀô̆ tơring tơlĕch ăn.

Kiơ̆ đơ̆ng ƀok K'Đức, Bí thư Chi bộ Thôn 2, tơring Đinh Trang Thượng, mĭnh lơ̆m dôm tơdrong kăl hloh tơgŭm ăn kon pơlei kĕ atŏk tơ iung kơtang lơ̆m khei năr ou ki ‘noh jĭ hơnăp jang pơm jŭk yŭk trong hơlou kơ rim đang viên. Pơ đĭ lơ̆m pơlei đei hloh 200 ŭnh hnam, lơ̆m ou đei 17 đang viên ling lang pơm jŭk yŭk trong hơlou lơ̆m tơdrong atŏk tơ iung mŭk drăm. “Jang kiơ̆ nơ̆r pơrô̆ đơ̆ng Khul kơdră chĕp pơgơ̆r Đảng kơpal, Chi ƀô̆ atŏk kơtang tơlĕch jang kiơ̆ tơdrong jang tơgep hơmet pơ ‘lơ̆ng mir pơgar chehphe, rim đang viên lơ̆m pơlei tôch pơnam, iung jang kiơ̆ ‘lơ̆ng hơnăp jang pơm jŭk yŭk trong hơlou lơ̆m jang kiơ̆ păng hơnhăk đei jơnei hơ iă, tơdrong hơrih sa kơ kon pơlei roi năr roi đei ƀôh, đei rơvơn chă vei lăng năng tông ăn kôn mon kon hơ ‘lơ̆p hŏk pơhrăm truh tơ̆p truh troch. ‘Ngoăih tơgep chehphe, dang ei kon pơlei lơ̆m pơlei oei iung jang hloi chă pơtăm hrou rim ‘long pơtăm anai nhen pơtăm ‘long ƀơ, sâu riêng, theng thôih yuăn (mắc ca), đơ̆ng noh tơdrong chă choh jang sa roi năr roi hơnhăk đei iŏk yua kơjăp hloh”.

Ƀok K’Đô, Kơ-iĕng Ƀĭ thư Anih jang Đảng, Kơdră Anih jang vei lăng kon pơlei tơring Đinh Trang Thượng tơroi tơbăt, đơ̆ng khei năr kơjă cheh phe tơjur, tơring hlôi tơlĕch tơchơ̆t gah tơplih hơdrĕch 'long pơtăm, hơtŏk trong jang sa hle nhen pơtăm 'long pơmur rong hơdrông pơm brai, pơtăm 'nhot, chă rei pơtăm dôm hơdrĕch ‘long đei iŏk yua lơ. Mă kăl, sơnong jang kơ đe đảng viên jĭ kăp gĭt lơ̆m tơdrong chă pơrô̆ pơrôp, pơtho khan ăn kon pơlei jang kiơ̆ tơdrong hơgei khua hŏk ki thuơ̆t lơ̆m choh pơtăm. Lơ̆m sơnăm 2025 ou, atŭm hăm hơtŏk kơtang dôm tơdrong jang choh jang xa kiơ̆ pơkăp kơjăp sơđơ̆ng, tơring hơvơn hơtŏk pơtăm cheh phe kiơ̆ trong 'nao vă hơtŏk pơ-'lơ̆ng tơmam pơtăm đei, jang atŭm hăm rim anih jang mŭk drăm chă akŏm răt tơmam choh pơtăm, vei sơđơ̆ng tơdrong tĕch tơlĕch ăn kon pơlei. Hơdrin tơjur 2% kơsô̆ unh hnam hin dơnuh, păng hơtŏk iŏk yua ăn rim bơngai jang đei 55 triu hlj. Ƀok K’Đô ăn tơbăt:“Hăm tơdrong pơgơ̆r kơtă đơ̆ng Anih jang Đảng păng tơdrong tơgŭm đơ̆ng tôm anih jang chĭnh trĭ, 'noh lơ đảng viên hlôi yuk hơlou lơ̆m tơdrong jang hơtŏk mŭk drăm. Đơ̆ng 'noh kon pơlei tơ̆ tơring yak kiơ̆, tơgop hơtŏk mŭk drăm – tơpôl hơtŭm kơ tơring. Đinh Trang Thượng adoi hăt hot chă pơrô̆ pơrôp kon pơlei sut lê̆ hnam hnăt hnot, hnam pơgia, lơ̆m sơnăm 2024 hlôi sut đei 16 tŏ hnam. Lơ̆m sơnăm 2025 ou gô pơtoi sut lê̆ 18 tŏ hnam dơ̆ng, nhôn hơdrin keh đang hơdrol kơ hop akŏm đảng, lơ̆m khei  5/2025 athei mă keh đang tôm”.

Hăm dôm tơchơ̆t tơlĕch jang trŏ ƀlep, tơdrong atŭm jơhngơ̆m đơ̆ng Anih jang đảng, jơnŭm pơgơ̆r păng kon pơlei, Đinh Trang Thượng tŏk bŏk oei hơtŏk tơ-iung, jing minh lơ̆m dôm tơring tơrang 'nao hơgei kơ apŭng Di Linh. Dang ei tơring Đinh Trang Thượng tŏk bŏk pơtoi tơdrong jang kơ đe đảng viên, hơtŏk tơplih jang kiơ̆ khua hŏk ki thuơ̆t, hơtŏk pran tơdrong jang kơjăp sơđơ̆ng, tơgop pơjing pơlei pơla roi năr roi 'lơ̆ng, hơdrin pơm jang đei jơnei tơnăp hloh vă sơng kơ kuh kơ 'măng Hop akŏm jơ̆p teh đak mă 14 kơ Đảng./.