‘Nhŏng Y Quân Hđơ̆k, hơdrung Êđê oei tơ̆ ƀuôn Alê A, phương Ea Tam, pơlei tơm Buôn Ma Thuột, dêh char Dak Lăk đei pôk tơmơ̆t lơ̆m Đảng khei 1 sơnăm 2025. ‘Nhŏng Y Quân tơroi, lăng ƀôh dôm bơngai đang viên lơ̆m pơlei jĭ dôm bơngai pơm jŭk yŭk trong hơlou, đei kon pơlei lui yom, ‘mêm kơ eng, ‘nhŏng hơdrin iung jang vă đei jing bơngai đang viên. Atŭm hăm jang ‘lơ̆ng hơnăp jang kơ mĭnh ‘nu bơ̆ jang lơ̆m Khul joh hơri hơdrĕch hơdrung Đak Lăk, Y Quân oei iung jang tơnăp dôm tơdrong jang ou to lơ̆m tơring. ‘Nhŏng atŭm hăm hơdruh tơdăm lơ̆m pơlei hơnơ̆ng pơgơ̆r hop akŏm-joh hơri, pơrô̆ hơvơn kon pơlei vei kơjăp tơdrong oei sa joh ayŏ joăt joe kơ hơdrech hơdrung bơ̆n.  Y Quân tơbăt:“Kơdih ba tôch chơt hơ iă đei mơ̆t jang lơ̆m  Đảng Cộng sản Việt Nam. Ba gô hơdrin hloh dơ̆ng lơ̆m hŏk pơhrăm, tơdrong jang vă tơgăl jĭ bơngai đảng viên”.

Ƀok Lê Văn Nhuần, Bí thư Chi bộ buôn Alê A, phương Ea Tam, pơlei tơm Buôn Ma Thuột, dêh char Đak Lăk tơbăt: bơ̆ jang atŏk tơ iung đảng jĭ tơdrong jang chinh trĭ kơ tơring tơlĕch jang blŭng hloh. Kơ yuơ pơlei đei hloh 90% măt bơngai kon pơlei ‘noh bơngai Êđê, lơ kon pơlei năm jang sa tơ̆ hơtăih kơna tơdrong vă atŏk tơ iung đảng viên tơƀơ̆p tôch tơnap tap. Mă đơ̆ng lơ loh ră, sơnăm 2024, Chi ƀô̆ oei pôk tơmơ̆t đei 2 ‘nu đang viên ‘nao. Ƀok Lê Văn Nhuần tơbăt, lơ̆m chi ƀô̆ hlôi đei 76 đang viên; iung jang ‘lơ̆ng hơnăp jang đơ̆ng kơdih, mă kăl ‘noh tơdrong pơrô̆ pơrôp kon pơlei lơ̆m atŏk tơ iung muk drăm-joh ayŏ-tơpôl, sơđơ̆ng tơring păng tơ iung pơjing khul jang chinh trĭ tơ̆ pơlei pơla. “Truh hloi dôm đang viên tŏk bŏk vang mơ̆t lơ̆m chi ƀô̆ tơ̆ ou, dăh mă đảng viên bơngai kang ƀô̆ oei tơ̆ ou jei iung jang ‘lơ̆ng rim tơdrong jang pơting dih băl kơ pơlei. Mă kăl rim đang viên oei kơtă tơgop tôch kơ lơ găh mŭk drăm, jơhngơ̆m đon vă tơ iung pơjing pơlei pơla.Kơna pơlei pơla nhôn sơnăm ayơ jei đei kơdră kơpal hôn bơnê, mă kăl rim tơdrong jang tơpôl kon pơlei pơla”

Hăm tơring pơlei đei lơ kon pơlei oei sa, tơdrong ƀôh pơtho pơjing đảng viên ưh khan lăp chă rơih iŏk dôm bơngai tơnăp hơgei, mă oei lơ̆m khei ‘năr pơtho pơhrăm, pơm hơtŏk jơhngơ̆m đon hlôh vao chinh trĭ păng pơchoh trong atŏk tơ iung kơ pơlei pơla. Mă hơdăh tơ̆ tơring Yang Tao, apŭng Lăk, dêh char Dak Lăk, tơring đei truh 95% măt bơngai kon kông hơrih sa, mă lei kơrŭn đĭ ai “tơ iung pơjing, atŏk tơ iung chi ƀô̆ kơjăp ‘lơ̆ng” rim hơnih đảng pơlei pơla hlôi đei tơ iung pơjing trong vă jang, tơlĕch Tơdrong tơchơ̆t găh nơ̆r pơkăp atŏk tơ iung đảng viên rim sơnăm. Atŭm hăm ‘noh, rim đang viên lơ̆m rim chi ƀô̆, kơrŭn đĭ ai pơm jŭk yŭk trong hơlou, hơmet tơdrong long đei jing tơdrong rơvơn lơ̆m atŏk tơ iung mŭk drăm-tơpôl tơ̆ tơring. Ƀok Y Wu Sruk, Kơ iĕng Kơdră chĕp pơgơ̆r Hơnih vei lăng kon pơlei tơring Yang Tao, apŭng Lăk tơbăt:“Ba băt hlôh ƀôh hơdăh tơdrong oei sa joăt joe tơ̆ ou, mă kăl tơdrong băt nơ̆r pơma kon pơlei tơ̆ ou kơna tôch rơvơn lơ̆m chă pơma dơnuh, tơroi tơbăt hăm kon pơlei. Đơ̆ng noh băt tơdrong oei sa joăt joe kơ kon pơlei, băt hlôh ƀôh hơdăh tơdrong oei mơmat tat hrat hrin kơ kon pơlei. Đơ̆ng băt hlôh ƀôh hơdăh ‘noh ba mă chă pơtho tơbăt ăn kon pơlei găh trong bơ̆ jang đơ̆ng Đảng, khôi luơ̆t Teh đak vă kon pơlei hlôh vao păng pơm kiơ̆ lơ̆m tơdrong hơrih sa kơ ‘năr".

Ƀôh hơdăh tơdrong gĭt kăl lơ̆m bơ̆ jang atŏk tơ iung đang viên, khul kơdră chĕp pơgơ̆r Đăk Lăk hlôi păng tŏk bŏk tơlĕch lơ trong jang vă pơjing rơvơn hloh ăn rim đang viên, mă kăl bơngai đang viên kon kông vang iung jang lơ̆m khul kơdră chĕp pơgơ̆r đảng. Atŭm hăm noh đei tơdrong tơgŭm djru lơ̆m pơtho pơhrăm lĭ luơ̆n, pơjing tơdrong rơvơn ăn hŏk hôp đang tơ̆ tơring hơtăih yăih, hlôi tơgop pơm hơtŏk iok đei jpơnei hơ iă lơ̆m bơ̆ jang vei lăng păng chĕp pơgơ̆r đơ̆ng khul kơdră. Ƀok Lê Nam Cao, Kơ iĕng kơdră chĕp pơgơ̆r Hơnih bơ̆ jang vei lăng kang ƀô̆ dêh char Dak Lăk tơbăt:“Rim kơdră chĕp pơgơ̆r đảng tơring lăng kơjăp chă rơih pơjing khul bơ̆ jang đơ̆ng rŏng ou kơnh ‘noh kôn mon kon hơ ‘lơ̆p bơngai kon kông vă ăn năm hŏk tơ̆ rim hnam trương jăl pêng teh đak rong ‘me kơ apŭng păng kơ dêh char. Mă ƀar dơ̆ng ‘noh tơlĕch jang kiơ̆ chă rơih tơmơ̆t jang hăm bơngai kon kông ăn mơ̆t jang lơ̆m rim hơnih bơ̆ jang teh đak kơ dêh char. Đơ̆ng dôm trong pơprŏ ăn ou gô pơjing đei khul jang kăl hloh vă pơprŏ ăn mơ̆t jang pơm kơdră chĕp pơgơ̆r rim hơnih bơ̆ jang lơ̆m dêh char”.

Hăm tơdrong kăl lơ̆m tơdrong jang mŭk drăm tơpôl, tơdrong oei sa kơ kon pơlei pơla kơ dêh char Dak Lăk, tơdrong atŏk tơ iung đang viên lơ̆m tơring kon kông ưh khan lăp tơdrong kăl lơ̆m bơ̆ jang chinh trĭ mă oei tơgop pơm hơtŏk tơplih keh kong ‘lơ̆ng hơ iă lơ̆m tơring dơ̆ng. Đơ̆ng dôm bơngai đang viên kon kông ‘noh hlôi jing “gơng tơroh” kloh klĕch hơnhăk ba trong bơ̆ jang, tơdrong tơchơ̆t đơ̆ng Đảng truh hăm kon pơlei, pơjing hơmet pơ ‘lơ̆ng jơhngơ̆m đon lui yom kơtang đơ̆ng kon pơlei hăm Đảng; jĭ tơlei trơ trơp tơgoăt kơjăp lơ̆m tơgoăt tơgoăl dih băl rim hơdrĕch hơdrung; tơ iung pơjing tơdrong hơrih sa ‘lơ̆ng rŏ hơbŏ nhen; tơgŭm jru kon pơlei atŏk tơ iung mŭk drăm, tơgop kơtang lơ̆m jang kiơ̆ rim trong tơlĕch jang găh atŏk tơ iung mŭk drăm-tơpôl, pơm hơtŏk tơdrong chĕp pơgơ̆r ‘lơ̆ng, jơhngơ̆m pran, tơ iung pơjing khul đảng, khul bơ̆ jang chinh trĭ roi năr roi rơgoh ‘lơ̆ng, pran kơtang hloh dơ̆ng.