Pơgê năr 19/2, tơ̆ pơlei tơm Pleiku, dêh char Gia Lai, Binh đoàn 15 pơgơ̆r Pơm lêh tơbăt 40 sơnăm Năr pơjing Binh đoàn. Lơ̆m prăt 40 sơnăm ou ki, Binh đoàn 15 iung jang ting ring tơdrong jang mŭk drăm păng vei lăng teh đak. Hrei ou hơnih vei lăng hloh 44.295 ha ksu păng vă jê̆ 400ha ƀa, ‘nhot sa, atŭm hăm 6 hnam kmăi pơm tơlĕch kơjăr ksu, lơ̆m 1 sơnăm pơm tơlĕch đei 55.000 tân. Binh đoàn hlôi tơgop hloh 2.800 ti hlak jên lơ̆m kon jên bơ̆ jang teh đak, pơjing tơdrong jang sơđơ̆ng ăn hloh 16.000 ‘nu bơngai jang, lơ̆m ou đei hloh 60% ‘noh bơngai kon kông. Atŭm hăm atŏk tơ iung mŭk drăm, Binh đoàn 15 ling lang lăng kơjăp bơ̆ jang pơrô̆ pơrôp kon pơlei, tơgŭm ăn kon pơlei xut xa pơngot rơvĕt tơjur dơnuh, tơ iung pơjing tơring tơrang ‘nao. Hơnih hlôi tơgum tơ iung pơjing ming man ‘nao păng hơmet ming hloh 1.500km trong gre, 400km tơlei ŭnh hơyuh, atŭm hăm lơ hnam hop akŏm pơlei pơla, hnam pơgang, hnam trương hŏk.