Lơ̆m dêh char Kon Tum hrei ou đei 35 hơp tak xah, khul jang hơdoi, hơnih mơdro sa păng vă jê̆ 800 hơnih mir pơgar să kơ yuơ rim ƀô̆ đô̆i so pơm tơ-‘ngla. Rim trong jang rong rơmo, pơbe yŏng kơ Khul Ƀô̆ đô̆i so 2 apŭng Ngọc Hồi, Đăk Glei; trong jang rong rơnŭng kơ Khul ƀô̆ đô̆i so apŭng Sa Thầy; trong jang pơtăm ‘long pơgang kơ Khuk Ƀô̆ đô̆i so apŭng Tu Mrông, hơnhăk đei iŏk yua kơjăp, adoi đei lang să vă tơgŭm dơ̆ng kơhrĕng ƀô̆ đô̆i so lơ̆m khul yak hloh dơnuh hin kơjăp ‘lơ̆ng. Ƀô̆ đô̆i so A Tôn, pơlei Pu Tá, tơring Măng Ri, apŭng Tu Mrông đei mir pơgar sâm Ngọc Linh kơjă kơjên kơ ti hla jên, tơbăt:“Ŭnh hnam nhôn pơtăm sâm Ngọc Linh hloh 10 sơnăm bơih. Jĭ bơngai Ƀô̆ đô̆i so kơ pơlei kơna ba chă pơrô̆ pơrôp kon pơlei atŏk tơ iung mŭk drăm ŭnh hnam vă vă kon hơ ‘lơ̆p hŏk pơhrăm truh tơ̆p truh troch. Mă ƀar ‘noh pơrô̆ pơrôp, pơtho tơbăt găh khoa hŏk kih thuơ̆t, găh pơtăm ‘long pơgang lơ̆m ou đei sâm Ngọc Linh jang sa đei iŏk yua kơjăp”.

Khul ƀô̆ đô̆i so dêh char Kon Tum đei vă jê̆ 19.000 ‘nu bơngai lơ̆m 111 khul tơ̆ 10 apŭng, pơlei tơm lơ̆m dêh char. Gơnơm jang kiơ̆ ‘lơ̆ng tơdrong jang “Ƀô̆ đô̆i so tơgum dih băl tơjur dơnuh, jang sa hơgei”, 5 sơnăm ou ki, ŭnh hnam dơnuh lơ̆m khul tơjur đơ̆ng hloh 16% jur pă 8%. Rim hơnih khul lơ̆m dêh char jei tơgŭm ăn rim bơngai lơ̆m khul sut sa đei 500 pơbŭng hnam pơgia păng pơm ‘nao 44 pơbŭng hnam ‘mêm mơnat pôk ăn rim ƀô̆ đô̆i so.

Đại tá Võ Thanh Chín - Kơdră chĕp pơgơ̆r Khul Ƀô̆ đô̆i so dêh char Kon Tum, Kơdră so chĕp pơgơ̆r Hơnih Ƀô̆ đô̆i dêh char tơbăt jơhngơ̆m hôn bơnê kơ Ƀok Hô, bơngai hlôi pơjing, pơtho pơhrăm păng jĭ ƀok tơm dơnơm kơ rim khul ƀô̆ đô̆i; ƀlŏk hơdơ̆r hmach bơnê kơ Đại tướng Võ Nguyên Giáp, Yŏng so Khul Ƀô̆ đô̆i Kon pơlei Việt Nam. Đại tá Võ Thanh Chín tơbăt, mă đơ̆ng hlôi pơdơ̆h kơ jang mă lei rim kang ƀô̆ kơpal kơ khul ƀô̆ đô̆i ling lang vei kơjăp jơhngơm đon ‘lơ̆ng Ƀô̆ đô̆i Ƀok Hô:“Mă đơ̆ng hlôi pơdơ̆h jang mă lei jơhngơ̆m đon Ƀô̆ đô̆i Ƀok Hô oei ling lang pơchrang hơdăh trong ăn rim tơdrong jang. Nhôn kơrŭn đĭ ai tơgop jơhngơ̆m pran, jơhngơ̆m đon lơ̆m tơdrong jang tơ iung pơjing păng vei lăng Teh đak. Pơtho khan ăn jơhnơr mơlôh đei jơhngơ̆m đon ‘mêm kơ eng Teh đak, chủ nghĩa nuih mơng kĕch mang”.     

Jang kiơ̆ kơjăp jơhngơm đon ‘lơ̆ng, tơdrong joăt joe “Ƀô̆ đô̆i Ƀok Hô”, rim jơhnơr ƀô đô̆i so dêh char Kon Tum ling lang jang ‘lơ̆ng tôm tơdrong păng lăng tơdrong jang tơ iung pơjing, vei lăng Đảng, Khul kơdră chĕp pơgơ̆r, vei lăng năng tông kon pơlei, vei kơjăp sơđơ̆ng chinh trĭ, sơđơ̆ng tơpôl tơ̆ tơring ‘noh tơdrong jang chinh trĭ gĭt kăl hloh. Hăm hơnăp jang kăl jang kiơ̆ Tơdrong tơchơ̆t 04 kơ Hơnih Đảng dêh char Kon Tum găh “Hơnơ̆ng tơ iung pơjing ăn tơring tơnap tap lơ̆m chăl hle”, hăm trong jang “tơpôl pơkom, rim bơngai pơkom”, Khul ƀô̆ đô̆i so hlôi tơgŭm 2 ŭnh hnam tơnap tap tơ̆ pơlei Ktu, tơring Hơ Moong, apŭng Sa Thầy yak hloh dơnuh kơjăp. Hrei ou trong jang ou hơnơ̆ng tơlĕch jang ‘lơ̆ng păng iung jang hloi tơ̆ pơlei Kon Hia 1, tơring Đăk Rơ Ông, apŭng Tu Mrông kiơ̆ trong Pơprŏ jang đơ̆ng Khul kơdră chĕp pơgơ̆r Đảng dêh char Kon Tum.

Vă sơkơ̆t hơdăh, tơdrong jang Khul ƀô̆ đô̆i so tơgŭm dih băl tơjur dơnuh, jang sa ling lang đei rim Khul tơ̆ Kon Tum pơgơ̆r tơlĕch jang kiơ̆ jơnei, lang să kơtang lơ̆m lơ tơdrong jang. Đơ̆ng ‘noh tơgop pơm hơtŏk tơdrong hơrih sa sơđơ̆ng păng pơjing đei hơyak pran chă pơrô̆ hơvơn rim bơngai lơ̆m khul hưch hanh pơting dih băl jang sa, jang kiơ̆ ‘lơ̆ng kơrŭn iung jang đơ̆ng kơdih, tơplih 'nao jơhngơ̆m đon tơchĕng, trong jang sa. Mă hơdăh, rim trong jang kơ yuơ khul ƀô̆ đô̆i so iung jang tơgop lơ̆m pơm tơplih ‘long pơtăm, kon tơrong hơnhăk đei iŏk yua kơjăp. Khul ƀô̆ đô̆i so hlôi jang kiơ̆ tơdrong gơ̆h hơgei kơ kih thuơ̆t, kmăi kmŏk lơ̆m choh jang sa, pơm tơlĕch, vei lăng păng tĕch mơdro tơmam drăm choh jang sa ... Truh dang ei, tơ̆ dêh char Kon Tum đei 1 Câu lạc bộ “Ƀô̆ đô̆ so, ƀô̆ đô̆i so choh jang sa, mơdro sa”, 720 hơnih jang mir pơgar să, 11 hơp tak xah, 6 khul jang hơdoi, 12 hơnih mơdro sa kơ yuơ dôm Ƀô̆ đô̆i so pơm tơ-‘.ngla, pơjing đei tơdrong jang ăn dang 3.500 ‘nu bơngai hăm jang sa iŏk yua kơjăp.