Năm rok trong gre kơdâu hrĕnh, đe công nhân păng ki sư oei bơ̆ jang ưh đei pơdơ̆h: đơ̆ng tuh bê tông, man gơng tơ̆ trong truh hloi hơmet pơ ‘lơ̆ng rim tơdrong jang iĕ hlŏh. Jơva kơmăy đôh dơdĭk dơdăk. Lơ gre teh druih kiơ̆ băl chơ tuh tơmo, teh pơm trong. ‘Nhŏng Lê Văn Huynh, công nhân oei bơ̆ jang tơ̆ jăl pơm trong TL10 tơroi: “’Nhŏng oh công nhân adrin đĭ jơhngâm. Oei bơ̆ jang tôch tơnăp mă đơ̆ng têt ră mă lei ‘nhŏng oh oei jang đĭ jơhngâm đĕch. Hăm jơhngâm đon đĭ đăng ‘nhŏng oh chơt hơiă ngăl, adrin jang tôch pơnĕh vă jang kĕh trŏ năr hơgăt.”

Kŭm jơhngâm đon chơt hơiă ‘nŏh mơ̆n, ‘nhŏng Phan Viết Trí, Bơngai vei lăng khul pơm trong ƀât TL10 ăn tơbăt, khul đe sư đei 30 ‘nu bơngai, năr Têt Tây, đĭ đăng bơngai lơ̆m khul oei bơ̆ jang hmă đĕch: “Dang ei ‘nhŏng oh oei adrin jang đĭ jơhngâm vă gơh pơm trong trŏ khei ‘năr hơgăt. Mă đơ̆ng tŏ ‘mi ưh kơ ‘lơ̆ng mă lei ‘nhŏng oh oei tơgĕch bơ̆ jang, mă ‘mi oei adrin jang đĕch. Têt Tây oei jang nhen năr hmă đĕch.”

Trong trôm Phượng Hoàng ‘noh jĭ 1 trong trôm tơ̆ trong gre kơdâu hrĕnh Khánh Hoà – Buôn Ma Thuột. Dang ei anih iŏk jang oei ăn lơ bơngai jang, gre kơmăy kơmŏk bơ̆ jang “3 ka - 4 kip” prăt măng prăt năr vă jăh kuer kôch klĕch trong trôm ƀât hơtuch sơnăm 2025. Tơ̆ trong trôm Phượng Hoàng găh dêh char Đắk Lắk, dôm jĭt ‘nu công nhân kŭm hăm gre, kơmăy kơmŏk oei pơđôh mĭn, phă trong, chơ chuĕn teh tơmo lĕch tơ̆ ‘ngoăih, văr kơ lư̆i, pơdơ̆ng jrăng pơsei, pruih bê tông vă hơmet kơjăp trong tôm.

Ƀok Cao Tấn Lực – Phŏ Kơdră vei lăng Khul sir trong tôm Phượng Hoàng, ăn tơbăt: “Công ty tơlĕch trong jang “3 ka, 4 kip” hơnơ̆ng prăt măng prăt năr hăt sir kuer trong trôm. Tơdrong sir kuer trong trôm păih nhôn, găh ‘măng păih Pơmât găh dêh char Đắk Lắk đĭ sir đei 400m bơih, găh ‘ngieu ‘nŏh đĭ đei hlŏh 440m bơih.”

Ƀok Ngô Hiểu Khoa, Kơdră chĕp kơ̆l Grŭp jang Đèo Cả ăn tơbăt, trong trôm Phượng Hoàng kơ jung 1,7 km, đei lơ̆m 1 jăl trong kơjung truh 11 km yoa anih âu iŏk bơ̆ jang ming man. Dang ei 1 năr grŭp jang ăn vă jê̆ 400 ‘nu bơngai jang păng dang 100 tŏ gre kŭm hăm kơmăy kơmŏk vang bơ̆jang pơm trong trôm kŭm hăm 10 tŏ gơng păng trong ƀât anih jang âu. Tơdăh tơdrong chưk pơ ‘ngoăih teh păih Khánh Hoà đei bơ̆ jang hiôk hian, tơdrong pơm klĕch trong trôm âu ƀât hơtuch sơ năm 2025 ưh jor gô jang đei.

Ƀok Ngô Hiểu Khoa, pơma: “Sơnăm 2025, nhôn adrin jang kĕh rim jrăng gơng, hơnă, tơnung gơng. Hơdrô̆ trong trôm Phượng Hoàng oei tơƀâp tŏ sĕt tơdrong pơmat tat găh tơdrong chưk pơ ‘ngoiăh teh găh hơlĕch păih dêh char Khánh Hoà, păng tơdăh gơh pơih đei ‘măng trong trôm adrol kơ Têt Tây sơnăm 2025 ‘nâu păng teh kơjăp ‘lơ̆ng nhen păih âu ‘nŏh ưh jor ƀât hơtuch sơnăm 2025 nhôn gơ̆h sir kuer klĕch trong trôm Phượng Hoàng.”

Tơdrong jang pơm trong gre kơdâu hrĕnh Khánh Hòa - Buôn Ma Thuột kơjung truh 116,5 km, lơ̆m noh đei lơ jăl trong păih dêh char Đắk Lắk. Mă loi, tơdrong jang 3 hlôi jang đang tơdrong chưk pơ ‘ngoăih teh păng ming man đei vă jê̆ 32%. Mă đơ̆ng tơƀâp pơmat tat găh tŏ ‘mi kial, hăm 18 năr ‘mi lơ̆m khei 12, mă lei gơnơm đon pơhnŏng, adrin tôch ai đơ̆ng công nhân, tơdrong jang oei hơnơ̆ng bơ̆ jang đĕch.

Ƀok Đặng Thọ Dần, Kơdră vei lăng tơdrong jang âu ăn tơbăt: “Hrei ‘nâu ƀât anih jang âu vă jê̆ 1 rơbâu ‘nu công nhân oei bơ̆ jang tôch ai, mă ‘mi oei bơ̆ jang đĕch, 500 tŏ kơmăy kơmŏk hăm 49 khul jang ming man tơm tơ̆ trong âu. Nhôn hơnơ̆ng tơtă ăn dôm khul jang bơ̆ jang mă ‘lơ̆ng kiơ̆ luơ̆t, công nhân bơ̆ jang đei jên khei, athei vei lăng tơdrong đei yoa ăn bơngai jang”.

Hăm đon pơhnŏng ƀât hơtuch sơnăm 2025 jang kĕh 68 km trong mă blŭng lơ̆m Trong gre kơdâu hrĕnh Khánh Hòa – Buôn Ma Thuột, dôm anih jang đei ƀơm truh oei tơlĕch jang hrơ̆ch ‘lơ̆ng vă hơtŏk hrĕnh tơdrong jang ming man, tơjur ƀiơ̆ khei ‘năr pơm trong. Dôm năr blŭng sơnăm ‘nao 2025, rơbâu ‘nu công nhân oei bơ̆ jang tơ̆ anih pơm trong. Đe sư jĭ dôm bơngai oei hơtŏk khei ‘năr jang pơm pơkĕh trong gre kơdâu hrĕnh, vang tơgop vă Tây Nguyên pơma atŭm, Đắk Lắk pơma hơdrô̆ đei dơ̆ng tơdrong ‘lơ̆ng vă jang tŏk lơ̆m chăl jang tŏk ‘nao./.