‘Măng mă âu, đei 8 ‘nu kăn ƀô̆ đei rơih, pôk jang lơ kơchư̆k gĭt kăl kơdêh char, lơ̆m noh đei 3 ‘nu kơdră jang lơ̆m Anih chĕp kơ̆l Đảng. Khul kơdră chĕp kơ̆l Đảng dêh char Lâm Đồng tơchơ̆t asong ăn ƀok Đinh Văn Tuấn, pơdơ̆h pơm Bí thư Đảng apŭng Di Linh vă iŏk jang kơchư̆k Phŏ Kơdră vei lăng kon pơlei dêh char Lâm Đồng jăl jang 2021 – 2026. Atŭm hăm ‘nŏh athei ƀok Trần Hồng Quyết pơdơ̆h pơm Kơdră Anih jang Nội vụ dêh char, vang mât jang lơ̆m Khul kơdră chĕp kơ̆l đảng ƀô̆ apŭng Di Linh, pơm Bí thư Đảng apŭng Di Linh jăl jang đơ̆ng 2020 – 2025.

Khul kơdră chĕp kơ̆l đảng dêh char Lâm Đồng oei thei yă Phạm Thị Hồng Hải, Kơdră Anih vei lăng pơtho pơhrăm dêh char năm jang tơ̆ Anih roi tơƀôh păng krao hơvơn kon pơlei dêh char, jang kơchư̆k Phŏ kơdră Anih âu. Rơih, pôk hơtŏk ƀok Vương Tôn Kiên pơm Phŏ Kơdră Anih pơvih ăn Anih chĕp kơ̆l Đảng dêh char; ƀok Nguyễn Văn Hữu pơm Phó Bí thư Đảng apŭng Đơn Dương...

Pơma nơ̆r pơtho tơ̆ hop akŏm, ƀok Nguyễn Thái Học, Bí thư Đảng dang ei kơ dêh char Lâm Đồng pơma hơdăh, tơdrong rơih hơmet, pôk hơtŏk bơngai jang ‘măng mă âu lăng kiơ̆ tơdrong ‘mĕh vă đơ̆ng tơdrong jang tơ̆ tơring, anih jang kơpal, tơdrong gơ̆h hơgei đơ̆ng đe kăn ƀô̆ păng vă rơih hơmet bơngai jang lơ̆m Anih chĕp kơ̆l Đảng dêh char ăn Hop akŏm Đảng ƀô̆ dêh char ‘măng mă XII hai, bơ̆jang trŏ trong, rơih trŏ bơngai păng pơjao trŏ tơdrong jang.