Tơ̆ jơ sơng păng bơ̆jang hăm Bơngai tang măt ăn teh đak Cu- ba tơ̆ Việt Nam- ƀok Rogelio Polanco Fuentes, Kơdră vei lăng Học viện Chính trị quốc gia Hồ Chí Minh Nguyễn Xuân Thắng pơma hơdăh Học viện ling lang lăng kăl păng ‘meh vă pơtrŭt hloh dơ̆ng tơdrong pơvei jang hơdai hăm dôm bơngai jang hơdai Cuba, tơgop hơmet ming tơdrong pơvei pôm nơ̆r ƀơ̆r đon, tơbôl joăt joe đơ̆ng 2 teh đak.

2 păh pơma dơnuh găh dôm tơdrong jang hơdai đơ̆ng Học viện Chính trị quốc gia Hồ Chí Minh păng dôm bơngai jang hơdai kơ teh đak Cuba lơ̆m khei ‘năr âu ki nhen: hơtŏk loi dơ̆ng tơdrong jang pơtho pơhrăm, pơhrăm ming kang ƀô̆, mă loi ‘noh jĭ kang ƀô̆ chĕp kơ̆l, vei lăng gĭt kăl; jang hơdai lơ̆m tơchĕng hơlen lý luận păng dôm tơdrong yan âu mă 2 păh vang bơngơ̆t truh; hơtŏk loi dơ̆ng vang tơroi băl tơdrong hlôh vao găh tơdrong jang vei lăng ‘lơ̆ng đon tơchĕng đơ̆ng Đảng păng tơdrong jang Hnam trưng chĭnh trĭ.