Đơ̆ng chă pơma đam, lơ nơ̆r tơgop akhan, khei năr ou ki, mŭk drăm Việt Nam hlôi hơtŏk kăp gĭt, chŏng mă adoi oei ƀơm lơ tơhlăk tơhlĭn, pơrăm truh sơnong jang păng tơdrong tơgop đơ̆ng anih jang mŭk drăm tơ-'ngla pơm tơm hăm tơdrong hơtŏk tơ-iung mŭk drăm teh đak. Kơyuơ noh, ou jĭ khei năr athei tenh kuăng sut lê̆ tơhlăk tơhlĭn 'noh, tơ-iung jơhngơ̆m pran kơ tơdrong jang mŭk drăm kăp gĭt ou, tơgop pơkăp lơ̆m tơdrong jang đei jơnei tơchơ̆t hơtŏk tơ-iung teh đak truh sơnăm 2030 păng 2045 păng tôm Đảng, tôm kon pơlei hlôi tơlĕch păng khŏm mă pơm kiơ̆.

Pơma ah jơ pơm jang, Ƀok Tổng Bí thư Tô Lâm minh 'măng dơ̆ng ră hơdah, mŭk drăm tơ-'ngla pơm tơm jĭ trong jang kăp gĭt kơ tơdrong jang mŭk drăm sơkơ̆t xah hô̆i chu nghĩa, mă kăl noh ăn tơdrong hơtŏk tơ-iung. Khei năr truh, Đảng, Teh đak gô đei dôm tơchơ̆t kăp gĭt hloh vă pơm trong ăn anih jang mŭk drăm tơ-'ngla pơm tơm hơtŏk pran kơtang hloh dơ̆ng, vă anih jang mŭk drăm hơtŏk jơnap, tơgop kăp gĭt ăn tơdrong hơtŏk tơ-iung mŭk drăm kơ teh đak.