Pơgê 'năr brei (4/2) tơ̆ Anih jang Trung ương Đảng, Ƀok Tổng Bí thư Tô Lâm pơgơ̆r tơdrong hop akŏm Ƀan ƀĭ thư, sơkơ̆t gah tơdrong pơm kiơ̆ Tơchơ̆t kơsô̆ 40 đơ̆ng Ƀan ƀĭ thư gah tơdrong pơgơ̆r Têt Ất Tỵ sơnăm 2025; pơgơ̆r minh ƀar sơnơng jang tơm kơ Trung ương, dôm jăl jang lơ̆m khei năr truh. Sơkơ̆t pơtôch hop akŏm, ƀok Tổng Bí thư Tô Lâm bơnê kơ dôm anih jang, rim tơring hlôi băt hơdah, tơlĕch jang tơnăp, đei jơnei Tơchơ̆t kơsô̆ 40 gah pơgơ̆r Têt Nguyên đan Ất Ty 2025. Gah dôm sơnong jang tơm lơ̆m khei năr truh, drơ̆ng nơ̆r hăm 09 sơnong jang hlôi tơlĕch, ƀok Tổng Bí thư ră hơdah, rim anih jang, rim tơring athei dah jang hloi đơ̆ng rŏng kơ pơdơh Têt, ưh đei pơdui xa têt đunh năr, pơhơi hăm tơdrong jang, akŏm keh đang tơdrong jang trŏ nhen tơchơ̆t tơlĕch kơ khei 2/2025 păng Jăl I/2025; pơgơ̆r lêh akŏm blŭng sơnăm vei sơđơ̆ng, mong răk, sek tơlang dôm tơdrong ưh 'lơ̆ng.

Hơmet tơnăp dôm tơdrong kăl ăn 'măng hop akŏm Kuôk hô̆i ah khei 2/2025, mă kăl noh dôm tơdrong đei tơrĕk truh pơkăp jơnŭm pơgơ̆r jang păng pơklaih tơnap tap, tơhlăk tơhlĭn gah tơchơ̆t jang. Khŏm mă jang đei jơnei dôm tơchơ̆t tơlĕch hơtŏk GDP hloh 8% sơnăm 2025, pơm trong vă hơtŏk 2 kơsô̆ lơ̆m jăl sơnăm 2026-2030.