Tơ̆ 'măng pơma đam, Ƀok Tổng Bí thư Tô Lâm chơt hơ-iă ƀôh tơdrong hơtŏk lui ngeh gah tơdrong tơbôl chĭnh trĭ Việt Nam - New Zealand, jĭ tơdrong tơm vă 2 teh đak hơtŏk jang hadoi tôm tơdrong jang. Ƀok Tổng Bí thư bơnê kơ tơdrong  jơnei lơ̆m pơma đam kơ 2 Thủ tướng, mă kăl noh tơdrong tơlĕch Tơchơ̆t atŭm hơtŏk jang tơbôl Việt Nam - New Zealand jing Teh đak jang hadoi Tôm tơdrong, tơƀôh tơdrong hơtŏk tơ-iung păng lui ngeh gah trong jang tơnăp kơ 2 teh đak, pơm trong kơjăp sơđơ̆ng ăn tơdrong tơbôl 2 teh đak kiơ̆ pơkăp hơtŏk tơ-iung 'nao.

Ƀar ƀok kơdră drơ̆ng nơ̆r gah dôm trong jang hơtŏk tơ-iung lơ̆m jăl jang 'nao; lui ngeh tơdrong jang Tơbôl Tôm tơdrong 'nao gô pơyua atŭm tih tên, tơgop ăn tơdrong rơngei, hơtŏk tơ-iung lơ̆m tơring păng lơ̆m apŭng plenh teh.