Plei Ma Giai, xăh Đất Bằng, apŭng Krông Pa hrei ‘nâu đei um ai ‘lơ̆ng hơiă, trong lơ̆m pơlei đei man rơgŏh ‘lơ̆ng. Kon pơlei tơ âu čhô ‘nă, hưch hanh mưh bâu truh Ama Giai, 1 ‘nu đảng viên tơpăt ‘lơ̆ng, bơngai blŭng a pơjing plei ‘nâu. ‘Nŏh jĭ ƀok Kpă Y Thia, rơnĕh sơnăm 1933, bơngai Chăm Hroi, krao hơvơn kon pơlei choh jang xa 1 dơnơ̆ng, dơ̆ng 1 ƀôt đơ̆ng dôm năr blŭng ‘nao tơblăh iŏk rơngei sơ̆, pơm ăn tơring âu đơ̆ng 6 unh hnam blŭng a tŏk jing pơlei đei kơdrâm bơngai tơ̆ apŭng Krông Pa. Dôm tơdrong tơgop đơ̆ng ƀok đei chih răk, hơnăn ƀok đei iŏk pơm hơnăn pơlei ‘nŏh jĭ Ma Giai kŭm hăm lơ hơnăn nai nhen chơkơi Ma Giai, dơnâu Ma Giai, thong đak Ma Giai.

Ama Giai “đei pơtho đon” jang kăch mang lơ̆m unh hnam păng tơpôl. Hơdrô̆ unh hnam ƀok đei 7 ‘nu đảng viên. Ƀok Bă Văn Hơm, 75 sơnăm, ŏng hơdruch Ama Giai, jĭ Bí thư chi ƀô̆ mă blŭng kơ plei Ma Giai sơnăm 2006, tơroi: “Đơ̆ng năr pơm hla ar lĭ lĭch đảng viên inh kŭm hơmet ming đon tơchĕng. Sơnăm 1975 rơngei hiôk hian oei xa kơpal kông, tơ̆ kơđông ti, inh vih pơlung mĕ ƀă jur oei tơ̆ âu. Inh ưh đei tơchĕng truh tơ̆ jên hu kiơ, lui kiơ̆ Đảng truh tôch, oei ƀlŏk ‘nŏh oei kiơ̆ Đảng, ba hơngăh thoi yơ athei chĕp vei thoi ei.”

Chi ƀô̆ plei Ma Giai đơ̆ng 9 ‘nu đảng viên blŭng a đĭ tŏk truh 26 ‘nu đảng viên hrei ‘nâu. Ƀok La O Khởi, ŏng kơdră Ama Giai, jĭ unh hnam đei ƀôh tơ̆ pơlei. Unh hnam ƀok Khởi chu asong ăn teh đak iŏk pơdreu 2,2 ha teh vă pơjing pơlei oei xa ‘nao, chu pơ ‘nhŏ ăn tơdrong đei yoa atŭm, tơgŭm ăn 62 unh hnam đei tơdrong arih xa sơđơ̆ng ‘lơ̆ng. 

Ƀok La O Khởi tơroi: “Jơhngâm đon đơ̆ng 1 ‘nu đảng viên ‘nŏh ba athei jang mă tơnăp, hơnơ̆ng năm hơdrol đơ̆ng unh hnam truh tơ̆ pơlei pơla. Ba ƀôh đe oei pơmat, đei yă kiơ ‘nŏh tơgŭm ăn yă ‘nei, ưh đei tơmam ‘nŏh ba pơlung hăm ƀơ̆r vă tơƀôh trong ăn đe jang kiơ̆, jang xa thoi yơ vă mŭk drăm lơ̆m hnam gơ̆h tŏk. Lơ̆m hnam tơnŏ ‘nŏh athei pơm thoi yơ vă gơ̆h hiôk jơhngâm, lê̆ ăn đei tơdrong hil hơreh, tĕh hơvĕng băl, lê̆ pơm glăi luơ̆t”

Tơdrong tơplih tơ̆ plei Ma Giai hrei ‘nâu đei lơ tơdrong tơgop, đon adrin đơ̆ng rim jơhnơr đảng viên lơ̆m unh hnam Ama Giai. Đe sư jing bơngai tơƀôh trong chong glung găh jơhngâm đon ‘mêm kơ teh đak, đon jang kăch mang ăn đe đảng viên mơ lôh tơ̆ tơring hŏk pơhrăm jang kiơ̆. Đảng viên La O Thị Hoa, tơroi: “Jĭ bơngai oei mơlôh, kơdih kâu inh hơnơ̆ng adrin vă gơh mât dơ̆ng lơ̆m Đảng. Lơ̆m tơdrong arih xa hơnơ̆ng pơm kiơ̆ trong jang, tơdrong tơgŭm đơ̆ng khôi luơ̆t teh đak. Jơhnơr nhôn hơnơ̆ng lui kiơ̆ Đảng păng trong đe mĕ ƀă yă ƀok sơ̆ hlôi rơih”

‘Nhŏng La O Á- Bí thư Chi ƀô̆ pơm hloi ƀok pơgơ̆r plei Ma Giai xăh Đất Bằng, tơroit: Plei Ma Giai dang ei đei 184 unh hnam hăm 752 ‘nu bơngai, mă lơ ‘nŏh jĭ bơngai Chăm H’roi. Ama Giai jĭ bơngai pơih trong blŭng a ăn tơdrong jang tŏk tơ̆ pơlei pơla hơtăih yăih hlŏh kơ xăh Đất Bằng âu: “Jơhngâm đon hlôh vao gơ̆h hơgei đơ̆ng ƀok Kpă Thia jĭ 1 tơdrong čhôk ‘nă yoa hăm chi ƀô̆ vă đe đảng viên đơ̆ng rŏng âu hŏk pơhrăm, adrin jang, pơm thoi yơ vă gơ̆h đei đon tơchĕng kiơ̆ Đảng, kôn mon kon sâu đơ̆ng rŏng ‘moi kiơ̆. Hăm ƀok Kpă Thia ba năng kăl hlŏh vă adrin bơ̆ jang kiơ̆, pơm thoi yơ vă ning mônh kơnh gơ̆h nhen thoi ƀok, 1 ‘nu bơngai tih vơ̆ djơ̆ ‘lơ̆ng đơ̆ng jang kăch mang truh dang ei vă kon kon sâu đơ̆ng rŏng jang kiơ̆”

Pơma kơ ƀok Kpă Y Thia, yă Cao Thị Viễn Phương, Bí thư Đảng xăh Đất Bằng, apŭng Krông Pa ăn tơbăt, ‘nâu jĭ bơngai vang tơgop tôch gĭt kăl ăn tơdrong jang tŏk muk drăm, tơpôl tơ̆ plei Ma Giai pơma hơdrô̆ păng xăh Đất Bằng pơma atŭm lơ̆m khei ‘năr tơplih ‘nao: “Unh hnam đảng viên Kpă Y Thia jĭ 1 lơ̆m dôm unh hnam jang kăch mang đơ̆ng sơ̆, kơdih kâu ƀok chơt hơiă ‘nao iŏk đei hơnăn 60 sơnăm jang Đảng. Dôm bơngai lơ̆m hnam tơtă bơngai đei đon tơnăp, tơpăt ‘lơ̆ng ngăl. Mă đơ̆ng đĭ kră bơih mă lei ƀok Kpă Y Thia oei hơnơ̆ng năm hơdrol lơ̆m rim tơdrong krao hơvơn jang tŏk mŭk drăm, sut pơđĭ pơngot, tơjur tơnuh hin păng adrin bơ̆ jang lơ̆m tơpôl”

Pơyan Puih mak âu tơbăt 95 sơnăm pơjing păng jang tŏk đơ̆ng Đảng. Dôm bơngai năm hơdrol, tơƀôh trong chong glung nhen unh nham ƀok Kpă Y Thia tôch gĭt kăl vă tơiung pơjing Đảng lơ̆m kon pơlei, jĭ gơng tơƀưh vă kon pơlei truh hăm Đảng, vang kŏm jơhngâm tơiung pơjing tơring teh hơtăih hơtŏ kơ dêh char Gia Lai âu roi đunh roi tŏk pơdrŏng ‘lơ̆ng rŏ./.