Năr “Čhôk ‘nă jĭ hŏk tro, sinh viên Đắk Lắk” đei pơgơ̆r hăm lơ tơdrong jang  nhen hơri hơxoang, tơplŏng kơdâu “Druh dăm pran jăng”, tơdrong tơƀâp, hơri hơxoang Việt - Ấn”, tơdrong thi pơma tơblang “Hưch hanh kơ teh đak Việt Nam”, pơma đam “Hơtŏk tơdrong ‘lơ̆ng đơ̆ng khul sinh viên 5 ‘lơ̆ng”, ngôi pơchơt “Boa hơri chăl mơlôh”, dôm tơdrong jang vang yak hơdoi hăm “Sinh viên 5 ‘lơ̆ng”, “Hŏk tro 3 ‘lơ̆ng”, “Hŏk tro 3 pơtâp pơhrăm” păng tơdrong jang tơbăt 75 sơnăm Năr hŏk tro, sinh viên păng Khul Sinh viên Việt Nam.

Tơdrong hơiă lơ̆m năr âu ‘nŏh jĭ dôm tơdrong jang sinh viên mât hơdai hăm apŭng plenh teh, pơgơ̆r hơri hơxoang Việt Nam - Ấn Độ. Đe sinh viên đei pơma nuh, roi tơbăt găh jŏh ayŏ kơ dŏ xoang, tơdrong lêh pơchơt păng dôm anih chă tơmang lăng ‘lơ̆ng hơiă tơ̆ Đắk Lắk păng Ấn Độ, pơma nuh hăm sinh viên Ấn Độ oei kiơ̆ hŏk tơ̆ Hnam trưng Đăi hŏk Y Dược Buôn Ma Thuột.

Sinh viên Lê Quốc Tuấn, hŏk găh Tơdrong tĕch mơdro, Hnam trưng Đăi hŏk Tây Nguyên tơroi: “’Nâu jĭ ‘măng mă blŭng oh đei truh hăm tơdrong ngôi pơchơt hơdai hăm bôl boăl lơ̆m apŭng plenh teh thoi âu. Kơdih kâu inh ưh gan pơ̆n mă lei mưh truh akŏm tơ̆ âu oh ƀôh đe bôl boăl Ấn Độ tôch chơt rơhău. Đei truh hăm dôm tơdrong ngôi pơchơ̆t hơdai hăm apŭng plenh teh thoi âu oh ƀôh tôch hơiă yoa bơ̆n gơ̆h pơma nuh, hŏk pơhrăm dơ̆ng nơ̆r teh đak đe, hơđơ̆ng jơhngâm dơ̆ng tơ̆ hơnăp lơ bơngai, pơm boăl juăt hăm lơ bôl boăl, đei lơ tơdrong pơvei ‘nao dơ̆ng.”

Ƀlep ƀât ‘măng mă âu, Anih jang đoan dêh char Đắk Lắk roi tơbăt pơjing Câu lạc bộ sinh viên 5 ‘lơ̆ng kơ dêh char, pôk pơ ư “Hŏk tro 3 ‘lơ̆ng”, “Sinh viên 5 ‘lơ̆ng” sơnăm hŏk 2023-2024, pơjao hŏk ƀong “Tơ̆k hơdăh tơdrong hơpơi ‘mĕh – Sơnăm mơlôh Đắk Lắk”, hơpăh hŏk ƀŏng ăn đe sinh viên Lào oei hŏk pơhrăm tơ̆ dôm hnam trưng tơ̆ Đắk Lắk.

Mŏ Phan Thị Trinh, Phó Bí thư Đoan dêh char Đắk Lắk ăn tơbăt, dôm tơdrong jang vă pơjing anih ngôi pơchơt tôch đei yoa ăn hŏk tro, sinh viên, tơiung tơdrong tơguăt 1 ƀơ̆r đon, đon jang tơnăp ăn jơhnơr mơlôh: “Mĭnh anih ngôi pơchơt ăn đe oh vang truh akŏm, pơma nuh, hŏk pơhrăm, mât hơdai hăm apŭng plenh teh, hăm bôl boăl sinh viên Ấn Độ păng Lào. Khul kơdră chĕp kơ̆l đoàn dêh char kŭm đei lơ tơdrong jang ‘lơ̆ng vă yak hơdoi hăm đe oh hŏk tro 3 ‘lơ̆ng, sinh viên 5 ‘lơ̆ng, hŏk tro 3 pơtâp pơhrăm, tơklep hăm dôm tơdrong hơgăt vă đe oh hlôh vao, vang jang ‘lơ̆ng hăm anih jang đoan, khul tơpôl tơ̆ hơnăp kơnh.”

Adrol kơ ‘nŏh, Anih jang đoan dêh char Đắk Lắk, Khul druh dăm Việt Nam dêh char păng Khul Sinh viên Việt Nam dêh char vang pơgơ̆r tơdrong “Tơƀâp păng pôk pơ ư đe sinh viên kon kông gơ̆h hơgei” dêh char Đắk Lắk ‘măng mă 16.

Lơ̆m dôm sơnăm âu ki, dôm tơdrong tơgŭm găh mŭk drăm, jŏh ayŏ kơ dŏ xoang tơ̆ dôm tơring hơtăih yăih, tơring kon kông tơ̆ dêh char Đắk Lắk iŏk đei lơ tơdrong ‘lơ̆ng. Kŭm hăm druh dăm lơ̆m teh đak, druh dăm dôm hơdrech kon kông Đắk Lắk hơnơ̆ng tơƀôh hơdăh anih dơ̆ng, adrin hŏk pơhrăm, jang tŏk lơ̆m tơdrong arih xa. Roi đunh roi đei lơ druh dăm bơngai kon kông gơ̆h hơgei, hŏk kơjung, hŏk iŏk tơdrong rơgei ‘lơ̆ng đơ̆ng khoa hŏk, pơtâp trong arih xa, bơ̆ jang lơ̆m tơpôl vă pơvih ăn teh đak, tơiung pơjing pơlei pơla.

Tơ̆ âu, đe sinh viên vang bơ̆jang lơ̆m lơ tơdrong nhen: Sŏh plang nhang tơ̆ Anih ƀlŏk hơdơ̆r kơ đe linh Năm tơblăh tơ̆ tơring Pơbăh păng plang pơkao ƀât Rup man Ƀok Hô; trong yak “Chă hơlen năng tơdrong jŏh ayŏ kơ dŏ xoang”, Hop akŏm ‘‘Pơma nuh găh tơdrong juăt ‘lơ̆ng đơ̆ng sinh viên Đắk Lắk lơ̆m tơdrong mât hơdai păng jang tŏk’, pơma nuh “Tơguăt sinh viên hăm anih tĕch mơdro”. Kiơ̆ đơ̆ng noh tơgŭm ăn sinh viên hlôh vao hơdăh ƀiơ̆ găh kơjă kăp gĭt đơ̆ng joh ayŏ kơ dŏ xoang păng tơdrong ‘lơ̆ng tơ̆ tơring; pơ̆n pơma nuh, vang tơgop nơ̆r ăn dôm tơdrong jŏh ayŏ kơ dŏ xoang, tơpôl, vang tơgop ăn tơdrong jang tŏk kơ dêh char. 

Sinh viên H’Uyên Byă, tơ̆ Hnam trưng Đăi hŏk Sư phạm plt Hồ Chí Minh tơroi: “Dôm tơdrong jang năr ‘nâu tơgŭm ăn oh băt roi lơ bơngai ƀiơ̆, tơgŭm ăn oh hlôh vao dơ̆ng lơ kơjăp kăp gĭt đơ̆ng joh ayŏ kơ dŏ xoang tơ̆ tơring kơdih rơnĕh păng tih vă. Tơdrong ‘nŏh roi pơm ăn oh ‘mĕh vih tơ̆ pơlei păng jang tŏk mă pran ƀiơ̆ vă gơ̆h tơgŭm ăn pơlei pơla. Năr ‘nâu oh tôch hơiă yoa jĭ 1 lơ̆m kơsô̆ dôm ‘nu sinh viên kon kông đei pôk pơ ư”.

Ƀlep ƀât ‘măng mă âu, Khul Sinh viên Việt Nam dêh char Đắk Lắk hlôi pôk pơ ư 50 ‘nu sinh viên bơngai kon kông rơgei lơ̆m sơnăm hŏk 2023-2024. Pơgơ̆r roi tơbăt Câu lạc bộ Tơdrong juăt ‘lơ̆ng đơ̆ng Sinh viên Đắk Lắk. Câu lạc bộ đei pơjing vă pơm anih ngôi pơchơt tôch đei yoa, tơgŭm ăn đe bôl boăl mơlôh đei tơdrong ‘lơ̆ng vă chă hơlen năng păng chĕp vei dôm kơjă kăp gĭt đơ̆ng jŏh ayŏ kơ dŏ xoang kơ hơdrĕch hơdrung kơdih.