Hăm hơnăn “Hơdruh tơdăm yuk hơlou, iung pơm jang kơyuơ tơdrong hơrih kon pơlei pơla”, lơ tơdrong jang đei pơgơ̆r tôm lơ̆m jơ̆p dêh char nhen 'Năr tơpơh jơk, năr tơm kơ Tơdrong iung pơjing tơring kơdrơ̆m gơh hơgei, akŏm khul jang tơplih kơmăi sô̆ 'măn ăn kon pơlei pơla. Jơnŭm jang Hơdruh tơdăm Việt Nam dêh char Đăk Lăk ăn tơbăt, lơ̆m 3 giĕng tơlĕch jang kiơ̆ khei Hơdruh tơdăm, hlôi đei jê̆ 220 khul năm jang, pơm jang đei hloh 200 tơdrong jang kăp gĭt tơ̆ dôm tơring kon pơlei oei xa.

Jê̆ 160 khul jang Pơtho gah kơmăi sô̆ đei iung jing, vang chă tơgŭm ăn kon pơlei băt gah tơdrong yua kơmăi sô̆. Hơdruh tơdăm lơ̆m dêh char chă tơgop jên, năr jang ming man 25 tŏ hnam lơ̆m tơdrong jang atŭm jơhngơ̆m sut lê̆ hnam pơgia, hnam hyah hyok. Atŭm hăm noh, khul mơlôh lơ̆m jơ̆p dêh char hlôi iŏk jang kiơ̆ Tơchơ̆t kơsô̆ 57-NQ/TW đơ̆ng Anih tơm Chĭn trĭ gah hơtŏk khua hŏk, tơplih kơmăi sô̆ kơ teh đak.