Anih jang vei lăng kon pơlei dêh char Đăk Lăk 'nao tơbang Hla bar pơkăp kơsô̆ 12032 gah tơdrong pơkăp jơnŭm jang kơ dôm anih jang lơ̆m Anih jang vei lăng kon pơlei dêh char, Anih jang vei lăng kon pơlei tơ̆ apŭng vă pơjing jơnŭm jang kơpal kơ teh đak pơm jang tơnăp hloh, pơtrŏ hăm tơdrong hơmet pơ-'lơ̆ng hanh chĭn lơ̆m jăl jang 'nao. Kiơ̆ kơ noh, dêh char gô tơmơ̆t hadoi minh ƀar anih jang, atŭm hăm noh hơmet pơ-'lơ̆ng jơnŭm jang vă tơjur ƀiơ̆ anih jang kơpal, hơtŏk jang tơnăp hloh tơdrong jang vei lăng kơpal. Hơdah: Anih Asong jang hăm Anih jang Jên hu gô tơmơ̆t jang hadoi jing Anih jang Mŭk drăm – Jên hu. Anih jang Mŭk drăm păng Cham char tơmơ̆t hăm Anih Choh jang xa păng Hơtŏk tơring tơrang jing Anih Choh jang xa păng Cham char.

Anih jang Ming man păng Anih jang gah Trong nơnăm chơ tơmam drăm gô tơmơ̆t jang hadoi jing Anih jang Ming man păng Trong nơnăm chơ tơmam drăm. Anih jang Nô̆i vŭ păng Anih Asong jang Linh jĭ rơka păng Tơpôl gô jang hadoi jing Anih jang Nô̆i vŭ păng Asong jang. Anih jang Khua hŏk Kŏng ngê̆ hăm Anih jang Tơroi tơbăt gô tơmơ̆t hadoi jing Anih jang Khua hŏk Kŏng ngê̆ păng Tơroi tơbăt. Dêh char adoi tơmơ̆t jang hadoi Anih Rađiô Pơdah tivi hăm Anih jang Ƀăo Đăk Lăk jing Anih jang Tơroi tơbăt dêh char Đăk Lăk, tơgŭm hơtŏk pơ-'lơ̆ng tơdrong jang tơroi tơbăt pơtruh kơtơ̆ng ang.