Pơgê năr 1 Têt Dương lĭch 2025, gre păr kơ Vietnam Airlines đei kơsô̆ pơkăp VN1603 đơ̆ng Hà Nội - Buôn Ma Thuột păr jur ah cham gre păr Buôn Ma Thuột, dêh char Đăk Lăk chơ ba 120 'nu tơmoi păng bơngai jang lơ̆m gre păr. 'Nâu jĭ tơmoi mă 1 triu 5 hrĕng rơbâu păng Jĭ khul tơmoi mă blŭng  "juă teh" dêh char Đăk Lăk lơ̆m sơnăm 2025 kiơ̆ trong gre păr.

Tơ̆ anih pơdơh jơ̆ng cham gre păr Buôn Ma Thuột, lêh sơng tơmoi kơsô̆ "minh triu pơđăm hrĕng rơbâu" păng khul tơmoi mă blŭng truh Đăk Lăk ƀơ̆t têt dương lĭch 2025 đei pơgơ̆r kăp gĭt hăm tơdrong pơdreh chĭng chêng păng joh hơri kăp gĭt. Tang măt ăn anih jang tơmang pơhiơ̆ Đăk Lăk păng anih vei lăng cham gre păr Buôn Ma Thuột pôk pơkao păng tơmam sơng drơ̆ng đe tơmoi mă blŭng truh hăm dêh char lơ̆m blŭng sơnăm 'nao.

Pŭn ai jĭ tơmoi kơsô̆ "minh triu pơđăm hrĕng rơbâu" truh Đăk Lăk, pơmai Lưu Minh Lan, oei tơ̆ quận Long Biên, Hà Nội sô̆ hơ-iă hăm tơdrong sơng drơ̆ng kăp gĭt đơ̆ng dêh char Đăk Lăk lơ̆m năr blŭng sơnăm 'nao:

 “Blŭng puih mak sơnăm 'nao tôm unh hnam inh năm hadoi, đe kon sou adoi năm pơdơh pơdơi noh unh hnam inh oei tơ̆ âu lơ̆m 1 giĕng, chă tĕch răt tơmam drăm păng chă năm tơmang rah dôm anih 'lơ̆ng rŏ tơ̆ âu. Inh năm tơmang minh ƀar anih bơih, 'măng mă âu inh năm tơmang chơkơi Gia Long đang kơ noh năm tơmang dơnâu Lăk”

Lêh sơng tơmoi kơsô̆ "minh triu pơđăm hrĕng rơbâu" păng khul tơmoi mă blŭng truh Đăk Lăk ƀơ̆t têt dương lĭch 2025 jĭ tơdrong jang ang hơdah hloh lơ̆m năr blŭng sơnăm 'nao vă hơtŏk um rŭp, hơnăn tơmang pơhiơ̆ Đăk Lăk, hơvơn lơ bơngai tơrĕk truh, mă kăl noh tơmoi lơ̆m păng 'nguaih kơ teh đak. Atŭm hăm noh, âu adoi jĭng 'măng vă tơroi dôm anih tơmang pơhiơ̆ kăp gĭt păng mŭk drăm hơtŏk jang tơmang pơhiơ̆ kơ dêh char, tơgop kăp gĭt lơ̆m tơdrong hơtŏk hơnăn tơmang pơhiơ̆ Đăk Lăk. Yă Nguyễn Thụy Phương Hiếu, Phŏ kơdră Anih jang Joh ayŏ, Tơplŏng kơdâu păng Tơmang pơhiơ̆ Đăk Lăk ăn tơbăt:

“Anih jang adoi hơpơi 'meh đe tơmoi lơ̆m 'măng păr juă jơ̆ng truh Đăk Lăk gô băt hơdah bơngai Đăk Lăk hlôh vao, dơnưp dim, 'mêm kơ tơmoi. Hloh kơ đe ah nai, khul tơmoi âu gô tơroi, tơbang gah um ai, kon bơngai Đăk Lăk truh hăm 'nhŏng oh, bôl boăl păng đơ̆ng rŏng kơ noh adoi kơdih đe sư jing bơngai chơng trong tơroi tơbăt kơ Đăk Lăk hăm dôm tơdrong akŏm đei, tơgop pơm hơtŏk kơsô̆ tơmoi truh hăm Đăk Lăk”

Sơnăm 2024, tơdrong jang đei yua đơ̆ng tơmang pơhiơ̆ tơ̆ Đăk Lăk tŏk hloh 21% pơtêng hăm sơnăm hơdrol sơ̆. 'Nâu jing tơdrong hơ-iă hăm Đăk Lăk lơ̆m tơdrong hơdrin hơtŏk dôm tơmam drăm 'nao, tơrĕk truh tơdrong jang kăp gĭt lơ̆m joh ayŏ tơring groi kông să seng.

Sơnăm 2024, tơdrong đei yua đơ̆ng tơmang pơhiơ̆ kơ jơ̆p dêh char Đăk Lăk đei 1.255 tih hlj, tŏk hloh 21% pơtêng hăm sơnăm 2023, Đăk Lăk hlôi sơng 1,5 triu 'nu tơmoi. Kơsô̆ tơmoi đơ̆ng teh đak đe truh Đăk Lăk adoi tŏk hloh 34% pơtêng hăm sơnăm hơdrol ki.

Anih hơdah hloh lơ̆m tơdrong jang tơmang pơhiơ̆ kơ dêh char sơnăm âu ki noh tơguăt hăm tơdrong jang sơng tơbăt 120 sơnăm tơ-iung pơjing dêh char Đăk Lăk. Dêh char hlôi pơgơ̆r lơ tơdrong tơmang pơhiơ̆ tơ̆ pơlei pơla tơ̆ dôm tơring, iŏk yua tơdrong pran kơ rim hơdrung bơngai kon kông vă pơjing um ai kơdih.

Lơ̆m noh, Tơdrong jang tơguăt mŭk drăm “chĭng chêng Tây Nguyên lơ̆m tơdrong jang tơmang pơhiơ̆ kiơ̆ mŭk drăm joh ayŏ Buôn Ma Thuột – Đăk Lăk” gô đei pơih să lơ̆m khei năr truh. Ƀok Lại Đức Đại, Phŏ Kơdră Anih Joh ayŏ, Tơplŏng kơdâu păng Tơmang pơhiơ̆ Đăk Lăk ăn tơbăt, tơdrong jang tơgŭm kon pơlei băt hơdah hloh gah kơjă mŭk drăm joh ayŏ mă kơdih po oei vei, vă pơ-ư pơ-ang păng pơtoi pơjao tơdrong juăt jue joh ayŏ chĭng chêng Tây Nguyên; pơm trong hiôk vă mŭk drăm joh ayŏ chĭng chêng jing jơhngơ̆m pran ăn tơdrong jang tơmang pơhiơ̆, tơguăt kon pơlei păng pơjing um rŭp jang tơmang pơhiơ̆:

“Gô đei tơdrong jang hadoi kơjăp hloh, ưh hơdrô̆ tơlĕch 1-2 tơdrong jang mă gô tơlĕch lơ tơdrong jang hrơ̆p minh 'măng, pơih dôm lăm hŏk pơtoi băl atŭm đei tơdrong vang jang đơ̆ng rim bơngai juăt jang, đe ngê̆ nhơ̆n. Tơdrong chih măt đơ̆ng dôm tơring kơchăng kơdih adoi nhen tơchơ̆t đơ̆ng blŭng kơ Anih jang tơpă gô đei tơdrong pơtoi hăm lơ lăm pơhrăm tơnăp păng đei yua kơjung hloh”.