Chă dăr tơ̆ rim anih tĕch mơdro, siêu thị păng kơchơ lơ̆m plt Buôn Ma Thuột, dêh char Đắk Lắk gơ̆h ƀôh jơhngâm hưch hanh kơ têt hlôi truh tôch chơt hơiă. Lơ anih tĕch mơdro păng siêu thị hơmet pơrŏ, ming pơdă lơ tơmam kăl vă tĕch ăn kon pơlei ƀât têt.

Oei chă rơih tơmam Tết tơ̆ anih tĕch mơdro rok trong Nguyễn Văn Cừ, mŏ Trần Thảo Nguyên, tơ̆ phường Tân Lập, tơroi: “Tơmam Têt sơnăm ‘nâu lơ tơpă, đei kơjă lăp dơ̆ng. Têt chă răt dơ̆ng bơ̆n ƀĕnh keo, tơmam xa, ƀier, đak ƀăt păng lơ tơmam đei tăh hơmet lơ̆m tơpu vă ăn kơ mĕ ƀă, yă ƀok, duch nă. Hnam nhôn hơnơ̆ng kơ chă răt tơmam nhen thoi rim sơnăm mă ưh đei răt măn hơdrol kiơ, yoa hrei ‘nâu kơchơ lai yơ kŭm đei tơmam ‘lơ̆ng ngăl.”

Tơ̆ kơchơ Tân An, 1 lơ̆m dôm kơchơ tih kơ plt Buôn Ma Thuột, dôm bơngai pơdro oei pơdă tĕch lơ tơmam Têt hrôih ƀiơ̆ kơ rim sơnăm. Mŏ Đồng Thị Thanh Trúc, bơngai tĕch ƀĕnh keo, tơroi sơnăm ‘nâu mă răt mong tơmam lơ ƀiơ̆ 30% pơting hăm sơnăm sơ̆ păng pơtơm tĕch đơ̆ng blŭng khei 12.

Tơ̆ dôm siêu thị păng anih tĕch mơdro tơmam tih, tơma vă tĕch ƀât têt kŭm đet hơmet hrôih. Kiơ̆ đơ̆ng hơlen năng tơ̆ anih tĕch mơdro păng tơdrong jang mŭk drăm lơ̆m sơnăm 2024, dôm anih tĕch mơdro hlôi răt ‘măn lơ tơmam tŏk đơ̆ng 30% - 50% pơting hăm sơnăm sơ̆. ‘Nhŏng Lê Xuân Hoan, vei lăng rim anih tĕch mơdro tih tơ̆ Đắk Lắk, ăn tơbăt: anih hlôi ‘măn hơmet tơmam lơ ƀiơ̆ 50% pơting hăm Tết Giáp Thìn. Hơdai hăm tơdrong ‘măn hơmet tơmam păng tơlĕch trong hơpăh tôch hơiă, sơnăm ‘nâu, dôm anih tĕch le oei năng kăl truh tơmam ‘lơ̆ng, mă loi đơ̆ng rŏng đei tơđăh tơh đe ơng hăm đak pơgang tơ̆ kơchơ tơm păng 1,2 anih tĕch mơdro: “Dôm tơmam ‘măn răk athei ‘lơ̆ng, lăp hăm tơdrong hơgăt tơmam rơgŏh. Tơmam ‘măn răk lơ mă lei ưh đei chơ ming hrăt hrot tơ̆ anih tech mơdro, ming akŏm tơ̆ anih mong lơ̆m Tơring jang kơmăy Tân An, đĭ ‘nŏh chơ iŏk dơ̆ng.”

Vă pơlung đe răt tơmam ƀât Tết, lơ siêu thị oei tơlĕch lơ trong hơpăh, tĕch tơjur kơjă tôch hơiă. Hơdai hăm ‘nŏh, dôm siêu thị oei hơtŏk khul bơngai jang păng pơih xă jơ pơvih pơvăn, kiơ̆ đơ̆ng pơih ‘măng hrôih ƀiơ̆ păng tang ‘măng klui ƀiơ̆ kơ năr hmă lơ̆m 2 giĕng adrol kơ Tết. Kiơ̆ yă Trần Thị Thành Nhân, Phŏ Kơdră chĕp kơ̆l siêu thị Co.opmart Buôn Ma Thuột, tơmam vă tĕch ƀât Tết tơ̆ siêu thị tŏk đơ̆ng 30 - 50%, lơ̆m noh tơmam Việt đei truh 90%. Siêu thị tơlĕch trong hơpăh tơmam, tơjur kơjă hăm rơbâu kơloăi tơmam đơ̆ng ‘năr 1/12/2024 – ‘năr 28/1/2025."

“Anih răt ‘măn tơmam lơ̆m 2 khei tĕch ƀât Tết loi 80 ti, lơ̆m noh lơ tơmam vei sơđơ̆ng kơjă tĕch đei hlŏh 20% păng anih oei pơ ‘nhŏ ăn dôm tơmam yoa kăl nhen phe ƀa tơmam xa, ‘nhĕm rơmo, iĕr bip kŭm hăm’nhot, plei ‘long păng dôm tơmam juăt yoa lơm năr Tết hăm kơjă  tĕch dang ăi hăm hơdrol păng đơ̆ng rŏng kơ Tết vă pơvih ăn tơdrong ‘mĕh răt yoa đơ̆ng kon pơlei.”

Vă vei lăng sơđơ̆ng ‘lơ̆ng anih tĕch mơdro ƀât hơtuch sơnăm păng Tết Nguyên đán Ất Tỵ 2025, Anih vei lăng kon pơlei dêh char Đắk Lắk tơlĕch trong ‘măn răk tôm tơmam yoa kăl. Dang ei, 11 anih tĕch mơdro tih hlôi hơmet tơmam đei kơjă hlŏh 507 ti hlak jên, pơm lăp dang 36,4% tơdrong ‘mĕh răt yoa đơ̆ng kon pơlei. Dôm tơmam đei vei sơđơ̆ng kơjă tĕch ‘nŏh phe ƀa tơmam xa, tơmam hlôi đei pai sĭn, ‘nhĕm rơmo, nhŭng, iĕr, đak kho, sĭk, ƀôt ngok, ‘nhot, plei ‘long păng đak xăng. Tơdrong vei sơđơ̆ng kơjă tĕch gô đei tơlĕch đơ̆ng ‘năr 15/12/2024 truh 28/2/2025.

Ƀok Lưu Văn Khôi, Kơdră Anih vei lăng jang kơmăy, tĕch mơdro Đắk Lắk ăn tơbăt, kŭm hăm vei lăng ‘lơ̆ng tơmam, tơdrong dăr hơlen vei lăng tơ̆ anih tĕch mơdro tơmam Tết kŭm đei lơ anih jang kơpal tơlĕch jang hrơ̆ch ‘lơ̆ng: "Nhôn hơnơ̆ng hơlen năng rim tơdrong tơ̆ anih tĕch mơdro păng tơtom tơlĕch trong tơjră vă vei lăng ‘lơ̆ng măh mai tơmam, atŭm hăm ‘nŏh pơlung dôm anih tĕch mơdro hơtŏk tơdrong jang xa, pơtruh tơmam, tĕch mơdro pơm lăp hăm tơdrong răt yoa tơmam đơ̆ng kon pơlei."

Hăm tơdrong hơmet tôch ‘lơ̆ng tơmam drăm, đei trong pơlung răt yoa tơmam tôch hơiă păng vei lăng rim tơmam rơgŏh ‘lơ̆ng, anih tĕch mơdro tơmam Tết Nguyên đán Ất Tỵ 2025 tơ̆ Đắk Lắk hlôi kơchăng rim tơdrong vă pơm lăp hăm tơdrong ‘mĕh vă răt yoa tơmam đơ̆ng kon pơlei./.