Hrei ou, rim hơnih tĕch mơdro, siêu thĭ păng kơchơ tơ̆ pơlei tơm Buôn Ma Thuột, dêh char Dak Lăk, jơ ‘năr Têt hlôi rơ-ông rơ-ang. Rim hơnih mơdro păng siêu thĭ hlôi hơmet pơrŏ pơ ‘lơ̆ng tơmam drăm kăl tơgŭm ăn kon pơlei răt yoa lơ̆m jơ ‘năr Têt. Siêu thị Co.opmart Buôn Ma Thuột hlôi ‘măn tơmam drăm Têt kơjă kơjên 80 ti hlak jên, lơ̆m ou tơmam drăm Việt tơmơ̆t 90%. Siêu thị tơlĕch jang kiơ̆ tơjur kơjă rơbou tơmam drăm đơ̆ng năr 1/12/2024 truh năr 28/1/2025. Dôm tơmam drăm pơm sơđơ̆ng kơjă hloh 20% ‘noh tơmam drăm: phe ƀa, rim tơmam drăm, ‘nhĕm kon tơrong, kon kơlap păng dôm tơmam drăm sa kăl kơ năr Têt. Vă sơđơ̆ng ăn tĕch mơdro lơ̆m hơtuch sơnăm păng Têt Nguyên đán Ất Tỵ 2025, Hơnih vei lăng kon pơlei dêh char Dak Lăk hlôi tơlech trong jang mong răk tơmam drăm kăl. Hrei ou tơ̆ 11 hơnih mơdro sa tih hlôi hơmet ăn tơmam drăm hăm kơjă kơjên hloh 507 ti hlak jên, sơđơ̆ng dang 36,4% tơdrong ‘meh vă răt yoa kơ kon pơlei. Rim tơmam drăm pơm sơđơ̆ng kơjă nhen phe ƀa, ‘nhĕm, đak rơmă, sĭk, ƀôt ngok, ‘nhot sa păng đak xăng đak dou.