Pơgê 26/2, tơ̆ pơlei tơm Buôn Ma Thuột, Khŭl pơgơ̆r Lêh Cheh phe Buôn Ma Thuột ‘măng mă 9 sơnăm 2025, hơnơ̆ng hop akŏm roi tơbăt găh tơdrong ‘nâu. ‘Nâu jĭ ‘măng hop akŏm roi tơbăt hăm khŭl chih kơtơ̆ng ang ‘măng mă 3 đơ̆ng rŏng 2 ‘măng pơgơ̆r tơ̆ pơlei tơm Hồ Chí Minh păng Hà Nội. Sơnăm ‘nâu, lêh gô đei 17 tơdrong jang.

Hơdai hăm dôm tơdrong jang lei lăi dôm ‘măng lêh hơdrol, lêh ‘măng âu đei pha lơ hăm dôm tơdrong jang đei pơgơ̆r vă kơkuh chơt hơiă 50 sơnăm rơngei Buôn Ma Thuột,  nhen lêh pơm Hnam kơmăy cheh phe ŭnh hơyuh Trung Nguyên Legend; Lêh tơlĕch jang Tơdrong jang akŏm Hơnih tĕch mơdro - Hnam tơmoi ƀĭch pơdơh - Hnam oei tơ̆ pơlei tơm Buôn Ma Thuột; lêh tơlĕch jang tơdrong jang tơmơ̆t jên jang ming man Hơnih jang kơmăy kơmŏk Phú Xuân. Lêh cheh phe Buôn Ma Thuột ‘măng mă 9 sơnăm 2025, hăm hơnăn “Buôn Ma Thuột - Hơnih truh kơ cheh phe apŭng plĕnh teh” vă pơgơ̆r đơ̆ng ‘năr 09/3/2025 truh 13/3/2025. Ƀok Nguyễn Tuấn Hà, Phŏ Kơdră Anih vei lăng kon pơlei dêh char Đắk Lắk, Kơdră khŭl pơgơ̆r Lêh roi tơbăt, ‘nâu kŭm jing tơdrong jang pơtrŭt tĕch mơdro đei tơdrong ‘lơ̆ng gĭt kăl; jing tơdrong hiôk vă dôm bơngai vei lăng, anih mơdro sa păng bôl buăl apŭng plĕnh teh tơƀơ̆p, jang hơdai tĕch mơdro, hơdai hăm roi tơƀôh hơnăn cheh phe Buôn Ma Thuột, hơtŏk tơiung tơmang lăng păng tơgoăt hơdai tĕch mơdro.