Jơnŭm pơgơ̆r kon pơlei dêh char Đắk Lắk hlôi pơdrơ̆ng kiơ̆ Tơdrong tơchơ̆t găh pơjing ‘nao 6 anih jang ‘noh: Anih jang Nội vụ, Anih vei lăng jên hu, Anih vei lăng găh Choh jang sa păng Cham char, Anih vei lăng Ming nan, Anih jang Khoa hŏk păng Kơmăy kơmŏk, Anih vei lăng Hơdrĕch kon kông păng Lui khop, hơdai hăm pơtôch bơ̆jang đơ̆ng Anih jang tơgŭm ăn Anih vei lăng kon pơlei dêh char.

Đơ̆ng rŏng kơ proh hơmet, dêh char Đắk Lắk đei 13 anih joăt jang găh Anih vei lăng kon pơlei dêh char. Jơnŭm pơgơ̆r kon pơlei dêh char Đắk Lắk kŭm pơdrơ̆ng kiơ̆ Tơdrong tơchơ̆t pơtôch bơ̆jang kơ Anih vei lăng hơdrĕch kon kông (kơ Jơnŭm pơgơ̆r kon pơlei dêh char). Đơ̆ng rŏng kơ proh hơmet, Jơnŭm pơgơ̆r kon pơlei dêh char Đắk Lắk đei 3 Anih, ‘noh: Anih vei lăng Mŭk drăm - Jên jang; Anih jang găh khôi luơ̆t; Anih vei lăng Joh ayŏ - Tơpôl. Kŭm tơ̆ ‘măng hop akŏm âu, Jơnŭm pơgơ̆r kon pơlei dêh char Đăk Lăk hlôi pơdrơ̆ng kiơ̆ hơmet ming, tơmơ̆t dơ̆ng hơnăp jang hơtŏk tơiung mŭk drăm - tơpôl sơnăm 2025 hăm tơdrong tơm jang tŏk đei 8% tơ̆ kơpal.