Kiơ̆ tơdrong jang “Hơtŏk loi dơ̆ng iŏk yua kơmăy kơmŏk kơtơ̆ng ang păng tơplih kơsô̆ lơ̆m pơtho pơhrăm jăl jang 2022-2025, trong jang truh sơnăm 2030 lơ̆m dêh char Đắk Lắk”, sơnăm 2025, đĭ đăng dôm anih pơtho pơhrăm lơ̆m dêh char pơjing păng iŏk yua jơnei hơnih mong răk hla ar hŏk trực tuyến, iŏk yua kơmăy kơmŏk kơtơ̆ng ang lơ̆m tơplih ‘nao pơtho hŏk păng hơlen lăng.

Tơdrong pơtho hŏk pơhrăm đei tơlĕch jang kiơ̆ trong trực tuyến iŏk đei jô̆ păh lăp 5% tơ̆ jăl 1, 10% tơ̆ jăl 2. Jang kiơ̆ tơdrong jang ‘nâu, dang ei anih jang găh pơtho pơhrăm Đắk Lắk hlôi iŏk yua jơnei hơnih mong răk hla ar găh pơtho hŏk mầm non, pơtho hŏk phô thŏng păng pơtho hŏk hơnơ̆ng; tơlĕch jang hơdai hla ar chih răk dôm kơmăy kơtơ̆ng ang nai lơ̆m hơnih mong răk anih jang; tŭn pran iŏk yua kơmăy kơmŏk kơtơ̆ng ang lơ̆m dôm hnam trưng găh tơplih ‘nao trong pơtho hŏk, pơlong păng hơlen lăng, tơdrong jang pơhrăm ming kang ƀô̆ vei lăng, thây kô pơtho, tơdrong jang rơih hŏk tro mơ̆t hŏk.