Dêh char Đak Lăk dang ei đei pơhlom 10 rơbâu bơngai tŏk bŏk oei hơrih, hŏk pơhrăm, pơm jang tơ̆ 29 teh đak păng lơ̆m tơring. Lơ̆m 5 sơnăm kơ âu, kon pơlei bơ̆n hơrih pơm jang tơ̆ teh đak đe hlôi tơgop hloh 140 triu đôlar vă pơjing păng hơtŏk pơlei pơla, hăt hot vang jang dôm tơdrong jang pơyua ăn tơpôl, jang tơdrong ƀlŏk bơnê tơ̆ dôm tơring, tơgop lơ̆m tơdrong hơtŏk mŭk drăm tơpôl kơ dêh char Đak Lăk. Ƀok Nguyễn Tuấn Hà, Phŏ Kơdră Anih jang vei lăng kon pơlei dêh char Đak Lăk sơkơ̆t hơdah, dêh char kơchăng tơmơ̆ng, chih akŏm nơ̆r tơgop đơ̆ng kon pơlei, anih jang mŭk drăm păng kon pơlei bơ̆n hơrih păng pơm jang tơ̆ teh đak đe; pơm trong hiôk vă kon pơlei bơ̆n pơtoi tơgop pơjing pơlei pơla roi năr roi hơtŏk tơ-iung.

Lơ̆m 'măng akŏm, hăm tơdrong tơnŏ 'lơ̆ng, kon pơlei bơ̆n hơrih pơm jang tơ̆ teh đak đe tơroi kơ dôm tơdrong sô̆ hơ-iă hăm tơdrong tơplih tih tên kơ pơlei pơla teh đak.