Iung pơma tơ̆ pơm lêh, ƀok Lưu Văn Trung, Kơ iĕng Kơdră chĕp pơgơ̆r Đảng dêh char, Kơdră chĕp pơgơ̆r Jơnŭm vei lăng kon pơlei dêh char Dak Nông sơkơ̆t hơdăh, chih kơtơ̆ng ang hlôi yak hơdoi hăm dêh char vă yak hloh mĭnh sơnăm mơmat tat, iŏk đei jơnei tih tên lơ̆m rim tơdrong. Lơ̆m ou, mă kăl ‘noh Dak Nông hlôi pơgơ̆r jơnei Pơm lêh tơbăt 20 sơnăm năr pơjing dơ̆ng păng sơng iŏk Mê đai Độc lập hạng Nhất; chỉ số PCI kơ dêh char tŏk 17 kơnao, dơ̆ng mă 21 lơ̆m teh đak. Tơ̆ Hop akŏm pơtôch bơ̆ jang chih kơtơ̆ng ang, Hơnih Đảng dêh char Dak Nông hlôi pơgơ̆r pôk ăn tơmam hơpăh  Búa Liềm vàng ‘măng mă 9, sơnăm 2024 ăn 33 ƀai chih ‘lơ̆ng kơ 63 ƀai chih pơtruh vang pơlong. Hơnih bơ̆ jang kơtơ̆ng ang tơring Tây Nguyên kơ Radiô NPMVN iŏk đei 3 tơmam hơpăh găh tơdrong rapor ‘noh đei: tơmam hơpăh B hăm ƀai chih “Ăn đang viên ƀô̆ đô̆i vih hăm pơlei pơla, trong ƀôh hơdăh đơ̆ng Đak Nông”, tơmam hơpăh C hăm ƀai chih “Pơm hơtŏk ‘lơ̆ng hop akom chi ƀô̆ lơ̆m tơring kon kông tơ̆ Dak Nông” păng tơmam hơpăh pơchhơp jơhngơ̆m hăm ƀai chih “Pơm hơtŏk jơhngơ̆m đon hưch hanh ‘Mêm kơ eng teh đak ‘moi kiơ̆ pơgơ̆r pơtho tơbăt găh sơlam teh đak”.