Pơyan tŏ tơring sơlam apŭng Cư Jut dêh char Đắk Nông tŏ hlơ hlĕng. Lơ̆m tơƀôt 833, rơng bri Đắk Wil, xăh Đắk Wil, ‘nhĕt đĭ kro, ‘long tă jô hŏnh ngăl bơih, pơm ăn hơmơt kơ ŭnh sa tŏk kơsô̆ 4. ‘Nhŏng Phạm Văn Nhị, bơngai jang kơ Anih vei lăng bri ‘long kơsô̆ 1, Kŏng ti Bri ‘long Đắk Wil roi tơbăt 6 ‘nu bơngai jang kơ anih jang athei ling lang bơ̆jang, tơlĕch dôm hơnăp jang tang găn ŭnh sa bri:

“Nhôn gơvar tơring đang kơ ‘noh soh rim hơnih, lăp soh lơ̆m hơnih gơvar vă vei lăng ŭnh. Găh trong chor găn ŭnh, ‘nhŏng oh kŭm pơgơ̆r chong hơmet rơgoh, pơm hơtăih đơ̆ng 5 - 7 met, vă kơ mưh đei ŭnh sa, tơdrong sa mơmrok gô ưh kơ đei ƀôh. Hăm dôm trong kon pơlei hơnơ̆ng mơ̆t lĕch, nhôn pơm kơƀang kơ̆m ŭnh păng tơroi tơbăt vă kon pơlei hoei kơ mơ̆t soh ŭnh kư̆ kă”.

Kŏng ti Bri ‘long Đắk Wil tŏk bŏk vei lăng vă jê̆ 29.000 hek tar bri, lơ̆m noh 100 hek tar bri pơtăm, uơ oei dơ̆ng ‘noh bri brăh, oei tŏk bŏk 2 dêh char Đắk Nông, Đắk Lắk păng tơtil sơlam Campuchia. Ƀok Nguyễn Hồng Việt, Phŏ Kơdră vei lăng kŏng ti, tơroi ‘năr tơ̆ tơring sơlam tŏ hloh kơ dôm tơring nai đơ̆ng 7-10 độ C, pơm ăn hơmet kơ ŭnh sa bri lơ hloh. Yua thoi noh, tơdrong jang tang găn ŭnh sa, pĭt ŭnh sa bri ling lang đei anih jang tơlĕch jang hrôih hloh:

“Mơ̆t lơ̆m pơyan tŏ, kŏng ti rim năr năm dăr joang, chă ƀôh đei tơƀôt hơyơ hơmơt kơ ŭnh sa gô gơvar hơnih, hơmet ăn ‘nhŏng oh soh hơmet pơ ‘lơ̆ng hloi. Đĭ đăng đei 11 hơnih vei lăng bri, 1 hơnih đei 2 kơthŭng đak tih răk hiă hăm dang 4.000 kơlich 1 kơthŭng tih păng 1 kơthŭng đak yua dang 5.000 kơlich, mưh đei ƀôh ŭnh sa gô yua gre chơ năm vă pĭt ŭnh sa. ‘Ngoăih kơ ‘noh, dôm anih jang đei hơmet ăn kơƀĭnh dŏng pĭt ŭnh sa tôm ngăl”.

Dêh char Đắk Nông dang ei oei dang 249.000 hek tar bri, lơ̆m noh đei hloh 196.300 hek tar bri brăh, akŏm găh lơ tơ̆ dôm apŭng Đắk Glong, Đắk Mil, Đắk Song, Cư Jút păng Tuy Đức. Kiơ̆ kơ ƀok Trần Văn Linh, Phŏ Kơdră anih vei lăng Bri ‘long dêh char Đắk Nông, sơnăm 2024, lơ̆m dêh char đei ƀôh 30 ‘măng ŭnh sa, pơm hiong răm dang 32 hek tar, tŏk lơ pơting hăm dôm sơnăm hơdrol. Vă tơ jur tŏ sĕt kơsô̆ ‘măng ŭnh sa bri, Anih jang hlôi lăng đơ̆ng hơdrol, pơjing hrôih dôm trong jang vă hơtŏk ‘lơ̆ng tơdrong jang vei lăng păng tang găn ŭnh sa, pĭt ŭnh sa bri.

Ƀok Trần Văn Linh roi tơbăt: “Anih vei lăng Bri ‘long dêh char hlôi jang tơgŭm ăn Anih vei lăng găh Choh jang sa păng Hơtŏk tơiung tơring tơrang, Anih vei lăng kon pơlei dêh char Đắk Nông athei dôm Khŭl vei lăng bri kơdrơ̆ng, tang găn; Anih vei lăng kon pơlei dôm apŭng, pơlei tơm hơtŏk loi dơ̆ng tơdrong jang dăr joang, hơlen lăng dôm hơnih tơm đei hơmơt kơ đei ƀôh ŭnh sa bri vă vei lăng, dăr lăng tang găn ŭnh sa. ‘Ngoăih kơ ‘noh, Anih jang hlôi athei dôm anih vei lăng bri ‘long, dôm tơ ngla bri hơtŏk loi dơ̆ng hơlen lăng, dăr lăng tơdrong jang tang găn ŭnh sa bri pơyan tŏ; jang hơdai hăm dôm Khŭl vei lăng bri, kŭm nhen dôm kŏng ti bri ‘long bơ̆jang tơdrong jang răp găn, hơlen lăng, dăr joang, vei lăng bri păng tang găn ŭnh sa, pĭt ŭnh sa bri lơ̆m pơyan tŏ sơnăm 2025.”