Mă hơdăh, Jơnŭm vei lăng kon pơlei dêh char Dak Nông hlôi tơchơ̆t găh tơdrong hơgrop jing mĭnh, pơjing ‘nao mĭnh ƀar hơnih jang ‘noh: Hơgrop jing mĭnh Hơnih jang vei lăng Kơtơ̆ng ang Pơre nơ̆r hăm Hơnih jang Khoa hŏk kmăi kmŏk dêh char jing Hơnih jang Khoa hŏk kmăi kmŏk dêh char. Hơgrop jing mĭnh Hơnih jang Nô̆i vŭ hăm Hơnih jang vei lăng Bơngai jang-bơngai rơka tơpôl jing Hơnih jang Nô̆i vŭ dêh char. Hơgrop jing mĭnh Hơnih jang vei lăng Ming man dêh char hăm Hơnih jang vei lăng Trong gre nơnăm dêh char jing Hơnih jang vei lăng Ming man dêh char. Hơgrop jing mĭnh Hơnih jang Jên hu hăm Hơnih jang Pơprŏ tơdrong jang-Tơmơ̆t jên jang dêh char jing Hơnih jang vei lăng Jên hu dêh char. Hơgrop jing mĭnh Hơnih jang vei lăng Choh jang sa atŏk tơ iung tơring tơrang hăm Hơnih jang vei lăng Cham char mŭk drăm bri brăh jing Hơnih jang vei lăng Choh jang sa păng Cham char dêh char. Pơjing Hơnih vei lăng Kon kông păng Lui khop dêh char ‘moi kiơ̆ Hơnih jang vei lăng kon kông dêh char tơmơ̆t dơ̆ng dôm tơdrong jang vei lăng lui khop đơ̆ng Hơnih jang Nô̆i vŭ dêh char. Lơ loh, hơnih bơ̆ jang tơm găh Hơnih vei lăng kon pơlei dêh char Dak Nông hlôi pơm tơjur đơ̆ng 18 lê̆ pă 14 hơnih jang. Jei tơ̆ hop akom, Jơnŭm vei lăng kon pơlei dêh char Dak Nông hlôi drơ̆ng minh nơ̆r hơmet ming trong tơlĕch jang tŏk mŭk drăm GDP sơnăm 2025 iŏk đei 8,11% (trong tơlĕch jang so ‘noh 6,84%).