Jăl jang âu ki, Anih MTTQ Việt Nam jơ̆p tơring pơgơ̆r bơ̆ jang ‘lơ̆ng tơdrong dăr lăng păng tơblang tơƀôh ăn tơpôl. Lơ tơdrong dăr lăng đơ̆ng MTTQ Việt Nam hơnhăk ba lơ tơdrong ‘lơ̆ng tơgŭm ăn dôm anih jang kơpal tơtom hơmet pơ ‘lơ̆ng pơmat tat, ưh kơ lăp; tơlĕch trong hơmet ming tơdrong pơgơ̆r, trong tơgŭm; pơm lăp hăm tơdrong ‘mĕh vă, vei lăng ‘lơ̆ng tơdrong đei yoa trŏ luơ̆t, tôch tơgăl ăn kon pơlei.

Xăh Minh Khai, apŭng Hoài Đức, plt Hà Nội...Akŏm đĭ đăng teh đei iŏk pơdreu vă pơm trong dăr 4 kơ Anih tơm ‘nŏh 5,7 ha đơ̆ng 143 unh hnam. ‘Nâu jĭ xă mă blŭng kơ apŭng Hoài Đức jang đang tơdrong krao hơvơn kon pơlei, chưk pơ ‘ngoăih teh ăn tơdrong jang pơm Trong dăr 4. Truh dang ei, đĭ đăng kon pơlei hlôi iŏk đei jên hrŭ ‘mong đơ̆ng teh, hlôi pơjao teh ăn tơdrong jang păng năng ƀôh dôm kây sô̆ mă blŭng kơ Tơdrong jang dei man hăm ƀê-tông, tuh yâu hăk.

Yă Đỗ Thị Tuyết, Bơngai vei lăng Khul jang Mặt trận plei Minh Hòa 3, xăh Minh Khai ăn tơbăt: "Ƀok pơgơ̆r pơlei păng Khul jang Mặt trận athei bơ̆ jang, vih vât lơ ‘măng ‘mơ̆i vă gơ̆h jang đei thoi âu. Khul jang Mặt trận kơ pơlei năm krao hơvơn kon pơlei ‘nŏh mih ma duch nă kŭm pơngơ̆t, ưh băt hăm đei tơdrong pơmat tat kiơ ưh? Mă lei vă bơ̆ jang tơdrong jang tơm kơ teh đak ‘nŏh rim unh hnam pơm kiơ̆ ngăl".

Bơ̆ jang kiơ̆ trong "kon pơlei băt, kon pơlei pơma nuh, kon pơlei bơ̆ jang, kon pơlei hơlen năng, kon pơlei dăr lăng păng kon pơlei xa yoa", lơ̆m jăl jang âu ki, Anih Trung ương MTTQ Việt Nam pơgơ̆r pơjing 31 khul dăr lăng vă chă dăr lăng kiơ̆ tơdrong jang; Anih MTTQ Việt Nam jơ̆p tơring hlôi pơgơ̆r, jang hơdoi vang dăr lăng đei 231 rơbâu tơdrong. Tơdrong tơblang tơƀôh tơpôl vang tơgop pơm hơtŏk tơdrong pơm tơm đơ̆ng kon pơlei lơ̆m tơdrong jang atŏk tơiung mŭk drăm, tơpôl. Mă lei, mă tơpă tơ̆ lơ tơring đei tơdrong kon pơlei ƀôh, kon pơlei băt mă lei ưh ‘mĕh pơma, ưh pơ̆n pơma, ưh pơ̆n tơl tơblang.

PGS.TS. Vũ Văn Phúc – Phŏ Kơdră Khul jang Khoa hŏk dôm anih jang Đảng Trung ương akhan: “Mă tơpă hơnơ̆ng pơma: kon pơlei vang tơiung pơjing, hơmet ming đảng, kon pơlei vang dăr lăng đe kăn ƀô̆ đảng viên mă lei ưh tam đei trong jang ‘lơ̆ng, đei yoa kiơ vă bơ̆ jang tưk tơiung tơdrong dăr lăng đơ̆ng MTTQ, dôm khul jang chinh trĭ, tơpôl păng kon pơlei. Yoa thoi noh, athei tưk tơiung hlŏh dơ̆ng hơnăp jang đơ̆ng kon pơlei lơ̆m tơdrong hơlen năng, dăr lăng khul kăn ƀô̆ đảng viên bơ̆ jang tơdrong jang đei pơjao; kăn ƀô̆ đảng viên bơ̆ jang tơnăp ‘lơ̆ng; dăr lăng kăn ƀô̆, đảng viên pơtâp pơhrăm găh jơhngâm đon, tơdrong arih xa".

Vă tơdrong dăr lăng, tơblang tơƀôh đơ̆ng MTTQ ưh pă jang pơtrŏ đĕch ‘nŏh athei chih hơdăh trong pơgơ̆r jang vă kon pơlei gơ̆h roi tơbăt tôm, trŏ ƀlep păng tơtom. Dăr lăng, tơblang tơƀôh đơ̆ng kon pơlei athei bơ̆ jang mă rơđăh rơđong, trŏ ƀlep, hơtŏk đei hơnăp vang jang mă tôm đơ̆ng kon pơlei, mă loi hơnăp jang đơ̆ng kon pơlei lơ̆m tơdrong dăr lăng kăn ƀô̆, đảng viên tơ̆ anih jang păng tơ̆ tơring oei xa. Athei chih răk, tơl tơblang, sek tơlang kiơ̆ nơ̆r athei mưh dăr lăng, tơblang tơƀôh đơ̆ng MTTQ Việt Nam.

Yă Nguyễn Quỳnh Liên, Kơdră Anih vei lăng tơdrong pơm tơm kơ kon pơlei, dăr lăng păng tơblang tơƀôh lơ̆m tơpôl, Anih Trung ương MTTQ Việt Nam ăn tơbăt: "Nhôn gô tơchĕng hơlen vă tơlĕch 1 trong pơgơ̆r jang mă ‘lơ̆ng, pơm kiơ̆ dôm nơ̆r athei đơ̆ng Mặt trận đơ̆ng rŏng kơ dăr lăng, tơblang tơƀôh. Đơ̆ng trong pơgơ̆r bơ̆ jang âu vă chih tơlĕch dôm tơdrong hơgăt mă hơdăh, jăh tơmât lơ̆m Apăng 14 tơdrong Tơchơ̆t 69, kŭm nhen dôm trong jang đei tơlĕch lơ̆m tơdrong tơchơ̆t kơsô̆ 22 đơ̆ng Ban Bí thư, vă pơm ‘lơ̆ng ăn dôm anih jang athei đei hơnăp mă jang mă ‘lơ̆ng lơ̆m tơdrong bơ̆ jang kiơ̆ dôm nơ̆r athei đơ̆ng Mặt trận."

Tơdrong jang dăr lăng, tơblang tơbôh đơ̆ng MTTQ athei bơ̆ jang gơnang đơ̆ng kon pơlei, pơm hơtŏk ‘lơ̆ng hlŏh tơdrong vang jang, vang tơgop đơ̆ng kon pơlei. Athei đei trong pơgơ̆r jang vă kon pơlei bơ̆ jang tơdrong dăr lăng, tơblang tơƀôh. Tưk tơiung hơnăp jang dăr lăng đơ̆ng kon pơlei ‘nŏh jĭ bơ̆ jang kiơ̆ đon tơchĕng đơ̆ng Ƀok Hô "iŏk kon pơlei pơm tơm", vă pơgơ̆r, pơlung kon pơlei vang bơ̆ jang dăr lăng anih jang đảng, đảng viên vang tơgop, hơnhăk tơdrong dăr lăng mât hlom lơ̆m rim tơdrong, lăp hăm yăn âu păng đei yoa ‘lơ̆ng./.