Pơma tơ̆ âu, Thủ tướng Phạm Minh Chính pôk pơ ư, tơchĕng ‘lơ̆ng dôm tơdrong adrin păng tơdrong jơnei iŏk đei đơ̆ng Hnam hŏk Drŏ kăn Việt Nam pơma hơdrô̆ păng Khul drŏ kăn Việt Nam pơma atŭm, tơgop ‘lơ̆ng ăn tơdrong jang yoa tơdrong gơ̆h hơgei đơ̆ng đe drŏ kăn păng tơƀôh hơdăh hơnăp jang gĭt kăl đơ̆ng Drŏ kăn Việt Nam lơ̆m tơdrong tơiung pơjing păng vei lăng teh đak.

Mât lơ̆m chăl ‘nao – chăl jang tŏk đơ̆ng hơdrĕch hơdrung, Thủ tướng athei, Drŏ kăn Việt Nam hơnơ̆ng tưk tơiung hlŏh dơ̆ng tơdrong juăt ‘lơ̆ng hơiă đơ̆ng sơ̆; adrin yak hlŏh pơmat tat, pơlong nol; hơnơ̆ng mât 1 ƀơ̆r đon, pôm jơhngâm, hăm jơhngâm đon ‘lơ̆ng, gơ̆h hơgei, iâm dim, hăm jơhbngâm dodn jang tơnăp, kŭm hăm teh đak adrin bơ̆ jang đei jơnei dôm tơdrong vă jang, tơdrong pơhnŏng jang tŏk mŭk drăm, tơpôl đei tơlĕch.

Thủ tướng athei, Hnam hŏk Drŏ kăn Việt Nam hơnơ̆ng tưk tơiung tơdrong juăt ‘lơ̆ng hơiă păng dôm tơdrong jơnei iŏk đei; ‘moi kiơ̆ hơnăp jang păng kơjă kăp gĭt đơ̆ng: “Mât 1 ƀơ̆r đon; Jang tơnăp, gơ̆h hơgei; ‘lơ̆ng hơiă”; đei đon adrin jang chinh trĭ dêh hlŏh dơ̆ng, tơplih ‘nao mă pran hlŏh dơ̆ng, hơnơ̆ng kơchăng, bơ̆ jang gơ̆h hơgei, jang đang ‘lơ̆ng hlŏh dôm tơdrong jang tơm vă atŏk tơiung păng trong jang đunh đai hlôi đei tơlĕch tơ̆ ning mônh kơnh.