Đơ̆ng rŏng kơ đei tơchơ̆t jang đơ̆ng Anih jang vei lăng kon pơlei dêh char, dôm sơnăm âu ki, anih jang tơmang pơhiơ̆ dêh char Lâm Đồng hlôi jang hadoi hăm dôm anih jang đei tơrĕk truh vă sơkơ̆t hơdah đei 33 anih tơmang pơhiơ̆ var pơgar. Mă lei, kơyuơ ƀơm lơ tơhlăk tơhlĭn kơlih dôm tơchơ̆t đơ̆ng khôi luơ̆t oei yua dang ei, pơm ăn tơdrong jang tơmang pơhiơ̆ var pơgar tơ̆ Lâm Đồng ƀơm lơ tơnap tap.

Pơma sơkơ̆t ah hop akŏm, ƀok Phạm S, Phŏ Kơdră Anih jang vei lăng kon pơlei dêh char Lâm Đồng sơkơ̆t hơdah: Vă hơtŏk jang tơmang pơhiơ̆ var pơgar hơtŏk kơtang lơ̆m khei năr truh, dêh char tŏk bŏk oei pơgơ̆r dôm anih jang gah tơmang pơhiơ̆ dah chih akŏm trong iŏk yua teh vă akŏm ăn tơdrong tơmang pơhiơ̆ atŭm hăm dôm tơchơ̆t tơlĕch hơdah, vă pơtruh ăn anih jang kơpal hloh kĭ tơchơ̆t. Tơdrong mă âu đei pơm kiơ̆ Luơ̆t groi teh sơnăm 2024 păng dôm tơdrong tơchơ̆t nai đei tơrĕk hadoi.