Tổng Bí thư, Kơdră teh đak Tô Lâm vang truh akŏm păng iung pơma nơ̆r pơtho tơ̆ Hop akŏm. Vang truh hop akŏm đei 1.052 ‘nu bơngai tang măt dơ̆ng tang ăn đĭ đăng kon pơlei, khul grŭp, hơdrĕch hơdrung, tơdrong lui khop, khul linh, bơngai Việt Nam oei tơ̆ teh đak đe păng kăn ƀô̆ Mặt trận jơ̆p tơring, tơƀôh hơdăh um rup ‘lơ̆ng hơiă đơ̆ng tơguăt đĭ đăng hơdrĕch hơdrung.
Hăm đon pơhnŏng, hơnơ̆ng tưk tơiung tơdrong juăt ‘lơ̆ng, jơhngâm pran đơ̆ng tơguăt đĭ đăng hơdrĕch hơdrung, jơhngâm pran đơ̆ng đĭ đăng hơdrĕch hơdrung mât 1 ƀơ̆r đon, jăl jang đơ̆ng 2024 - 2029, Hop akŏm tơlĕch 6 tơdrong jang đei: Hơtŏk tơdrong tơroi tơbăt, krao hơvơn, akŏm đĭ đăng kon pơlei, hơtŏk tơdrong drơ̆ng pôm nơ̆r lơ̆m tơpôl, tưk tơiung jơhngâm pran đơ̆ng tơguăt đĭ đăng hơdrĕch hơdrung.
Hơtŏk tơdrong ‘lơ̆ng, đei yoa đơ̆ng tơdrong dăr lăng păng tơblang tơƀôh lơ̆m tơpôl, bơ̆ jang ‘lơ̆ng tơdrong kon pơlei pơm tơm, vang tơiung pơjing Đảng, Teh đak. Pơlung kon pơlei pơjei băl, gơ̆h hơgei, bơ̆ jang đei yoa dôm tơdrong krao hơvơn, tơdrong pơjei băl. Tưk tơiung hơnăp jang pơm tơ ‘ngla, đon jang tơnăp đơ̆ng kon pơlei, pơjing tơring oei xa mât 1 ƀơ̆r đon, phĭ tơtŏ dơnŏ ‘lơ̆ng, hiôk chơt. Hơtŏk tơdrong đei yoa mưh jang tơbôl đơ̆ng kon pơlei păng tơdrong jang bơngai Việt Nam tơ̆ teh đak đe. Hơnơ̆ng tơplih ‘nao anih chĕp kơ̆l pơgơ̆r, tơdrong bơ̆ jang; hơtŏk đon rơgei ăn khul kăn ƀô̆ Mặt trận jơ̆p tơring.
Viết bình luận