72 sơnăm, hăm 53 sơnăm jang Đảng, yă Nguyễn Thị Hồng tơ̆ thị trấn Quảng Phú, apŭng Cư Mgar, dêh char Đắk Lắk oei tôch tơnăp hăm tơdrong jang lơ̆m tơpôl. Jĭ Kơdră vei lăng Khul bơngai đei hơyăt rôp phak yoa ‘mêm kơ teh đak tơ̆ apŭng Cư Mgar, yă hơnơ̆ng pơngơ̆t truh tơdrong arih xa păng tơdrong đei yoa kơ bơngai jang lơ̆m khul. Vang jang kăch mang đơ̆ng hrôih tơ̆ tơring kăn kư̆ Đạt Lý 2 (jĭ thôn 1, xăh Hòa Thuận, plt Buôn Ma Thuột, dêh char Đắk Lắk hrei ‘nâu), ƀât ‘nao 19 sơnăm, yă chơt hơiă đei mât jang Đảng Cộng sản Việt Nam. Hlŏh lơ ‘măng đei hơyăt rôp phak, yă oei vei kơjăp đon lui hăm kăch mang. Đơ̆ng rŏng kơ năr rơngei, yă hơnơ̆ng bơ̆ jang tơ̆ apŭng Cư Mgar dơ̆ng.

Yă Nguyễn Thị Hồng tơroi: “Lơ̆m khei ‘năr tơblăh sơ̆ hơnơ̆ng tơblăh hăm ayăt, ưh hli kiơ, chu lôch hŭt hơkâu. Inh vang jang kăch mang kŭm ƀôh lơ bôl boăl lôch tang yoa tơdrong rơngei, yoa tơdrong hiôk hian hrei ‘nâu. ‘Nŏh kŭm jing tơdrong tơm, jing jơhngâm pran vă inh adrin, hơnơ̆ng chĕp kơjăp nơ̆r hơngăh hăm teh đak, hăm Đảng, hăm kon pơlei. Đơ̆ng rŏng kơ iŏk rơngei, inh ƀôh kơdih kâu jĭ bơngai tôch pŭn oei đei arih, đei dơ̆ng tơdrong ‘lơ̆ng vă plang jơhngâm ăn pơlei pơla, ăn teh đak”.

Oei hăm Thượng tá Lữ Thị Anh Đào, Phŏ Kơdră Anih PA02, Công an dêh char Đắk Lắk, prăt lơ̆m vă jê̆ 30 sơnăm bơ̆ jang tang găn Khul iung tơjră phă ngơ̆r teh đak, mŏ hơnơ̆ng hlôh vao kơjăp đon jang kăch mang păng jơhngâm đon ‘lơ̆ng đơ̆ng bơngai đảng viên, jang đang ‘lơ̆ng rim tơdrong đei pơjao.

Thượng tá Lữ Thị Anh Đào pơma:“Đei rim jơhnơr năm hơdrol pơtho tơƀôh, kŭm hăm tơdrong hlôh vao đei hŏk tơ̆ hnam trưng, đei ƀôh lơ̆m tơdrong hŏk pơhrăm, inh ƀôh lơ tơdrong hŭt hơkâu, plang jơhngâm tih tên đơ̆ng rim jơhnơr hơdrol, kơna dôm tơdrong pơmat tat, gleh hrat mă inh oei tơƀâp dang ei ưh đei dêh yă kiơ. Kơlih thoi noh mă inh hơmet ming jơhngâm đon kơdih, dôm tơdrong kiơ mă bôl boăl jang đei ưh jor kơdih kâu gơ̆h jang đei ‘năi vă ba đei đon adrin păng bơ̆jang mă tơnăp, thoi noh na gơ̆h jang đei”.

Jĭ drŏ kăn kăn ƀô̆ bơngai kon kông, ‘nao 39 sơnăm, mŏ H’Cir Mlô, tơ̆ xăh Ea Đar, apŭng Ea Kar đĭ đei 14 sơnăm jang Đảng. Sơ̆ đei pơm Bí thư chi ƀô̆ plei Sứk, xăh Ea Đar, đang kơ ‘nŏh pơm Kơdră vei lăng Khul drŏ kăn xăh Ea Đar, tơ̆ tơdrong jang kiơ, mŏ hơnơ̆ng jang ‘lơ̆ng hơnăp jang pơn gơng tơƀưh đơ̆ng Đảng hăm kon pơlei.

Tơgŭm ăn kon pơlei pơma tơlĕch dôm tơdrong hơpơi ‘mĕh tôch tơgăl păng iŏk đei lơ nơ̆r tơl tơblang trŏ ƀlep, tơpăt ‘lơ̆ng đơ̆ng đe ƀok Kơdră, mŏ H’Cir Mlô vang tơgop pơm hơtŏk đon lui đơ̆ng kon pơlei hăm Đảng păng khul kơdră pơgơ̆r tơring. “Gơ̆h hơgei, đei jơhngâm đon tơpăt ‘lơ̆ng, lăp hăm rim tơdrong hơgăt đơ̆ng 1 ‘nu kăn ƀô̆ lơ̆m chăl ‘nao, bơ̆n athei mât hơdai, kơdih kâu athei jang mă tơnăp hơdrol. Inh lui kiơ̆ dôm trong jang, hla ar pơkăp, tơdrong tơchơ̆t, nơ̆r pơtho đơ̆ng Đảng păng teh đak. Kơna tơdrong pơtâp pơhrăm, bơ̆ jang, pơjao ăn inh jang tơdrong kiơ, inh kŭm hơnơ̆ng adrin vă jang đang ‘lơ̆ng tơdrong jang đei pơjao”.

Hăm jơhngâm đon jang tơnăp, adrin yak hlŏh rim tơdrong pơmat tat păng đĭ jơhngâm hăm Đảng, hăm kon pơlei, lơ drŏ kăn đảng viên tơnăp ‘lơ̆ng tơ̆ Đắk Lắk oei tơiung jơhngâm hưch hanh ăn jơhnơr mơlôh yak kiơ̆, hơnơ̆ng tơiung pơjing pơlei pơla roi đunh roi pơdrŏng ‘lơ̆ng rŏ./.