Mĭnh lơ̆m dôm tơdrong hơiă mưh bơ̆ jang kiơ̆ Tơdrong tơchơ̆t 18 tơ̆ Đắk Lắk ‘nŏh jĭ dôm tơdrong tơmât hơdai dôm anih jang vei lăng, vă kăt tơjur khul bơngai jang mă ưh đei pơm tơjur tơdrong đei yoa mưh bơ̆ jang. Ƀok Trương Hoài Anh, Kơdră Anih vei lăng tơdrong tơroi tơbăt dêh char Đắk Lắk, ăn tơbăt tơdrong tơmât hơdai Anih vei lăng tơdrong tơroi tơbăt hăm Anih jang Khoa hŏk kơmăy kơmŏk đei tơlĕch jang tôch ‘lơ̆ng păng đei yoa. 2 anih jang pơgơ̆r lơ ‘măng hop akŏm vă drơ̆ng nơ̆r ăn trong tơmât hơdai, pơjing Khul pơgơ̆r tơmât hơdai adrol kơ ‘năr 10/1/2025.

“Anih jang roi tơbăt ăn đĭ đăng kăn ƀô̆, bơngai jang lơ̆m anih. Hăm tơdrong tơmât hơdai 2 Anih ‘nŏh jĭ Anih vei lăng tơdrong tơroi tơbăt păng Anih vei lăng jang khoa hŏk kơmăy kơmŏk ‘nŏh dêh char hlôi pơjing 1 grŭp jang păng truh dang ei hlôi pơgơ̆r đang hop akŏm, 2 păh pơjing trong jang ăn grŭp adrol kơ ‘năr 10/1/2025 păng vă hôp dơ̆ng vă gơ̆h drơ̆ng kiơ̆ trong jang adrol kơ ‘năr 15/1 vă roi tơbăt ăn Anih vei lăng kon pơlei dêh char păng Anih chĕp kơ̆l Đảng dêh char kiơ̆ tơdrong hơgăt.”

Tơ̆ apŭng Cư M'gar, ƀok Trần Đình Nhuận, Bí thư Đảng apŭng, kŭm roi tơbăt bơ̆ jang kiơ̆ Tơdrong tơchơ̆t 18, Cư M'gar tơmât hơdai Anih jŏh ayŏ kơ dŏ xoang, tơplŏng kơdâu hăm Radio pơdăh um rup, tơmât hơdai 8 hnam trưng, tơjur 8 pơlei păng kăt tơjur đei 10% kăn ƀô̆, bơngai jang lơ̆m teh đak. Tơ̆ hơnăp kơnh, apŭng Cư M'gar vă tơlĕch lơ trong tơmât hơdai lơ anih jang nai, nhen tơmât hơdai dôm Anih rong kon tơrong, rei pơtăm, vei lăng tơmam pơtăm jing 1 anih pơvih ăn tơdrong choh jang xa kơ apŭng... Dôm tơdrong tơplih âu ưh lăp kăt tơjur ƀiơ̆ anih jang đĕch mă oei tơgŭm ăn dôm anih jang bơ̆jang roi đei yoa ƀiơ̆.

“Kơdră chĕp kơ̆l Đảng apŭng hlôi tơƀâp dôm bơngai đei sơnăm oei pă hơla kơ 5 sơnăm bơ̆ jang vă hơlen năng tơdrong hơpơi ‘mĕh đơ̆ng đe sư păng roi tơƀôh mă hơdăh vă pơlung đe kăn ƀô̆ pơdơ̆h hưu adrol kơ sơnăm đei xa yoa dôm tơdrong tơgŭm, truh dang ei đei 1 ‘nu kơdră chĕp kơ̆l Anih jang păng 5 ‘nu Phŏ kơdră  hlôi pơm hla ar apinh pơdơ̆h hưu hrôih.”

Ƀok Bạch Văn Mạnh, Kơdră Anih jang Nội vụ dêh char, kŭm pơma hơdăh, đơ̆ng rŏng 7 sơnăm bơ̆ jang Tơdrong tơchơ̆t 18, dêh char Đắk Lắk tơjur đei 10% biên chê̆ pơting hăm sơnăm 2015, jur 30 lăm bơ̆ jang găh dôm Anih jang kơpal păng jur 40 lăm bơ̆ jang tơ̆ tơring. ‘Nâu jĭ tơdrong jơnei tôch hơiă, ưh lăp tơƀôh đon pơhnŏng kăt tơjur khul bơngai jang đĕch oei pơm ‘lơ̆ng ăn tơdrong vei lăng ƀât mă lơ tơdrong athei roi đunh roi tŏk hăm Anih vei lăng teh đak. Tơ̆ hơnăp kơnh, Đắk Lắk vă hơnơng bơ̆jang dôm trong jang tơmât hơdai 1,2 anih jang kơpal, vă kăt tơjur anih jang păng pơm hơtŏk tơdrong ‘lơ̆ng mưh vei lăng.

Ƀok Bạch Văn Mạnh ăn tơbăt: “Nhôn hlôi hơmet đang trong jang păng khul pơjing anih jang bơih. Anih vei lăng kon pơlei dêh char pơtho ăn Anih jang Nội vụ dêh char jang hơdoi hăm dôm anih jang kơpal pơjing 8 grŭp hơmet ming, lơ̆m noh krao Kơdră vang jang lơ̆m 2 grŭp păng dôm Phŏ kơdră Anih vei lăng kon pơlei vang jang lơ̆m dôm grup vă gơ̆h drơ̆ng 1 nơ̆r bơ̆ jang. Păng tơdrong pơgơ̆r jang kŭm hrĕnh, ‘lơ̆ng.”

Anih chĕp kơ̆l Đảng dêh char Đắk Lắk chih hơdăh Bơ̆ jang kiơ̆ Tơdrong tơchơ̆t 18 jĭ tơdrong jang tôch gĭt kăl, ưh gơ̆h gơ̆t lê̆. Ƀok Nguyễn Đình Trung, Bí thư Đảng dêh char, pơma hơdăh: "’Nâu jĭ 1 tơdrong jang kăch mang găh kăt tơjur anih jang, bơ̆ jang roi hrĕnh roi đei yoa ăn tơdrong jang tŏk kơ teh đak." Dêh char Đắk Lắk jang kiơ̆ trong "kơdâu răh, pơreng răh", akŏm jơhngâm bơ̆ jang tôch ai, atŭm hăm ‘nŏh pơgơ̆r jang hrơ̆ch ‘lơ̆ng đơ̆ng dôm khul kơdră pơgơ̆r đơ̆ng trung ương truh tơ̆ tơring:

“Tơplih ‘nao, hơmet ming khul jang tơ̆ Anih jang chinh trĭ tŏ sĕt bơngai, bơ̆ jang gơ̆h hơgei, đei yoa ‘nŏh jĭ tơdrong tôch gĭt kăl, jĭ tơdrong jang kăch mang găh kăt tơjur bơngai jang lơ̆m anih jang chinh trĭ, kŭm hăm lơ tơdrong pơmat tat đei ƀơm truh tơdrong đei yoa, đon hơpơi ‘mĕh đơ̆ng kăn ƀô̆, bơngai jang lơ̆m anih jang chinh trĭ. Athei mât 1 jơhngâm đon, drơ̆ng pôm nơ̆r, adrin jang tôch ai yoa tơdrong đei yoa atŭm kơ dêh char.”

Hăm đon pơhnŏng đơ̆ng rim anih jang chinh trĭ, đơ̆ng dêh char truh tơ̆ apŭng, păng nơ̆r pơtho tôch hơlen đơ̆ng kơdră chĕp kơ̆l, Đắk Lắk oei adrin bơ̆ jang kiơ̆ Tơdrong tơchơ̆t 18 hăm jơhngâm đon "tơplih ‘nao, hơmet ming khul jang lơ̆m rim anih jang chinh trĭ tŏ sĕt bơngai, jang rơgei, đei yoa". Dôm tơdrong jang đei ăn ƀôh đon pơhnŏng tôch pơnĕh, 1 jơhngâm đon, ưh hli pơmat tat, dêh char Đắk Lắk vă hơnơ̆ng năm trŏ trong păng pơjing trong jang kơjăp 'lơ̆ng ăn tơdrong jang tŏk tơ̆ hơnăp ning mônh kơnh.