Hăm 30 sơnăm bơ̆ jang, mŏ H’Er Niê Kđăm, Bơngai juăt jang tơ̆ Anih vei lăng hơdrĕch kon kông kơ apŭng Cư M'Gar, dêh char Đắk Lắk tơroi, mŏ ƀôh tơdrong tơgŭm ăn kơ đe kăn ƀô̆ pơdơ̆h hưu hrôih kiơ̆ tơdrong Tơchơ̆t 178 ‘nŏh tôch lăp. Mŏ H’Er lui, dôm bơngai oei ‘lơ̆p ƀiơ̆ gô tơiung đei đon rơgei đơ̆ng kơdih păng mŏ kŭm hơnơ̆ng tơgop lăp ‘lơ̆ng ăn tơpôl tơ̆ tơring mŏ oei xa dơ̆ng: “Đơ̆ng rŏng kơ pơdơ̆h hưu, inh vă vih tơ̆ pơlei. Lơ̆m khei ‘năr bơ̆ jang ki inh hŏk iŏk đei lơ tơdrong kăl, mưh vih hăm kon pơlei, yă kiơ đe tam mă băt ‘nŏh inh vă tơgŭm ăn yă ‘nei, tơƀôh trong ăn kon pơlei jang xa. Tơdăh inh đei mât jang lơ̆m khul pơgơ̆r pơlei dơ̆ng lei, inh vă adrin tôch ai vang tơgŭm ăn pơlei pơla.”

Nhen thoi noh mơ̆n, Kỹ sư Nguyễn Ngọc Giao, Kơdră Anih vei lăng choh jang xa păng atŏk tơiung tơring tơrang apŭng Cư M'Gar, kŭm pơm hla ar apinh pơdơ̆h hưu hrôih ‘năi. Ƀok Giao lui, tơdrong jang kăch mang kăt tơjur bơngai jang oei tơlĕch jang tơ̆ rrim anih jang chinh trĭ gô hơnhăk ba tơdrong đei yoa đunh đai ăn kon pơlei păng tơdrong jang tŏk pran kơjăp. Hăm anih choh jang xa, gô tơgŭm tưk tơiung đei tơdrong choh jang xa ‘lơ̆ng, hơnhăk iŏk yoa lơ ăn kon pơlei: “Inh hơpơi ‘mĕh jơhnơr mơlôh jang pơtăl dơ̆ng, athei tưk tơiung đei đon jang tơnăp păng dôm tơdrong jơnei đơ̆ng chăl adrol, pơm thoi yơ vă hơtŏk tơdrong đei yoa mưh bơ̆ jang tơdrong jang chinh trĭ đơ̆ng Đảng păng teh đak pơjao ăn.”

Jô̆ truh ‘năr 10/1, apŭng Cư M'Gar đei 16 ‘nu kăn ƀô̆ pơm hla ar apinh pơdơ̆h hưu hrôih. Ƀok Nguyễn Thiên, Phó Bí thư chĕp kơ̆l Đảng apŭng Cư M'Gar, tơroi, Khul kơdră chĕp kơ̆l Anih jang đảng apŭng vă hơlen năng rim bơngai, vei lăng ‘lơ̆ng tơdrong đei yoa kiơ̆ luơ̆t. Ƀok Nguyễn Thiên pơma hơdăh: “Inh tơchĕng, lơ bơngai kŭm ƀôh hơdăh tơdrong tơm, tôch gĭt kăl đơ̆ng hơmet ming, kăt tơjur bơngai jang. Mưh roi tơƀôh ‘nŏh lơ bơngai tôch hơiă, kơna lơ̆m tơdrong jang kăn ƀô̆ đei lơ bơngai apinh pơdơ̆h jang pơm ăn Anih pơgơ̆r kŭm hiôk hian ƀiơ̆ păng mưh đei tơdrong tơgŭm ‘nŏh vă adrin pơjing tơdrong ‘lơ̆ng ăn đe sư đei xa dôm tơdrong tơgŭm kiơ̆ tơdrong hơgăt.”

 Kum hăm Cư M'Gar, dôm tơring nai lơ̆m dêh char Đắk Lắk kŭm đei lơ kăn ƀô̆ apinh pơdơ̆h hưu hrôih kiơ̆ tơdrong tơchơ̆t 18. Đĭ đei 7 ‘nu kăn ƀô̆, đảng viên găh Khul kơdră chĕp kơ̆l Đảng dêh char vei lăng, lơ̆m noh đei 2 ‘nu Kơdră jang lơ̆m Khul kơdră chĕp kơ̆l Đảng dêh char, 1 ‘nu Bí thư đảng apŭng kŭm chih hla ar apinh pơdơ̆h hưu hrôih. Jĭ Bí thư Đảng apŭng mă blŭng kơ dêh char Đắk Lắk apinh pơdơ̆h hrôih ƀât oei đei hlŏh 6 sơnăm bơ̆ jang dơ̆ng, ƀok Ra Lan Vôn Ga, Bí thư Đảng apŭng Mdrắk pơma: “Inh pơdơ̆h ‘nŏh inh ‘meh đei anih ăn Khul jang kơpal kŭm nhen anih jang hơmet ming kăt tơjur bơngai jang hiôk hian ƀiơ̆, păng rơih đei kăn ƀô̆ oei ‘lơ̆p kơ inh, rơgei, hơbĕch hơbal ƀiơ̆ kơ inh bơ̆ jang plang jơhngâm, tơgŭm ăn apŭng păng dêh char roi đunh roi tŏk. Mưh đei pơdơ̆h tơdăh oei kĕ bơ̆ jang, hăm đon hlôh vao đơ̆ng kơdih inh vă chă tơdrong jang mă lăp vă hơnơ̆ng tơgop ăn tơdrong jang tŏk đơ̆ng kơdih kŭm nhen ăn tơpôl.”

Ƀok Nguyễn Thượng Hải, Kơdră Anih pơgơ̆r kơ Anih chĕp kơ̆l Đảng dêh char Đắk Lắk ăn tơbăt, kiơ̆ trong jang, dêh char vă kăt tơjur tŏ sĕt hlŏh ‘nŏh 15% anih jang đơ̆ng rŏng kơ tơmât hơdai păng tơjur 20% bơngai jang. Tơdrong kăn ƀô̆, đảng viên pơm hla ar apinh pơdơ̆h hưu hrôih ‘nŏh jĭ tơdrong tôch hơiă, kiơ̆ đơ̆ng noh tơgŭm ăn dêh char hiôk hian ƀiơ̆ mưh bơ̆ jang hơmet ming, kăt tơjur bơngai jang: “Đei lơ bơngai oei hlŏh 5 sơnăm bơ̆jang, oei tôm sơnăm vă bơ̆ jang dơ̆ng jăl đơ̆ng rŏng, mă lei đe sư ‘mĕh pơjing tơdrong ‘lơ̆ng ăn jơhnơr đơ̆ng rŏng, vă đe sư bơ̆ jang pơm tơplih ‘lơ̆ng, tưk tơiung tơring roi pran, chơng hơnhăk anih jang tŏk pran hlŏh dơ̆ng kŭm nhen vang hơnhăk teh đak bơ̆n jang roi roi ‘lơ̆ng”.

Tơdrong lơ kăn ƀô̆ apinh apinh pơdơ̆h hưu hrôih tơ̆ Đắk Lắk oei pơjing tơdrong hiôk hian ăn dêh char hơmet ming, kăt tơjur bơngai jang. ‘Nâu kŭm jing đon tơnăp vă pơjao dơ̆ng hơnăp jang ăn jơhnơr đơ̆ng rŏng, tơgŭm pơm hơtŏk tơdrong đei yoa, pơjing jơhngâm pran ăn dêh char Đắk Lắk jang tŏk./.